D’iarr an tOmbudsman Eorpach, Emily O’Reilly, ar Chomhairle an Aontais Eorpaigh páirt a ghlacadh i gClár Trédhearcachta ionadaithe leasa an Aontais. Mhol sí freisin don Choimisiún Eorpach sampla Pharlaimint na hEorpa (PE) a leanúint maidir le dreasachtaí i bhfad níos láidre a thabhairt isteach do bhrústocairí clárú. Tagann sé sin sna sála ar vóta an lae inné maidir le Clár Trédhearcachta athbhreithnithe i bParlaimint na hEorpa.

Dúirt Emily O'Reilly: “Tá ról tábhachtach ag an mbrógaireacht i ndaonlathais fheidhmiúla. Mar sin féin, leanfaidh gnáthshaoránaigh a bhfuil leas acu sna hábhair sin de bheith faoi bhrú maidir leis an bhfáth nach dtacaíonn an tAontas, ar bhealach níos dírí, lena gceart fios a bheith acu cé na leasanna atá ag déanamh brústocaireachta ar institiúidí an Aontais agus cad iad na cuspóirí atá leis sin. Ós rud é nach gcomhlíonann an clár deonach atá ann faoi láthair an ról sin go leordhóthanach, ba cheart fiacla a thabhairt dó. Mar shampla, d’fhéadfadh an Coimisiún treoir a thabhairt dá oifigigh gan beartas a phlé le brústocairí neamhchláraithe. Ina theannta sin, chun go mbeidh sí éifeachtach, ba cheart don Chomhairle páirt a ghlacadh sa chlár toisc go bhfuil sí ar cheann de na príomhinstitiúidí cinnteoireachta san Aontas. D’fhéadfaí na bearta sin a dhéanamh anois, gan fanacht go mbeadh an clár éigeantach.”

Dreasachtaí i bhfad níos láidre ag teastáil ó bhrústocairí chun clárú

Tá an Clár Trédhearcachta á reáchtáil go comhpháirteach ag Parlaimint na hEorpa agus ag an gCoimisiún. Tá thart ar 6,500 eagraíocht páirteach ann. Mar sin féin, ní mheasann go leor brústocairí gur fiú a gcuid ama a chlárú.

Ina tuarascáil, iarrann Parlaimint na hEorpa bearta dreasachta chun brústocairí a spreagadh chun an clár a shíniú, lena n-áirítear, mar shampla, rochtain ar áitreabh PE a shrianadh d’eagraíochtaí neamhchláraithe. Iarrann an Pharlaimint freisin ar an gCoimisiún bearta comhchosúla a ghlacadh.

Déileálann an tOmbudsman go rialta le gearáin faoin gClár Trédhearcachta, e.g. faoi fhaisnéis a líomhnaítear a bheith míchruinn a thugtar ar an gclár. Sa chomhthéacs sin, d’iarr sí ar an gCoimisiún feabhas a chur ar fhaireachán agus ar inchomparáideacht na sonraí sa chlár. Mhol sí freisin go gcuirfeadh an Coimisiún brústocairí agus ionadaithe sainleasa eile a mbuaileann sé leo ar an eolas go córasach faoin rún atá aige a n-ainmneacha a scaoileadh, dá ndéanfaí iarrataí ar rochtain phoiblí faoina ngníomhaíochtaí brústocaireachta.