D’iarr an tOmbudsman Eorpach, P. Nikiforos Diamandouros, ar an gCoimisiún Eorpach a áirithiú go gcuirfear an ceart chun dea-riaracháin san áireamh i nósanna imeachta airgeadais an Aontais. I seimineár maidir leis an athchóiriú atá le teacht ar Rialachán Airgeadais an Aontais, leag sé béim ar a thábhachtaí atá sé ualaí riaracháin nach bhfuil gá leo a laghdú do ghnólachtaí, d’eagraíochtaí neamhrialtasacha, d’eagraíochtaí agus do chonraitheoirí eile, chomh maith lena gceart go gcaithfí go cothrom leo a urramú.

Tharraing an tOmbudsman aird freisin ar a fhiosrúchán leanúnach ar fhadhbanna an Choimisiúin maidir le híocaíochtaí déanacha. Ag fógairt obair leantach ar a chomhairliúchán poiblí ar an ábhar, dúirt an tUasal Diamandouros: "De réir na ranníocaíochtaí a fuaireamar, cuireann maorlathas iomarcach, easpa comhordaithe agus rialacha dolúbtha le fadhbanna leanúnacha maidir le híocaíochtaí déanacha. Iarraim ar an gCoimisiún leas a bhaint as an athchóiriú atá ar na bacáin ar an Rialachán Airgeadais chun dul i ngleic leis an tsaincheist go córasach.”

Athchóiriú ar rialacha an Aontais maidir le tionscadail agus cláir a fhaigheann maoiniú ón Aontas

An 28 Bealtaine, thíolaic an Coimisiún Eorpach a thogra chun Rialachán Airgeadais an Aontais a athchóiriú. Scrúdóidh Parlaimint na hEorpa agus an Chomhairle an togra anois. D'fhógair an Coimisiún gur cheart go mbeadh an Rialachán Airgeadais nua ag feidhmiú faoi 2012.

Dhéileáil an tOmbudsman le líon mór gearán ó ghnólachtaí, ó eagraíochtaí neamhrialtasacha agus ó dhaoine aonair, atá nasctha leis an Rialachán. Bunaithe ar an taithí sin, mhol sé bearta a ceapadh chun rannchuidiú le hualaí riaracháin a laghdú, faisnéis níos fearr faoi leigheasanna dlí d’iarratasóirí agus cearta feabhsaithe d’fhochonraitheoirí. Ina theannta sin, mhol an tOmbudsman go n-áireofaí sa Rialachán Airgeadais athbhreithnithe foráil shainráite maidir le híocaíochtaí ex gratia chun roinnt cásanna de dhrochriarachán tromchúiseach a leigheas. Mhol sé freisin gur cheart an ceart nua chun dea-riaracháin a áirítear sa Chairt um Chearta Bunúsacha a chur san áireamh sna rialacha maidir le haisghabháil suimeanna a íocadh go míchuí a tharscaoileadh.

Tá moltaí an Ombudsman maidir le hathchóiriú an Rialacháin Airgeadais ar fáil ag:

http://www.ombudsman.europa.eu/resources/otherdocument.faces/en/4957/html.bookmark

Fadhbanna an Choimisiúin maidir le híocaíochtaí déanacha

Bunaithe ar líon suntasach gearán, tá imscrúdú á dhéanamh ag an Ombudsman faoi láthair ar mhoilleanna an Choimisiúin ar íocaíochtaí le haghaidh tionscadail nó cláir de chuid an Aontais. I mí Eanáir 2010, sheol sé comhairliúchán poiblí ar an gceist sin. De réir na bhfreagraí a fuarthas, d’fhéadfadh íocaíochtaí déanacha a bheith ina bhfadhb shistéamach sa Choimisiún. Cuirtear i dtábhacht go sonrach sna haighneachtaí a cuireadh isteach easpa comhordaithe agus maorlathas iomarcach sa Choimisiún mar chúiseanna le moilleanna. D’iarr an tOmbudsman ar an gCoimisiún anois barúil a thabhairt ar na ranníocaíochtaí sin, faisnéis cothrom le dáta a chur ar fáil faoi íocaíochtaí déanacha agus bearta a rinneadh chun na fadhbanna sin a laghdú a chur in iúl.

Tá na doiciméid ábhartha uile a bhaineann leis an imscrúdú seo ar fáil ag:

http://www.ombudsman.europa.eu/cases/correspondence.faces/en/4955/html.bookmark