Il-każ kien jikkonċerna talba għal aċċess pubbliku għal ħames dokumenti miżmuma mill-Aġenzija tas-Sikurezza tal-Avjazzjoni tal-Unjoni Ewropea (EASA). Id-dokumenti kienu relatati ma’ valutazzjonijiet tar-riskju li jikkonċernaw ftit bdoti li l-liċenzji mhux tal-UE tagħhom kienu ġew ikkonvertiti għal liċenzji tal-UE minn awtorità nazzjonali kompetenti b’ċerti irregolaritajiet fil-proċess ta’ konverżjoni. L-EASA rrifjutat li tagħti aċċess għad-dokumenti mitluba, billi bbażat ruħha fuq l-eċċezzjoni għall-aċċess pubbliku li tikkonċerna l-protezzjoni tal-privatezza u l-integrità tal-individwi.

Fl-ilment lill-Ombudsman, l-ilmentatur speċifika li kien interessat biss f’dawk il-partijiet tad-dokumenti li wrew il-metodoloġija tal-valutazzjoni tar-riskju, mhux id-data personali. Wara li spezzjona l-verżjonijiet mhux redatti tad-dokumenti kontenzjużi, l-Ombudsman irrileva li kien possibbli għall-EASA li tiżvela biss il-partijiet li juru din il-metodoloġija.

Peress li l-EASA aċċettat il-pożizzjoni tal-Ombudsman u żvelat il-partijiet rilevanti tad-dokumenti mitluba, l-Ombudsman għalqet il-każ kif ġie solvut.

Il-każ jikkonċerna kif il-Kummissjoni Ewropea qed tittratta lment ta’ ksur kontra l-Irlanda dwar il-kundizzjonijiet għat-trasport ta’ għoġġiela żgħar li għadhom fuq dieta tal-ħalib. L-ilmentatur qies li ż-żmien meħud mill-Kummissjoni biex tittratta l-ilment ta’ ksur ma kienx raġonevoli.

L-Ombudsman sabet li l-Kummissjoni qed issegwi s-sitwazzjoni mill-qrib. L-investigazzjoni għadha għaddejja, u kien hemm komunikazzjoni kontinwa u regolari u laqgħat bejn il-Kummissjoni u l-awtoritajiet nazzjonali dwar il-kwistjoni.

Għalhekk, l-Ombudsman għalqet l-investigazzjoni bil-konklużjoni li ma kien hemm l-ebda amministrazzjoni ħażina.

Il-każ kien jikkonċerna talba għal aċċess pubbliku għall-opinjoni tal-Bord tal-Iskrutinju Regolatorju (RSB) dwar l-abbozz tar-rapport tal-valutazzjoni tal-impatt tal-Kummissjoni rigward l-inizjattiva leġiżlattiva tagħha dwar is-Servizzi ta’ Mobbiltà Diġitali Multimodali (MDMS) minn Settembru 2023. Il-Kummissjoni rrifjutat l-aċċess għad-dokument kollu kemm hu, billi argumentat li l-iżvelar idgħajjef il-proċess tat-teħid tad-deċiżjonijiet tagħha li għaddej bħalissa.

Wara l-ispezzjoni tad-dokument mitlub mit-tim ta’ inkjesta tagħha, l-Ombudsman ma kinitx konvinta li l-iżvelar tiegħu kien se jaffettwa serjament, itawwal jew jikkumplika t-tlestija tal-valutazzjoni tal-impatt u l-adozzjoni tal-proposti leġiżlattivi tal-Kummissjoni. Minħabba l-ġurisprudenza ċara li tirrikjedi li l-istituzzjonijiet tal-UE japplikaw standard partikolarment għoli ta’ trasparenza għad-dokumenti leġiżlattivi, l-Ombudsman kienet tal-fehma li r-raġunament tal-Kummissjoni kien insuffiċjenti u li ma kienx iġġustifikat fl-applikazzjoni tal-eċċezzjoni għall-protezzjoni tat-teħid ta’ deċiżjonijiet kontinwu tagħha. Għalhekk, hija qieset li r-rifjut tal-Kummissjoni li tagħti aċċess pubbliku għad-dokument, anki parzjalment, kien jikkostitwixxi amministrazzjoni ħażina.

Sadanittant, il-Kummissjoni ppubblikat il-proposti leġiżlattivi tagħha fir-rigward tal-“Pakkett tal-Passiġġieri”, akkumpanjat minn Dokument ta’ Ħidma tal-Persunal li fih il-valutazzjoni tal-impatt riveduta. Id-Dokument ta’ Ħidma tal-Persunal jirriproduċi l-kontenut tal-opinjoni tal-RSB ta’ Settembru 2023 u jinkludi ħarsa ġenerali lejn kif il-Kummissjoni tat effett lill-osservazzjonijiet tal-RSB. Peress li l-kontenut tal-opinjoni tal-RSB inkwistjoni issa huwa pubbliku u li l-Kummissjoni ppubblikat il-proposti leġiżlattivi tagħha, l-Ombudsman qieset li l-fatt li ssir rakkomandazzjoni lill-Kummissjoni ma jservix skop utli u għalqet il-każ.

Il-każ kien jikkonċerna kif il-Kummissjoni Ewropea ttrattat ilment ta’ ksur kontra n-Netherlands, fir-rigward tal-leġiżlazzjoni Netherlandiża dwar il-vetturi elettriċi ħfief. L-ilmentatur kien imħasseb li ma kellu l-ebda aġġornament mill-Kummissjoni f’aktar minn sentejn.

Filwaqt li l-inkjesta kienet għadha għaddejja, il-Kummissjoni għalqet il-każ. Madankollu, l-Ombudsman sabet li l-Kummissjoni naqset milli turi li kienet ittrattat il-każ b’mod attiv u diliġenti. B’mod partikolari, il-Kummissjoni naqset milli tipprovdi ġustifikazzjoni konvinċenti għad-dewmien fit-trattament ta’ każ li, meta jitqiesu r-raġunijiet mogħtija biex jingħalaq il-każ, kellu jkun ċar mill-bidu nett. L-Ombudsman qieset li dan kien jikkostitwixxi amministrazzjoni ħażina. Madankollu, peress li l-Kummissjoni minn dak iż-żmien ’l hawn irrikonoxxiet u skużat ruħha għad-dewmien fl-għeluq tal-każ, u b’mod parallel impenjat ruħha li ttejjeb il-komunikazzjoni tagħha mal-ilmentaturi, l-Ombudsman qieset li l-ebda skop ma jkun moqdi billi tagħmel rakkomandazzjoni.