D’éirigh leis an ngearánach sa chomórtas a lean an glao ar léiriú spéise EPSO/CAST/RELEX/3/08 (an ‘Glao’). Ba é cuspóir an Ghlao bunachar sonraí d'iarrthóirí oiriúnacha a chur ar bun lena n-earcú chuig toscaireachtaí an Choimisiúin chuig tríú tíortha agus chuig toscaireachtaí chuig eagraíochtaí idirnáisiúnta. Sa litir inar cuireadh in iúl don ghearánach gur cuireadh a ainm ar an mbunachar sonraí, luaigh EPSO go mbeadh sé incháilithe d’earcú ag institiúidí, oifigí agus gníomhaireachtaí an Aontais. Thairis sin, d’earcaigh comhlachtaí eile seachas toscaireachtaí roinnt iarrthóirí ón mbunachar sonraí.

Bhí an gearánach á earcú ag gníomhaireacht de chuid an Aontais nuair a chuir an Coimisiún in iúl do na gníomhaireachtaí uile nach raibh siad in ann iarrthóirí a earcú ón mbunachar sonraí atá i gceist. Mheas sé gur sárú é sin ar phrionsabal na córa comhionainne agus chuaigh sé i muinín an Ombudsman Eorpaigh.

Le linn an fhiosrúcháin, dúirt an Coimisiún go n-osclódh sé an bunachar sonraí do chomhlachtaí AE seachas toscaireachtaí faoi choinníollacha áirithe. Fuair an gearánach amach ar deireadh ó fhoinse eile agus chuir sé in iúl don Ombudsman gur oscail an Coimisiún é gan aon srian. Dá bhrí sin, mheas an tOmbudsman gur shocraigh an Coimisiún an t-ábhar.

Mar sin féin, rinne sé dhá ráiteas eile. Ba iad sin gur cheart don Choimisiún an méid seo a leanas a dhéanamh: (i) sa todhchaí, faisnéis a sholáthar dó atá ábhartha go soiléir maidir le toradh fiosrúcháin leanúnaigh; agus (ii) na hiarrthóirí uile ar an mbunachar sonraí a chur ar an eolas go bhfuil sé ar oscailt anois d’institiúidí, oifigí agus gníomhaireachtaí uile an Aontais.

Baineann an cás seo le nósanna imeachta na Gníomhaireachta Leigheasra Eorpaí chun cinneadh a dhéanamh ar cheart oibleagáid a bheith ar chuideachtaí cógaisíochta staidéir a dhéanamh chun imscrúdú a dhéanamh ar cé acu a d’fhéadfaí nó nach bhféadfaí a dtáirge a úsáid chun cóir leighis a chur ar leanaí agus conas a d’fhéadfaí é a úsáid. Is é is aidhm do na nósanna imeachta sin, a dhíorthaítear ó Rialachán Péidiatraiceach an Aontais, feabhas a chur ar infhaighteacht táirgí íocshláinte do leanaí. Cé go mbunaítear riail ghinearálta leis an Rialachán nach mór do chuideachtaí cógaisíochta staidéir a dhéanamh chun a chinneadh an bhféadfaí a dtáirge a úsáid chun cóir leighis a chur ar leanaí agus conas a d’fhéadfaí é a úsáid, ceadaítear don Ghníomhaireacht an oibleagáid sin a tharscaoileadh i gcásanna áirithe.

D'áitigh na gearánaigh go raibh an Ghníomhaireacht mícheart diúltú dá n-iarratas ar tharscaoileadh dá ndruga (candesartan), a úsáidtear chun cliseadh croí a chóireáil. Thug siad dá n-aire gur dheonaigh an Ghníomhaireacht tarscaoileadh do dhá tháirge chomhchosúla (losartan agus valsartan) agus líomhain siad gur sháraigh an diúltú tarscaoileadh a dheonú dóibh prionsabal na córa comhionainne, nach raibh sé oibiachtúil ná cothrom, agus nach raibh sé réasúnaithe.

Chinn an tOmbudsman go raibh an Ghníomhaireacht i dteideal tarscaoileadh a dhiúltú do candesartan. Chinn sé, áfach, (i) gur theip ar an nGníomhaireacht trédhearcacht leordhóthanach a áirithiú maidir leis an bpróiseas trínar tháinig sí ar a cinntí agus mar thoradh air sin (ii) nár thug sí cúiseanna leordhóthanacha leis na cinntí sin.

Chun fadhbanna comhchosúla a sheachaint amach anseo, rinne an tOmbudsman dréachtmholadh, ag iarraidh ar an nGníomhaireacht bearta a ghlacadh chun a cuid oibre sa réimse seo a dhéanamh níos trédhearcaí. Chomhaontaigh an Ghníomhaireacht, agus leag sí amach na tionscnaimh a bhí déanta aici cheana féin agus na tionscnaimh atá ar na bacáin. D'fháiltigh an tOmbudsman roimh na bearta seo, rud a chabhródh le fadhbanna den chineál céanna a sheachaint agus le muinín níos mó fós a chothú i measc na saoránach in obair na Gníomhaireachta.