L-Ombudsman Ewropew tista’ teżamina lmenti minn membri tal-persunal tal-amministrazzjoni tal-UE. Madankollu, l-Ombudsman ma għandhiex is-setgħa li tibdel deċiżjoni meħuda mill-amministrazzjoni.

Qabel ma jirrikorri għall-Ombudsman, il-membru tal-persunal inkwistjoni jeħtieġlu li jkun għamel użu sħiħ mill-proċedura tal-ilmenti amministrattivi interni applikabbli. Għall-biċċa l-kbira tal-każijiet, il-proċedura hija dik stabbilita fl-Artikolu 90 tar-Regolamenti tal-Persunal tal-UE.

Madankollu, jekk istituzzjoni, korp, organizzazzjoni jew aġenzija tal-UE sempliċiment tkun naqset milli twieġeb għal talba għal informazzjoni minn membru tal-persunal, l-Ombudsman tista’ tissuġġerixxi lill-amministrazzjoni li twieġeb, anke jekk ma tkunx intużat il-proċedura tal-ilmenti interni.

L-amministrazzjoni tal-UE għandha diskrezzjoni wiesgħa dwar kif torganizza r-riżorsi umani tagħha u tevalwa l-prestazzjoni tal-persunal. Bħala tali, l-Ombudsman normalment tiftaħ inkjesta dwar ilment tal-persunal jekk ikun hemm indikazzjoni ta’ żbalji ċari possibbli fil-valutazzjoni jew ta’ nuqqasijiet proċedurali jew sistemiċi serji biss.

L-Ombudsman għandha rwol formali fl-iżgurar li l-amministrazzjoni tal-UE tikkonforma mad-dispożizzjonijiet tal-Konvenzjoni dwar id-Drittijiet ta’ Persuni b’Diżabilità (CRPD). L-Ombudsman għandu wkoll rwol fl-iżgurar li l-amministrazzjoni tal-UE tikkonforma mal-obbligi tagħha rigward il-proċeduri kontra l-fastidju.