Bhain an cás le hiarraidh ar rochtain phoiblí ar thuairim an Bhoird um Ghrinnscrúdú Rialála (RSB) maidir le dréacht-tuarascáil an Choimisiúin ar an measúnú tionchair i ndáil lena thionscnamh reachtach maidir le Seirbhísí Soghluaisteachta Digití Ilmhódúla (MDMS) ó mhí Mheán Fómhair 2023. Dhiúltaigh an Coimisiún rochtain ar an doiciméad ina iomláine, agus d’áitigh sé go mbainfeadh nochtadh an bonn dá phróiseas cinnteoireachta leanúnach.

Tar éis dá foireann fiosrúcháin iniúchadh a dhéanamh ar an doiciméad a iarradh, ní raibh an tOmbudsman cinnte go mbeadh tionchar tromchúiseach, fadaithe nó casta ag a nochtadh ar chur i gcrích an mheasúnaithe tionchair agus ar ghlacadh thograí reachtacha an Choimisiúin. I bhfianaise an chásdlí shoiléir lena gceanglaítear ar institiúidí AE caighdeán trédhearcachta an-ard a chur i bhfeidhm maidir le doiciméid reachtacha, bhí an tOmbudsman den tuairim nach raibh réasúnaíocht an Choimisiúin leordhóthanach agus nach raibh údar maith leis an eisceacht a chur i bhfeidhm maidir lena chinnteoireacht leanúnach a chosaint. Dá bhrí sin, mheas sí gurbh ionann diúltú an Choimisiúin rochtain phoiblí a thabhairt ar an doiciméad, fiú i bpáirt, agus drochriarachán.

Idir an dá linn, d’fhoilsigh an Coimisiún a thograí reachtacha maidir leis an ‘bPacáiste Paisinéirí’, a raibh Doiciméad Inmheánach Oibre ag gabháil leo ina raibh an measúnú tionchair athbhreithnithe. Atáirgtear sa Doiciméad Inmheánach Oibre ábhar thuairim an Bhoird um Ghrinnscrúdú Rialála i mí Mheán Fómhair 2023 agus áirítear ann forléargas ar an gcaoi ar thug an Coimisiún éifeacht do bharúlacha an Bhoird um Ghrinnscrúdú Rialála. Ós rud é go bhfuil ábhar thuairim an Bhoird um Ghrinnscrúdú Rialála atá i gceist poiblí anois agus gur fhoilsigh an Coimisiún a thograí reachtacha, mheas an tOmbudsman nach mbeadh sé úsáideach moladh a dhéanamh don Choimisiún agus dhún sí an cás.

Bhain an cás leis an gcaoi ar láimhseáil an Coimisiún Eorpach gearán maidir le sárú i gcoinne na hÍsiltíre, maidir le reachtaíocht na hÍsiltíre i ndáil le feithiclí leictreacha éadroma. Bhí imní ar an ngearánach nach raibh aon nuashonrú faighte aige ón gCoimisiún le breis agus dhá bhliain.

Cé go raibh an fiosrúchán ar siúl, dhún an Coimisiún an cás. Chinn an tOmbudsman, áfach, gur theip ar an gCoimisiún a léiriú gur láimhseáil sé an cás go gníomhach agus go dícheallach. Go háirithe, níor thug an Coimisiún údar diongbháilte leis an moill ar dhéileáil le cás ar cheart dó a bheith soiléir ón tús, agus na cúiseanna a tugadh leis an gcás a dhúnadh á gcur san áireamh. Mheas an tOmbudsman gurbh ionann sin agus drochriarachán. Mar sin féin, ós rud é gur admhaigh agus gur ghabh an Coimisiún leithscéal as an moill agus an cás á dhúnadh aige, agus go bhfuil gealltanas tugtha aige ag an am céanna feabhas a chur ar a chumarsáid le gearánaigh, mheas an tOmbudsman nach bhfónfaí d’aon chuspóir trí mholadh a dhéanamh.