Strasbourg, 26 Iúil 2007

A Uasail B., a chara,

An 5 Deireadh Fómhair 2005, chuir tú gearán faoi bhráid an Ombudsman Eorpaigh i gcoinne an Choimisiúin Eorpaigh maidir lena dhiúltú rochtain a thabhairt ar dhoiciméid áirithe, i gcomhréir le Rialachán 1049/2001. An 19 Deireadh Fómhair 2005, chuir tú doiciméid faoi bhráid an Ombudsman mar thaca le do ghearán.

An 4 Samhain 2005, chuir mé an gearán ar aghaidh chuig Uachtarán an Choimisiúin. Sheol an Coimisiún a thuairim an 3 Feabhra 2006 agus chuir mé ar aghaidh chugat í le cuireadh chun tuairimí a thabhairt, más mian leat, faoin 31 Márta 2006. Ní bhfuarthas aon tuairimí uait faoin dáta sin.

An 27 Meán Fómhair 2006, scríobh mé chuig an gCoimisiún, ag iarraidh tuilleadh faisnéise maidir le do ghearán. D’iarr mé ar an gCoimisiún freisin cead a thabhairt do mo sheirbhísí iniúchadh a dhéanamh ar na doiciméid lena mbaineann. Sheol an Coimisiún a fhreagra an 30 Eanáir 2007. Chuir mé ar aghaidh chugat é le cuireadh chun tuairimí a thabhairt, más mian leat, faoin 31 Márta 2007. Ní bhfuarthas aon tuairimí uait faoin dáta sin.

Táim ag scríobh chugat anois chun torthaí na bhfiosrúchán a rinneadh a chur in iúl duit.

An Gearán

Rinne an gearánach gearán faoi dhiúltú leanúnach an Choimisiúin rochtain a thabhairt, i gcomhréir le Rialachán (CE) Uimh. 1049/2001 ó Pharlaimint na hEorpa agus ón gComhairle an 30 Bealtaine 2001 maidir le rochtain phoiblí ar dhoiciméid ó Pharlaimint na hEorpa, ón gComhairle agus ón gCoimisiún(1) ("Rialachán 1049/2001"), ar na doiciméid seo a leanas:

1. litir dar dáta an 6 Eanáir 2004 ó Ard-Stiúrthóireacht an Fhuinnimh agus an Iompair chuig Buanionadaíocht na Danmhairge (TREN D/03/22884);
2. litir dar dáta an 11 Meitheamh 2004 ó Ard-Stiúrthóireacht an Fhuinnimh agus an Iompair chuig Buanionadaíocht na Danmhairge (TREN D/04/8777); agus
3. litir dar dáta an 15 Meán Fómhair 2004 ó Bhuanionadaíocht na Danmhairge chuig Ard-Stiúrthóireacht an Fhuinnimh agus an Iompair (TREN A/04/30692)(2).

Ar bhonn na ndoiciméad a cuireadh isteach mar thaca leis an ngearán, féadfar achoimre a dhéanamh ar na doiciméid sin mar a leanas:

Freagra an Choimisiúin ar an iarraidh ar rochtain

An 2 Meitheamh 2005, d’iarr an gearánach ar an gCoimisiún rochtain a fháil ar dhoiciméid áirithe a bhaineann le hAchainí 720/02 chuig Parlaimint na hEorpa.

I litir dar dáta an 6 Iúil 2005, thug an Coimisiún freagra ar an iarraidh, inar luadh gur litir dar dáta an 15 Meán Fómhair 2004 (TREN A/04/30692) ó údaráis na Danmhairge chuig an gCoimisiún agus dhá litir ón gCoimisiún chuig údaráis na Danmhairge dar dáta an 6 Eanáir 2004 (TREN D/03/22884) agus an 11 Meitheamh 2004 (TREN D/04/8777) a bhí sna doiciméid a bhí ina sheilbh ag freagairt don iarraidh. Chuir an Coimisiún in iúl nár shainaithin sé aon sárú ar dhlí an Chomhphobail sna fíorais a tuairiscíodh in Achainí 720/2002. Mar thoradh ar an achainí, chuaigh sí i dteagmháil, mar sin féin, le húdaráis na Danmhairge faoi chuimsiú a hinniúlachta ginearálta faireachán a dhéanamh ar chomhlíonadh dhlí an Chomhphobail ag na Ballstáit. Dá réir sin, bhí na doiciméid ar iarr an gearánach rochtain orthu mar chuid de réamhchomhairliúcháin faoi chuimsiú inniúlacht ghinearálta an Choimisiúin faireachán a dhéanamh ar chomhlíonadh dhlí an Chomhphobail ag na Ballstáit. Tháinig na doiciméid atá i gceist ó Achainí 720/2002, ach níor bhain siad go díreach leis an tsaincheist a d’ardaigh an achainí.

D’áitigh an Coimisiún freisin gur cumhdaíodh na litreacha le dhá cheann de na heisceachtaí ar an gceart rochtana a leagtar síos i Rialachán 1049/2001.

De réir an Choimisiúin, bhí na doiciméid mar chuid de na réamhchomhairliúcháin is gá le haghaidh ghníomhaíochtaí faireacháin an Choimisiúin. Dá nochtfaí na réamh-mhalartuithe sin ag céim sula ndéanfaí aon chinneadh, chuirfí plé ullmhúcháin inmheánach ar fáil don phobal, ar dlúthchuid riachtanach de phróiseas cinnteoireachta an Choimisiúin iad. Dá gcuirfí na doiciméid ar fáil don phobal, bheadh an baol ann freisin go gcruthófaí mearbhall maidir le seasamh oifigiúil agus rúin oifigiúla na hinstitiúide a bhaineann lena gníomhaíochtaí faireacháin, rud a chuirfeadh cumas an Choimisiúin faireachán ceart ar chur i bhfeidhm dhlí an Chomhphobail a áirithiú i mbaol. Dá nochtfaí na réamhchomhairliúcháin ag an gcéim ina raibh an próiseas faireacháin ag an bpointe ama sin, bhainfí an bonn de chosaint chuspóir imscrúduithe an Choimisiúin agus bhainfí an bonn go mór de chosaint a phróisis cinnteoireachta. Dá réir sin, cumhdaíodh na doiciméid leis na heisceachtaí a leagtar síos in Airteagal 4(2), an tríú fleasc(3), agus in Airteagal 4(3), an chéad fhomhír(4), de Rialachán 1049/2001 agus ní fhéadfaí, dá bhrí sin, iad a nochtadh. De réir an Choimisiúin, ní fhéadfaí aon pháirt-rochtain a dheonú agus ní raibh aon leas sáraitheach poiblí ann maidir le nochtadh.

Freagra an Choimisiúin ar an iarratas dearbhúcháin

An 11 Iúil 2005, chuir an gearánach iarratas dearbhúcháin ar rochtain ar na trí dhoiciméad faoi bhráid an Choimisiúin.

Thug an Coimisiún freagra ar iarratas daingniúcháin an ghearánaigh an 2 Lúnasa 2005, agus ghabh sé buíochas leis as a spéis i seasamh an Choimisiúin maidir le cur chun feidhme reachtaíocht Euratom sa Danmhairg. D’athdhearbhaigh an Coimisiún ábhar a fhreagra bunaidh ar iarraidh an ghearánaigh ar rochtain, is é sin, nár bhain na doiciméid atá i gceist go díreach leis an tsaincheist a ardaíodh in Achainí 720/2002, arbh í, i dtéarmaí simplí, inghlacthacht chur i bhfeidhm cúlghabhálach reachtaíocht Euratom í. Maidir leis an Achainí, níor shainaithin an Coimisiún aon sárú ar dhlí an Chomhphobail. Mar thoradh ar an Achainí, áfach, rinne an Coimisiún faireachán ar staid chur chun feidhme reachtaíocht Euratom sa Danmhairg. Dá bhrí sin, d’iarr an Coimisiún faisnéis maidir le gníomhaíochtaí faireacháin comhshaoil na Danmhairge mar a leagtar amach in Airteagal 35 de Chonradh Euratom. Dá bhrí sin, níl na doiciméid a iarradh nasctha go díreach le hAchainí 720/2002.

Tá an comhfhreagras ar iarr an gearánach rochtain air mar chuid de na réamhchomhairliúcháin atá riachtanach do ghníomhaíochtaí faireacháin an Choimisiúin. Forchoimeádann an Coimisiún an ceart freisin chun a áirithiú go n-urramófar an acquis maidir le cosaint ar radaíocht agus go ginearálta forálacha sláinte agus sábháilteachta Euratom. Is éard a bhí sa mhalartú litreacha, dá bhrí sin, iarraidh ar fhaisnéis a rinneadh i gcomhthéacs an phróisis faireacháin a ceapadh chun comhlíonadh reatha dhlí an Chomhphobail a fhíorú. D’fhéadfadh seoladh nós imeachta um shárú a bheith mar thoradh air sin. I bhfianaise íogaireacht pholaitiúil shaincheist na cosanta ar radaíocht agus an ghá atá leis an gcomhar idir an Coimisiún agus an Danmhairg a chosaint, bheadh nochtadh na ndoiciméad a iarradh ag an gcéim sin de na comhairliúcháin róluath agus bhainfí an bonn de chumas an Choimisiúin faireachán ceart ar chur i bhfeidhm dhlí an Chomhphobail a áirithiú. Dá dtabharfaí rochtain ar na doiciméid lena mbaineann sula ndéanfaí aon chinneadh, bheadh an baol ann freisin go gcuirfí mearbhall ar ghníomhaíochtaí faireacháin an Choimisiúin lena sheasamh oifigiúil in Achainí 720/2002. Mar thoradh air sin, dá nochtfaí na doiciméid a iarradh ag an am atá i gceist, bhainfí an bonn go mór de phróiseas cinnteoireachta leanúnach an Choimisiúin. Dá bhrí sin, cumhdaíodh na doiciméid leis na heisceachtaí in Airteagal 4(2), an tríú fleasc, agus in Airteagal 4(3), an chéad fhomhír, de Rialachán 1049/2001. Ní fhéadfaí rochtain pháirteach a dheonú agus níor chinn an Coimisiún go raibh aon argóint curtha ar aghaidh ag an ngearánach lena suitear leas sáraitheach poiblí maidir le nochtadh.

Líomhain an ghearánaigh

Líomhain an gearánach gur dhiúltaigh an Coimisiún rochtain ar na doiciméid thuasluaite go mícheart.

An Fiosrúchán

Tuairim an Choimisiúin

Sa tuairim uaidh, thug an Coimisiún, go hachomair, na barúlacha seo a leanas:

Cúlra

Na doiciméid ar iarr an gearánach rochtain orthu de bhun Rialachán 1049/2001, ba chomhfhreagras iad idir an Coimisiún agus údaráis na Danmhairge a rinneadh laistigh de chomhthéacs níos leithne Achainí 720/2002 a cuireadh faoi bhráid na Parlaiminte agus bhain siad le hinfheidhmeacht chúlghabhálach reachtaíocht Euratom agus le fadhbanna sláinte fadtéarmacha oibrithe na Danmhairge a bhain ábhar radaighníomhach ó láthair tuairte tionóisce a bhain le haerárthach míleata de chuid na Stát Aontaithe sa Ghraonlainn in 1968. Mhaígh na hachainígh, a d’oibrigh ar an láithreán, gur cheart Treoir 96/29/Euratom ón gComhairle an 13 Bealtaine 1996 lena leagtar síos caighdeáin bhunúsacha sábháilteachta chun sláinte oibrithe agus an phobail i gcoitinne a chosaint ar na contúirtí a eascraíonn as radaíocht ianúcháin(5) (‘Treoir BSS’) a chur i bhfeidhm. Chuir an Coimisiún in iúl don choiste freagrach de chuid na Parlaiminte nár mheas sé go bhféadfaí Treoir BSS a chur i bhfeidhm go cúlghabhálach maidir leis an tréimhse réamhaontachais. Mar thoradh ar an Achainí, áfach, chuaigh an Coimisiún i dteagmháil leis an Danmhairg agus d’iarr sé faisnéis maidir le gníomhaíochtaí faireacháin comhshaoil na Danmhairge mar a leagtar amach in Airteagal 35 de Chonradh Euratom. Dá bhrí sin, bhain an comhfhreagras ar iarr an gearánach rochtain air leis an iarraidh dheireanach ar fhaisnéis seachas leis an Achainí.

An iarraidh ar rochtain

Tá an comhfhreagras ar iarr an gearánach rochtain air mar chuid de na réamhchomhairliúcháin atá riachtanach do ghníomhaíochtaí faireacháin an Choimisiúin. Forchoimeádann an Coimisiún an ceart freisin chun a áirithiú go n-urramófar an reachtaíocht maidir le cosaint ar radaíocht agus go ginearálta forálacha sábháilteachta sláinte Euratom. Dá bhrí sin, ba é a bhí sa mhalartú litreacha iarraidh ar fhaisnéis maidir leis an bpróiseas faireacháin a ceapadh chun comhlíonadh dhlí an Chomhphobail a fhíorú an tráth sin. Chuir an Coimisiún in iúl freisin go bhféadfadh seoladh nós imeachta um shárú maidir leis an gcás a bheith mar thoradh ar an bpróiseas faireacháin atá i gceist. Is é is aidhm do sheoladh cuí na n-imeachtaí um shárú go háirithe ligean don Bhallstát lena mbaineann ceanglais an Chonartha a chomhlíonadh go deonach nó údar a thabhairt lena sheasamh. Tá feidhm níos mó fós ag an réasúnaíocht sin maidir le réamhchomhairliúcháin. Go deimhin, i bhfianaise íogaireacht pholaitiúil na saincheiste, is é sin, cosaint ar radaíocht, agus an gá atá leis an gcomhar idir an Coimisiún agus an Danmhairg a chosaint, bheadh nochtadh na ndoiciméad a iarradh ag an gcéim sin de na comhairliúcháin róluath agus bhainfí an bonn de chumas an Choimisiúin faireachán ceart ar chur i bhfeidhm dhlí an Chomhphobail a áirithiú. Thairis sin, laghdódh sé toilteanas údaráis na Danmhairge comhoibriú leis an gCoimisiún. Ar na cúiseanna thuas, cumhdaíodh na doiciméid atá i gceist leis an eisceacht mar a leagtar síos in Airteagal 4(2), an tríú fleasc, de Rialachán 1049/2001, ina sonraítear go "diúltóidhan institiúid rochtain ar dhoiciméad i gcás ina mbainfeadh nochtadh an bonn de chosaint na nithe seo a leanas: (...) cuspóir na gcigireachtaí, na n-imscrúduithe agus na n-iniúchtaí".

Thairis sin, fad nach bhfuil cinneadh déanta ag an gCoimisiún maidir le tús a chur le nós imeachta um shárú de réir Airteagal 141 Euratom, atá coibhéiseach le hAirteagal 226 i gConradh CE, bhainfeadh nochtadh na ndoiciméad lena mbaineann an bonn go mór den phróiseas cinnteoireachta leanúnach de réir Airteagal 4(3), an chéad fhomhír, de Rialachán 1049/2001. Dá nochtfaí na doiciméid ag an gcéim sin de na himeachtaí, chuirfí brú seachtrach míchuí ar an gCoimisiún agus, dá bhrí sin, chuirfí bac ar shaormhalartú tuairimí laistigh den Choimisiún chomh maith le comhar le húdaráis na Danmhairge. Tá sé fíor-riachtanach do phróiseas cinnteoireachta na hinstitiúide go mbeidh a seirbhísí in ann faisnéis a éileamh ó Bhallstát agus anailís a dhéanamh, saor ó bhrúnna seachtracha, ar gach gné den staid a bhféadfadh tús a chur le nós imeachta foirmiúil um shárú a bheith mar thoradh uirthi. Ní mór do sheirbhísí an Choimisiúin a bheith saor freisin chun smaointe agus tograí a chur ar aghaidh, gan a chur san áireamh go bhféadfaí a dtuairimí agus a measúnuithe a nochtadh don phobal. Ós rud é go mbaineann an próiseas cinnteoireachta le réamhghníomhaíochtaí faireacháin an Choimisiúin, tá feidhm ag an réasúnaíocht chéanna agus atá thuas.

Ag an gcéim sin de na himeachtaí, ní fhéadfaí rochtain pháirteach faoi Airteagal 4(6)(6) de Rialachán 1049/2001 a dheonú gan an bonn a bhaint d’imscrúduithe an Choimisiúin agus an bonn a bhaint go mór dá phróiseas cinnteoireachta.

Tá feidhm ag na heisceachtaí in Airteagal 4(2) agus (3) de Rialachán 1049/2001 ach amháin má dhéantar iad a tharscaoileadh le leas sáraitheach poiblí maidir le nochtadh. Mar sin féin, níor chuir an gearánach aon argóint ar aghaidh a léirigh gurbh ann do leas sáraitheach den sórt sin go deimhin. Dá bhrí sin, is é an leas atá i réim sa chás cuspóir imscrúduithe an Choimisiúin agus a phróiseas cinnteoireachta a chosaint.

Barúlacha an ghearánaigh

Seoladh tuairim an Choimisiúin chuig an ngearánach chun barúlacha féideartha a fháil. Níor chuir an gearánach aon bharúil isteach.

Tuilleadh fiosrúchán

Tar éis tuairim an Choimisiúin a bhreithniú go cúramach, ba chosúil go raibh gá le tuilleadh fiosrúchán.

Thug an tOmbudsman dá haire argóint an Choimisiúin go raibh na litreacha ar iarradh rochtain orthu mar chuid de "phróiseas faireacháin" an Choimisiúin. Tagraíonn Airteagal 4(2), an tríú fleasc, de Rialachán 1049/2001, áfach, do chigireachtaí, d’imscrúduithe agus d’iniúchtaí, seachas do phróisis faireacháin. Thairis sin, leanann sé ó chásdlí Chúirteanna an Chomhphobail gur gá na heisceachtaí a leagtar amach in Airteagal 4 a léirmhíniú go sriantach. I bhfianaise an mhéid sin, agus chun údar a thabhairt le cur i bhfeidhm Airteagal 4(2), an tríú fleasc, de Rialachán 1049/2001, iarradh ar an gCoimisiún an méid seo a leanas a mhíniú:

1. cén cineál cigireachta, imscrúdaithe nó iniúchta lenar bhain na litreacha ábhartha;
2. conas a d’fhéadfadh nochtadh na litreacha an bonn a bhaint de chuspóir na cigireachta, an imscrúdaithe nó an iniúchta sin; agus
3. a ábhartha atá Airteagal 4(3), an chéad fhomhír, de Rialachán 1049/2001 do na litreacha ón gCoimisiún an 6 Eanáir agus an 11 Meitheamh 2004, a seoladh chuig údaráis na Danmhairge.

I gcomhréir le hAirteagal 3(2) de Reacht an Ombudsman, iarradh ar an gCoimisiún freisin cead a thabhairt do sheirbhísí an Ombudsman iniúchadh a dhéanamh ar na doiciméid atá i gceist.

Freagra an Choimisiúin

Mar fhreagra ar fhiosrúcháin bhreise an Ombudsman, luaigh an Coimisiún gurb í an phríomhcheist sa chás ná ar cheart d’údaráis na Danmhairge é a chur ar an eolas faoi thorthaí an fhaireacháin ar an radaighníomhaíocht chomhshaoil sa Ghraonlainn, ionas gur féidir leis a chinneadh an mbeadh gníomhaíocht feabhais iomchuí anois sa limistéar inar tharla an tionóisc in 1968.

Ar dtús, d’iarr an Coimisiún faisnéis ar údaráis na Danmhairge ar an toimhde go raibh feidhm ag Conradh Euratom maidir leis an nGraonlainn (litir an 6 Eanáir 2004). D’fhreagair údaráis na Danmhairge trí fhacs an 30 Eanáir 2004, agus d’áitigh siad nach raibh feidhm ag Conradh Euratom maidir leis an nGraonlainn. I gceangal leis an teachtaireacht facs seo, sheol údaráis na Danmhairge taifead ar cheartú an Chonartha ar an Aontas Eorpach.

D’admhaigh an Coimisiún nach bhfuil feidhm ag Conradh Euratom maidir leis an nGraonlainn. An 11 Meitheamh 2004, d’iarr sí ar údaráis na Danmhairge an fhaisnéis a iarradh a sholáthar ar bhonn deonach.

An tráth a d’iarr an gearánach rochtain ar an malartú litreacha idir an Coimisiún agus údaráis na Danmhairge, ní raibh sé soiléir fós an leanfadh an Coimisiún dá iarrachtaí chun faisnéis a fháil maidir leis an leibhéal radaighníomhaíochta sa Ghraonlainn. Dá bhrí sin, dhiúltaigh an Coimisiún an comhfhreagras le húdaráis na Danmhairge a nochtadh ionas nach gcuirfí na deiseanna comhair ar bhonn deonach i mbaol. Mheas an Coimisiún go laghdódh nochtadh, an tráth sin, toilteanas údaráis na Danmhairge an fhaisnéis a sholáthar ar bhonn deonach, rud a bhainfeadh an bonn de chuspóir an imscrúdaithe a bhí beartaithe aige a dhéanamh. Thairis sin, go dtí go ndéanfar cinneadh maidir leis an ngníomhaíocht atá le déanamh, dhéanfadh nochtadh difear tromchúiseach freisin do chumas an Choimisiúin cinneadh a dhéanamh bunaithe ar chomhthuiscint le húdaráis na Danmhairge.

Ar na cúiseanna thuas, bhí an Coimisiún den tuairim gur chuir na heisceachtaí a leagtar amach in Airteagal 4(2), an tríú fleasc, agus in Airteagal 4(3), an chéad fhomhír, de Rialachán 1049/2001 cosc ar nochtadh an chomhfhreagrais le húdaráis na Danmhairge.

Le himeacht ama, níl feidhm a thuilleadh ag na cúiseanna leis na doiciméid a iarradh a choinneáil siar. Chuaigh an Coimisiún i gcomhairle le húdaráis na Danmhairge maidir leis an bhféidearthacht facs an 30 Eanáir 2004 ó Aireacht Gnóthaí Eachtracha na Danmhairge agus litir an 15 Meán Fómhair 2004 ó Bhuanionadaíocht na Danmhairge a nochtadh. Thug údaráis na Danmhairge a dtoiliú a gcuid den chomhfhreagras a nochtadh. Dá bhrí sin, tá an Coimisiún ag nochtadh anois an mhalartaithe iomláin litreacha le húdaráis na Danmhairge maidir le soláthar faisnéise a bhaineann leis an leibhéal radaighníomhaíochta sa Ghraonlainn.

Iata lena thuairim, chuir an Coimisiún cóipeanna den chomhfhreagras ar fáil. Ós rud é gur nocht an Coimisiún na doiciméid ar iarr an gearánach rochtain orthu, mheas sé nach raibh aon ghá a thuilleadh le hiniúchadh ag seirbhísí an Ombudsman ar na doiciméid.

Tuairimí an ghearánaigh

Iarradh ar an ngearánach barúlacha a chur isteach maidir le freagra an Choimisiúin, dá mba mhian leis. Ní bhfuarthas aon tuairimí uaidh.

An Cinneadh

1 Réamhbharúil

1.1 Maidir lena fhiosrúcháin bhreise an 27 Meán Fómhair 2006, d'iarr an tOmbudsman Eorpach ar an gCoimisiún Eorpach freisin, i gcomhréir le hAirteagal 3(2)(7) de Reacht an Ombudsman, cead a thabhairt dá sheirbhísí iniúchadh a dhéanamh ar na doiciméid a bhaineann leis an gcás seo.

1.2 I gcomhthéacs fhiosrúcháin bhreise an Ombudsman, chuir an Coimisiún cóipeanna de na doiciméid a bhí i gceist ar fáil don ghearánach.

1.3 Ós rud é gur dheonaigh an Coimisiún rochtain ar na doiciméid ábhartha, ní mheasann an tOmbudsman a thuilleadh go bhfuil iniúchadh ar na doiciméid atá i gceist ábhartha. Mar sin féin, dheonaigh an Coimisiún rochtain agus is cosúil go gcosnaíonn sé fós cuibheas a dhiúltaithe (tosaigh) a ndearnadh agóid ina choinne. Ar an gcúis sin, measann an tOmbudsman go bhfuil sé ábhartha agus cuí scrúdú a dhéanamh féachaint ar dhiúltaigh an Coimisiún rochtain go mícheart ar na doiciméid atá i gceist, trína fhreagra an 6 Iúil 2005 ar iarratas rochtana an ghearánaigh agus trína chinneadh an 2 Lúnasa 2005 ar iarratas daingniúcháin an ghearánaigh.

2 An diúltú maidir le rochtain a dheonú a bhfuil agóid á déanamh ina choinne

2.1 Bhain an gearán le diúltú an Choimisiúin rochtain a thabhairt, i gcomhréir le Rialachán (CE) Uimh. 1049/2001 ó Pharlaimint na hEorpa agus ón gComhairle an 30 Bealtaine 2001 maidir le rochtain phoiblí ar dhoiciméid ó Pharlaimint na hEorpa, ón gComhairle agus ón gCoimisiún(8) ("Rialachán 1049/2001"), ar na doiciméid seo a leanas: (i) litir dar dáta an 6 Eanáir 2004 ó Ard-Stiúrthóireacht an Fhuinnimh agus an Iompair chuig Buanionadaíocht na Danmhairge (TREN D/03/22884); (ii) litir dar dáta an 11 Meitheamh 2004 ó Ard-Stiúrthóireacht an Fhuinnimh agus an Iompair chuig Buanionadaíocht na Danmhairge (TREN D/04/8777); agus (iii) litir dar dáta an 15 Meán Fómhair 2004 ó Bhuanionadaíocht na Danmhairge chuig Ard-Stiúrthóireacht an Fhuinnimh agus an Iompair (TREN A/04/30692)(9). Líomhain an gearánach gur dhiúltaigh an Coimisiún rochtain ar na doiciméid atá i gceist go mícheart.

2.2 De réir an Choimisiúin, is éard a bhí sna doiciméid ar iarr an gearánach rochtain orthu comhfhreagras idir an Coimisiún agus údaráis na Danmhairge a rinneadh laistigh de chomhthéacs níos leithne Achainí 720/2002 a cuireadh faoi bhráid Pharlaimint na hEorpa agus a bhain le hinfheidhmeacht chúlghabhálach reachtaíocht Euratom. Chuir an Coimisiún in iúl don choiste freagrach de chuid na Parlaiminte nár mheas sé go bhféadfaí an reachtaíocht a chur i bhfeidhm go cúlghabhálach maidir leis an tréimhse réamhaontachais. Mar thoradh ar an Achainí, áfach, chuaigh an Coimisiún i dteagmháil leis an Danmhairg agus d’iarr sé faisnéis maidir le gníomhaíochtaí faireacháin comhshaoil na Danmhairge mar a leagtar amach in Airteagal 35 de Chonradh Euratom.

2.3 D'áitigh an Coimisiún go raibh an comhfhreagras ar iarr an gearánach rochtain air mar chuid de na réamhchomhairliúcháin a bhí riachtanach do ghníomhaíochtaí faireacháin an Choimisiúin. Forchoimeádann an Coimisiún an ceart freisin chun a áirithiú go n-urramófar an reachtaíocht maidir le cosaint ar radaíocht agus go ginearálta forálacha sábháilteachta sláinte Euratom. Dá bhrí sin, ba é a bhí sa mhalartú litreacha iarraidh ar fhaisnéis a rinneadh laistigh de phróiseas faireacháin a ceapadh chun comhlíonadh dhlí an Chomhphobail a fhíorú ag an am ábhartha agus a bhféadfadh seoladh nós imeachta um shárú maidir leis an gcás a bheith mar thoradh air. Is é is aidhm do sheoladh cuí na n-imeachtaí um shárú go háirithe ligean don Bhallstát lena mbaineann ceanglais an Chonartha a chomhlíonadh go deonach nó údar a thabhairt lena sheasamh. Tá feidhm níos mó fós ag an réasúnaíocht sin maidir le réamhchomhairliúcháin. Go deimhin, i bhfianaise íogaireacht pholaitiúil na saincheiste, is é sin, cosaint ar radaíocht, agus an gá atá leis an gcomhar idir an Coimisiún agus an Danmhairg a chosaint, bheadh nochtadh na ndoiciméad a iarradh ag an gcéim sin de na comhairliúcháin róluath agus bhainfí an bonn de chumas an Choimisiúin faireachán ceart ar chur i bhfeidhm dhlí an Chomhphobail a áirithiú. Thairis sin, laghdódh sé toilteanas údaráis na Danmhairge comhoibriú. Ar na cúiseanna thuas, cumhdaíodh na doiciméid atá i gceist leis an eisceacht a leagtar síos in Airteagal 4(2), an tríú fleasc, de Rialachán 1049/2001, ina sonraítear go "diúltóidhan institiúid rochtain ar dhoiciméad i gcás ina mbainfeadh nochtadh an bonn de chosaint na nithe seo a leanas: (...) cuspóir na gcigireachtaí, na n-imscrúduithe agus na n-iniúchtaí".

2.4 D’áitigh an Coimisiún freisin, fad nach bhfuil cinneadh déanta aige maidir le nós imeachta um shárú a thionscnamh i gcomhréir le hAirteagal 141 Euratom, atá coibhéiseach le hAirteagal 226 i gConradh CE, go mbainfeadh nochtadh na ndoiciméad lena mbaineann an bonn go mór den phróiseas cinnteoireachta leanúnach, mar a fhoráiltear in Airteagal 4(3), an chéad fhomhír, de Rialachán 1049/2001. Dá nochtfaí na doiciméid ag an gcéim sin de na himeachtaí, chuirfí brú seachtrach míchuí ar an gCoimisiún agus, dá bhrí sin, chuirfí bac ar shaormhalartú tuairimí laistigh den Choimisiún chomh maith le comhar le húdaráis na Danmhairge. Tá sé fíor-riachtanach do phróiseas cinnteoireachta na hinstitiúide gur féidir lena seirbhísí, saor ó thionchair sheachtracha, faisnéis a éileamh ó Bhallstát agus anailís a dhéanamh ar gach gné den staid a bhféadfadh tús a chur le nós imeachta foirmiúil um shárú a bheith mar thoradh air. Ní mór do sheirbhísí an Choimisiúin a bheith saor freisin chun smaointe agus tograí a chur ar aghaidh, gan a chur san áireamh go bhféadfaí a dtuairimí agus a measúnuithe a nochtadh don phobal. Ós rud é go mbaineann an próiseas cinnteoireachta le réamhghníomhaíochtaí faireacháin an Choimisiúin, tá feidhm ag an réasúnaíocht chéanna a luaitear i bpointe 1.3 thuas.

2.5 Ar deireadh, d’áitigh an Coimisiún nach bhféadfaí aon pháirt-rochtain faoi Airteagal 4(6) de Rialachán 1049/2001 a dheonú ag an gcéim sin de na himeachtaí gan an bonn a bhaint dá imscrúduithe agus an bonn a bhaint go mór dá phróiseas cinnteoireachta. Chuir sé in iúl freisin nár chuir an gearánach aon argóint ar aghaidh a léirigh go raibh leas sáraitheach poiblí ann maidir le nochtadh.

2.6 Ar bhonn thuairim an Choimisiúin, chinn an tOmbudsman go raibh gá le tuilleadh fiosrúchán. Thug an tOmbudsman dá haire argóint an Choimisiúin go raibh na litreacha ar iarradh rochtain orthu mar chuid de "phróiseas faireacháin" an Choimisiúin. Tagraíonn Airteagal 4(2), an tríú fleasc, de Rialachán 1049/2001, áfach, do chigireachtaí, d’imscrúduithe agus d’iniúchtaí, seachas do phróisis faireacháin. Thairis sin, leanann sé ó chásdlí(10) Chúirteanna an Chomhphobail gur gá na heisceachtaí a leagtar amach in Airteagal 4 a léirmhíniú go sriantach. I bhfianaise an mhéid sin, agus chun údar a thabhairt le cur i bhfeidhm Airteagal 4(2), an tríú fleasc, de Rialachán 1049/2001, iarradh ar an gCoimisiún an méid seo a leanas a mhíniú:

1. cén cineál iniúchta, imscrúdaithe nó iniúchta lenar bhain na litreacha iomchuí?,
2. conas a d’fhéadfadh nochtadh na litreacha an bonn a bhaint de chuspóir na cigireachta, an imscrúdaithe nó an iniúchta sin?, agus
3. cén ábharthacht atá ag Airteagal 4(3), an chéad fhomhír, de Rialachán 1049/2001 maidir leis na litreacha ón gCoimisiún an 6 Eanáir agus an 11 Meitheamh 2004, a seoladh chuig údaráis na Danmhairge?

2.7 Mar fhreagra ar fhiosrúcháin bhreise an Ombudsman, luaigh an Coimisiún gurb í an phríomhcheist sa chás ná ar cheart d'údaráis na Danmhairge é a chur ar an eolas faoi thorthaí an fhaireacháin ar an radaighníomhaíocht chomhshaoil sa Ghraonlainn, ionas gur féidir leis a chinneadh an mbeadh gníomhaíocht feabhais iomchuí anois sa limistéar inar tharla an timpiste i 1968. Ar dtús, d’iarr an Coimisiún faisnéis ar údaráis na Danmhairge ar an toimhde go raibh feidhm ag Conradh Euratom maidir leis an nGraonlainn (litir an 6 Eanáir 2004). D’fhreagair údaráis na Danmhairge trí fhacs an 30 Eanáir 2004, agus d’áitigh siad nach raibh feidhm ag Conradh Euratom maidir leis an nGraonlainn. I gceangal leis an teachtaireacht facs seo, sheol údaráis na Danmhairge tuarascáil maidir le ceartú an Chonartha ar an Aontas Eorpach. D’admhaigh an Coimisiún nach bhfuil feidhm ag Conradh Euratom maidir leis an nGraonlainn. An 11 Meitheamh 2004, d’iarr sí ar údaráis na Danmhairge an fhaisnéis a iarradh a sholáthar ar bhonn deonach.

2.8 Ina fhreagra, d’áitigh an Coimisiún freisin, tráth a d’iarr an gearánach rochtain ar an malartú litreacha idir an Coimisiún agus údaráis na Danmhairge, nach raibh sé soiléir fós an leanfadh an Coimisiún dá iarrachtaí faisnéis a fháil maidir leis an leibhéal radaighníomhaíochta sa Ghraonlainn. Dá bhrí sin, dhiúltaigh an Coimisiún an comhfhreagras le húdaráis na Danmhairge a nochtadh ionas nach gcuirfí na deiseanna comhair ar bhonn deonach i mbaol. Mheas an Coimisiún go laghdódh nochtadh, an tráth sin, toilteanas údaráis na Danmhairge an fhaisnéis a sholáthar ar bhonn deonach. Dá dtarlódh a leithéid, bhainfí an bonn de chuspóir an imscrúdaithe a bhí beartaithe ag an gCoimisiún a dhéanamh. Thairis sin, go dtí go ndéanfar cinneadh maidir leis an ngníomhaíocht atá le déanamh, dhéanfadh nochtadh difear tromchúiseach freisin do chumas an Choimisiúin cinneadh a dhéanamh bunaithe ar chomhthuiscint le húdaráis na Danmhairge. Ar na cúiseanna thuas, bhí an Coimisiún den tuairim gur chuir na heisceachtaí a leagtar amach in Airteagal 4(2), an tríú fleasc, agus in Airteagal 4(3), an chéad fhomhír, de Rialachán 1049/2001 cosc ar nochtadh an chomhfhreagrais le húdaráis na Danmhairge.

2.9 Shonraigh an Coimisiún ar deireadh, le himeacht ama, nach bhfuil feidhm a thuilleadh ag na cúiseanna leis na doiciméid a iarradh a choinneáil siar. Chuaigh an Coimisiún i gcomhairle le húdaráis na Danmhairge maidir leis an bhféidearthacht facs an 30 Eanáir 2004 ó Aireacht Gnóthaí Eachtracha na Danmhairge agus litir an 15 Meán Fómhair 2004 ó Bhuanionadaíocht na Danmhairge a nochtadh. Thug údaráis na Danmhairge a dtoiliú a gcuid den chomhfhreagras a nochtadh. Dá bhrí sin, tá an Coimisiún ag nochtadh anois an mhalartaithe iomláin litreacha le húdaráis na Danmhairge maidir le soláthar faisnéise a bhaineann leis an leibhéal radaighníomhaíochta sa Ghraonlainn.

2.10 Tugann an tOmbudsman an méid seo a leanas dá aire maidir le hinneachar na ndoiciméad atá i gceist. Ina litir dar dáta an 6 Eanáir 2004, mheabhraigh an Coimisiún, de réir Airteagal 36 de Chonradh Euratom, ‘gombunóidh gach Ballstát na saoráidí is gá chun faireachán leanúnach a dhéanamhar an leibhéal radaighníomhaíochta san aer, san uisce agus san ithir agus chun comhlíonadh na mbunchaighdeán a áirithiú.’Mheabhraigh an Coimisiún freisin, de réir Airteagal 36 de Chonradh Euratom, ‘go gcuirfidh na húdaráis iomchuí faisnéis in iúl go tréimhsiúil don Choimisiún maidir leis na seiceálacha dá dtagraítear in Airteagal 35 ionas go gcoinneofar ar an eolas é faoin leibhéal radaighníomhaíochta ar a bhfuil an pobal neamhchosanta.’ Chuir an Coimisiún údaráis na Danmhairge ar an eolas nach raibh aon fhaisnéis maidir le radaighníomhaíochtchomhshaoil a bhaineann leis an nGraonlainn i dtuarascálacha a cuireadh faoi bhráid an Choimisiúin roimhe seo maidir leis na gníomhaíochtaí faireacháin a leagtar amach in Airteagal 35 de Chonradh Euratom. D’áitigh an Coimisiún go raibh feidhm ag Conradh Euratom maidir leis an nGraonlainn agus d’iarr sé ar údaráis na Danmhairge na sonraí ábhartha don Ghraonlainn a tharchur chuici le haghaidh na tréimhse Eanáir 1994 go Nollaig 2002. Ina fhreagra an 30 Eanáir 2004(11), chuir údaráis na Danmhairge an Coimisiún ar an eolas nach bhfuil feidhm ag Conradh Euratom maidir leis an nGraonlainn. I litir dar dáta an 11 Meitheamh 2004, d’admhaigh an Coimisiún nach bhfuil feidhm ag Conradh Euratom maidir leis an nGraonlainn, agus d’iarr sé ar údaráis na Danmhairge neamhaird a dhéanamh den fhíoras go raibh an iarraidh ar fhaisnéis an 6 Eanáir 2004 bunaithe ar infheidhmeacht fhorálacha Chonradh Euratom maidir le críoch na Graonlainne. Ina ionad sin, d’iarr an Coimisiún ar údaráis na Danmhairge teacht ar chomhaontú maidir leis na sonraí ábhartha atá ar fáil don Ghraonlainn a sholáthar ar bhonn deonach. I litir dar dáta an 15 Meán Fómhair 2004, chuir údaráis na Danmhairge in iúl, ós rud é nach cuid den Chomhphobal í an Ghraonlainn, nach bhfuil sonraí ón gcríoch sin ábhartha do na tuarascálacha bliantúla faireacháin arna gcur ar fáil ag an gCoimisiún. Dá bhrí sin, d’iarr údaráis na Danmhairge ar an gCoimisiún míniú a thabhairt ar chúlra a iarrata chun faisnéis a fháil, ar bhonn deonach, maidir le sonraí faireacháin comhshaoil a bhaineann leis an nGraonlainn.

2.11 Meabhraíonn an tOmbudsman gur dhiúltaigh an Coimisiún rochtain a thabhairt ar na doiciméid atá i gceist ar bhonn Airteagal 4(2), an tríú fleasc, de Rialachán 1049/2001. D’áitigh an Coimisiún gur iarraidh ar fhaisnéis a bhí sa mhalartú litreacha a rinneadh i gcomhthéacs próisis faireacháin a ceapadh chun comhlíonadh dhlí an Chomhphobail a fhíorú agus a bhféadfadh seoladh nós imeachta um shárú i gcomhréir le hAirteagal 141 Euratom a bheith mar thoradh air. Foráiltear le hAirteagal 4(2), an tríú fleasc, de Rialachán 1049/2001 go ndiúltóidh an institiúid rochtain ar dhoiciméad i gcás ina mbainfeadh nochtadh an bonn de chosaint chuspóir na gcigireachtaí, na n-imscrúduithe agus na n-iniúchtaí. Tugann an tOmbudsman dá aire ó ábhar na ndoiciméad atá i gceist gur bhain iarraidh tosaigh an Choimisiúin ar fhaisnéis le sonraí radaighníomhaíochta a bhaineann leis an nGraonlainn agus mhol sé go bhféadfadh sé nár chomhlíon údaráis na Danmhairge a n-oibleagáidí faoi Airteagal 35 agus Airteagal 36 de Chonradh Euratom. Measann an tOmbudsman, áfach, tráth an iarratais ar rochtain, gur léir nach bhféadfadh nós imeachta um shárú faoi Chonradh Euratom a bheith mar thoradh ar an iarraidh ar fhaisnéis, ós rud é gur admhaigh an Coimisiún nach bhfuil feidhm ag Conradh Euratom maidir leis an nGraonlainn. Ina theannta sin, ina fhreagra ar fhiosrúcháin bhreise an Ombudsman, chuir an Coimisiún argóint ar fáil a bhí éagsúil leis an argóint a bhí ina fhreagra ar iarratas daingniúcháin an ghearánaigh. San argóint nua, mhaígh an Coimisiún go laghdódh nochtadh ag an am toilteanas údaráis na Danmhairge an fhaisnéis a sholáthar ar bhonn deonach, agus go mbainfeadh teagmhas den sórt sin "anbonn de chuspóir an imscrúdaithe, a raibh sé beartaithe ag an gCoimisiún é a dhéanamh ". Mar sin féin, agus é á chur san áireamh nach bhféadfadh aon nós imeachta um shárú a bheith ann faoi Chonradh Euratom maidir leis an ábhar, níor mhínigh an Coimisiún cén cineál imscrúdaithe (laistigh dá inniúlacht) dá ndearna sé tagairt ina fhreagra ar na fiosrúcháin bhreise. I bhfianaise an mhéid thuas, measann an tOmbudsman gur theip ar an gCoimisiún forais bhailí agus leordhóthanacha a thabhairt lena spleáchas ar an eisceacht dá bhforáiltear in Airteagal 4(2), an tríú fleasc, de Rialachán 1049/2001.

2.12 Meabhraíonn an tOmbudsman gur agair an Coimisiún freisin Airteagal 4(3), an chéad fhomhír, de Rialachán 1049/2001 mar fhorais lena dhiúltú rochtain a thabhairt ar na doiciméid atá i gceist. D’áitigh an Coimisiún go mbeadh an baol ann go gcuirfí mearbhall ar ghníomhaíochtaí faireacháin an Choimisiúin lena sheasamh oifigiúil in Achainí 720/2002 dá dtabharfaí rochtain ar na doiciméid lena mbaineann sula ndéanfaí aon chinneadh, rud a bhainfeadh an bonn go mór dá phróiseas cinnteoireachta leanúnach. Ina fhreagra ar fhiosrúcháin bhreise an Ombudsman, rinne an Coimisiún an ráiteas breise "godtí go ndéanfar cinneadh maidir leis an ngníomhaíocht atá le déanamh, go ndéanfadh nochtadh difear tromchúiseach freisin do chumas an Choimisiúin cinneadh a dhéanamh bunaithe ar chomhthuiscint le húdaráis na Danmhairge." Sonraítear sa chéad fhomhír d'Airteagal 4(3) de Rialachán 1049/2001 go ndiúltófar rochtain ar dhoiciméad, arna tharraingt suas ag institiúid le haghaidh úsáide inmheánaí nó arna fháil ag institiúid, a bhaineann le hábhar nach bhfuil cinneadh déanta ag an institiúid ina leith, dá mba rud é go mbainfeadh nochtadh an doiciméid an bonn go mór de phróiseas cinnteoireachta na hinstitiúide. Dar leis an Ombudsman, ní féidir litreacha an Choimisiúin chuig údaráis na Danmhairge a mheas go réasúnta mar dhoiciméid arna dtarraingt suas ag institiúid le haghaidh úsáid inmheánach. Dá bhrí sin, ní fhéadfadh feidhm a bheith ag an gcéad fhomhír d’Airteagal 4(3) de Rialachán 1049/2001 ach amháin maidir leis an litir dar dáta an 15 Meán Fómhair 2004 ó údaráis na Danmhairge. Mar sin féin, a mhéid is cosúil go mbaineann argóint an Choimisiúin maidir le rochtain a dhiúltú le cinneadh a d’fhéadfaí a dhéanamh amach anseo nós imeachta um shárú a sheoladh i gcomhréir le hAirteagal 141 Euratom, thángthas ar an gconclúid cheana féin, i bpointe 2.11 thuas, nach bhféadfadh aon chinneadh den sórt sin a bheith ann. Ina theannta sin, a mhéid a d’fhéadfadh an argóint sin tagairt a dhéanamh do chineál eile cinnidh, tá an tOmbudsman den tuairim go mbeadh an argóint sin róghinearálta, ós rud é nach bhfuil aon tagairt shonrach déanta ag an gCoimisiún do chineál eile cinnidh a d’fhéadfadh a bheith ann (laistigh dá inniúlacht). I bhfianaise an mhéid thuas, measann an tOmbudsman gur theip ar an gCoimisiún forais bhailí agus leordhóthanacha a thabhairt lena spleáchas ar an eisceacht dá bhforáiltear in Airteagal 4(2), an tríú fleasc, de Rialachán 1049/2001.

2.13 Ar bhonn na gconclúidí ar thángthas orthu i bpointe 2.11 agus i bpointe 2.12 thuas, measann an tOmbudsman nach raibh diúltú an Choimisiúin rochtain a thabhairt ar na doiciméid atá i gceist, ós rud é gur cuireadh an diúltú sin in iúl ina litreacha dar dáta an 6 Iúil 2005 agus dar dáta an 2 Lúnasa 2005 chuig an ngearánach, bunaithe ar fhorais bhailí agus leordhóthanacha. Is ionann sin agus cás drochriaracháin. Agus é á chur san áireamh nár thug an Coimisiún rochtain ar na doiciméid sin ach amháin i gcomhthéacs an fhiosrúcháin seo, déanfaidh an tOmbudsman ráiteas criticiúil ábhartha.

3 Conclúid

Ar bhonn fhiosrúcháin an Ombudsman ar an ngearán seo, is gá an ráiteas criticiúil seo a leanas a dhéanamh:

Dhiúltaigh an Coimisiún rochtain a thabhairt ar na doiciméid atá i gceist ar bhonn Airteagal 4(2), an tríú fleasc, agus Airteagal 4(3), an chéad fhomhír, de Rialachán 1049/2001. D’áitigh an Coimisiún gur bhain na doiciméid lena mbaineann le sonraí radaighníomhaíochta don Ghraonlainn a d’iarr sé i gcomhthéacs a fhíoraithe ar chomhlíontacht na Danmhairge le dlí an Chomhphobail. Chuir sé in iúl freisin go bhféadfadh seoladh nós imeachta um shárú, faoi Chonradh Euratom, a bheith mar thoradh ar an bpróiseas fíorúcháin sin. D’admhaigh an Coimisiún freisin, áfach, i ndáil leis sin, nach bhfuil feidhm ag Conradh Euratom maidir leis an nGraonlainn. Dá bhrí sin, ní fhéadfadh aon nós imeachta um shárú a bheith ann, faoi Chonradh Euratom, maidir leis an ábhar. Mar sin féin, níor mhínigh an Coimisiún cén cineál imscrúdaithe a d’fhéadfadh sé a dhéanamh nó cén cinneadh a d’fhéadfadh sé a dhéanamh, laistigh dá inniúlacht, i ndáil leis na doiciméid atá i gceist. I bhfianaise a bhfuil thuas, ní raibh diúltú an Choimisiúin rochtain a thabhairt ar na doiciméid sin, ós rud é gur cuireadh an diúltú sin in iúl ina litreacha an 6 Iúil 2005 agus an 2 Lúnasa 2005 chuig an ngearánach, bunaithe ar fhorais bhailí agus leordhóthanacha. B'ionann sin agus cás drochriaracháin.

Ós rud é go bhfuil rochtain tugtha ag an gCoimisiún anois ar na doiciméid atá i gceist, níl sé ábhartha réiteach cairdiúil ar an ábhar a shaothrú. Dá bhrí sin, dúnann an tOmbudsman an cás.

Cuirfear Uachtarán an Choimisiúin ar an eolas faoin gcinneadh sin freisin.

Le dea-mhéin,

 

P. Nikiforos DIAMANDOUROS

---

(1) IO 2001 L 145, lch. 43.

(2) Ina ghearán, luaigh an gearánach gur litir an 15 Meán Fómhair 2004 ó Ard-Stiúrthóireacht an Fhuinnimh agus an Iompair chuig údaráis na Danmhairge a bhí sa litir atá i gceist. Mar sin féin, is cosúil ó thuairim an Choimisiúin agus, ina dhiaidh sin, ó na doiciméid nochta gur litir ó údaráis na Danmhairge chuig an gCoimisiún í an litir atá i gceist. Níor cheistigh an gearánach an cheist seo le linn an fhiosrúcháin.

(3) "Diúltóidh na hinstitiúidí rochtain a thabhairt ar dhoiciméad i gcás ina mbainfeadh nochtadh an bonn de chosaint na nithe seo a leanas: (...) cuspóir na gcigireachtaí, na n-imscrúduithe agus na n-iniúchtaí, mura rud é go bhfuil leas sáraitheach poiblí ann maidir le nochtadh."

(4) Diúltófarrochtain ar dhoiciméad, arna tharraingt suas ag institiúid le haghaidh úsáide inmheánaí nó arna fháil ag institiúid, a bhaineann le hábhar nach ndearna an institiúid an cinneadh ina leith, más rud é go mbainfeadh nochtadh an doiciméid an bonn go mór de phróiseas cinnteoireachta na hinstitiúide, mura rud é go bhfuil leas sáraitheach poiblí ann maidir le nochtadh."

(5) IO 1996 L 159, lch. 1.

(6) "Mura gcumhdaítear ach codanna den doiciméad a iarradh le haon cheann de na heisceachtaí, scaoilfear na codanna eile den doiciméad."

(7) Beidh sé d'oibleagáid ar institiúidí agus ar chomhlachtaí an Chomhphobail aon fhaisnéis a d'iarr sé orthu a sholáthar don Ombudsman agus rochtain a thabhairt dó ar na comhaid lena mbaineann. Ní fhéadfaidh siad diúltú ach amháin ar fhorais chuí-réasúnaithe rúndachta. (...)".

(8) IO 2001 L 145, lch. 43.

(9) Ina ghearán, luaigh an gearánach gur litir an 15 Meán Fómhair 2004 ó Ard-Stiúrthóireacht an Fhuinnimh agus an Iompair chuig údaráis na Danmhairge a bhí sa litir atá i gceist. Mar sin féin, is cosúil ó thuairim an Choimisiúin agus, ina dhiaidh sin, ó na doiciméid nochta gur litir ó údaráis na Danmhairge chuig an gCoimisiún í an litir atá i gceist. Níor cheistigh an gearánach an cheist seo le linn an fhiosrúcháin.

(10) Féach, e.g., Cásanna Uamtha T-110/03, T-150/03 agus T-405/03 Sison v an Chomhairle [2005] ECR II-1429, mír 45.

(11) Cé nach raibh an litir seo clúdaithe ag an iarraidh ar rochtain, chuir an Coimisiún cóip di ar fáil ina fhreagra ar fhiosrúcháin bhreise an Ombudsman.