An gearán leis an gCoimisiún

1. I mí Aibreáin 2018, sheol an gearánach gearán maidir le sárú chuig an gCoimisiún inar cuireadh in iúl gur sháraigh a bhardas sa Spáinn an Coinbhinsiún Eorpach um Chearta an Duine (‘an Coinbhinsiún’).

2. Ina ghearán chuig an gCoimisiún, thagair an gearánach don fhíoras gur dhiúltaigh a bhardas arís agus arís eile agus go héagórach dá iarratais ar phost toisc nár labhair sé an teanga áitiúil. Luaigh an gearánach freisin gur thug sé an tsaincheist sin os comhair an Ombudsman réigiúnaigh agus os comhair na gcúirteanna náisiúnta.

3. Mheas an gearánach gur ghníomhaigh an riarachán áitiúil de shárú ar an gCoinbhinsiún [1] agus ar a chearta bunúsacha, agus idirdhealú á dhéanamh ina choinne mar gheall ar an teanga. Rinne sé gearán freisin faoi easpa rochtana ar cheartas agus faoi leigheasanna éifeachtacha os comhair údarás náisiúnta.

Freagra an Choimisiúin ar an ngearánach

4. An 29 Lúnasa 2018, thug an Coimisiún freagra ar an ngearánach, agus thug sé dá aire nár tháinig na saincheisteanna a d’ardaigh sé faoina inniúlachtaí toisc nár bhain siad le cur chun feidhme dhlí an Aontais. Mhínigh sé don ghearánach gur faoi na Ballstáit agus faoi na cúirteanna náisiúnta atá sé a áirithiú go n-urramófar cearta an duine.

5. Chuir an Coimisiún an gearánach ar an eolas faoin bhféidearthacht a ábhair imní a chur in iúl d’Ombudsman na Spáinne nó do na cúirteanna náisiúnta, agus don Chúirt Eorpach um Chearta an Duine, a luaithe a bheidh gach leigheas breithiúnach inmheánach ídithe aige.

6. Agus é míshásta le freagra na hinstitiúide, chuaigh an gearánach i dteagmháil leis an Ombudsman an 28 Meán Fómhair 2018.

Toradh an Ombudsman Eorpaigh

7. Thug an Coimisiún míniú soiléir don ghearánach ar a inniúlachtaí. Go deimhin, ní chumhdaítear saincheist an ghearánaigh le dlí an Aontais agus, mar thoradh air sin, níl aon bhunús ag an gCoimisiún le hidirghabháil a dhéanamh.

8. Thairis sin, chuir an Coimisiún faisnéis chabhrach ar fáil don ghearánach maidir leis an gCúirt Eorpach um Chearta an Duine agus Comhairle na hEorpa, na heagraíochtaí a bunaíodh leis an gCoinbhinsiún Eorpach um Chearta an Duine. Thug an Coimisiún comhairle úsáideach don ghearánach freisin maidir le conas leigheas a lorg ar an leibhéal náisiúnta.

9. Dá bhrí sin, measann an tOmbudsman [2] go bhfuil freagra an Choimisiúin ar an ngearánach cuimsitheach agus ceart. Ní raibh aon drochriarachán i gceist sa chás seo.

Lambros Papadias

Ceann Fiosrúcháin - Aonad 3

Strasbourg, 18/12/2018

[1] Eadhon, Airteagail 1, 6, 9, 10, 13, 14, 17 agus 18 den Choinbhinsiún Eorpach um Chearta an Duine. 

[2] Déileáladh leis an ngearán seo faoi láimhseáil cásanna tarmligthe, i gcomhréir le hAirteagal 11 den Chinneadh ón Ombudsman Eorpach lena nglactar Forálacha Cur Chun Feidhme