Chuir an tOmbudsman Eorpach, P. Nikiforos Diamandouros, fáilte roimh chinneadh an Choimisiúin Eorpaigh cás a bhaineann le ranníocaíochtaí pinsin a shocrú. Fuair an gearánach amach gur theip ar an gCoimisiún a ranníocaíochtaí a íoc le hOifig Slándála Sóisialta na Beilge (ONSS) sna 1960idí nuair a d’oibrigh sé mar ghníomhaire cúnta. Cé gur áitigh an Coimisiún gur stop sé de ranníocaíocht phearsanta a asbhaint ó thuarastal an ghearánaigh le linn na tréimhse atá faoi chonspóid, d’admhaigh sé freisin nach raibh na taifid aige a thuilleadh chun é sin a chruthú. De réir an Ombudsman: "Leagtar béim sa chás seo ar a thábhachtaí atá sé go gcoinneodh na hinstitiúidí taifid leordhóthanacha. Sa chás go sáraítear príomhphrionsabal an dea-riaracháin, iarrfaidh mé ar an institiúid an fhadhb a réiteach i bhfabhar an tsaoránaigh. Táim sásta go n-aontaíonn an Coimisiún é sin a dhéanamh sa chás seo."

D'iompaigh an gearánach chuig an Ombudsman tar éis dó a fháil amach nár íoc an Coimisiún a ranníocaíochtaí pinsin leis an ONSS do na blianta 1967 agus 1968. Mhaígh sé gur cheart dó a aithint go raibh sé d’oibleagáid air é a árachú faoi scéim pinsin na Beilge ar feadh na tréimhse iomláine a d’oibrigh sé di. D’áitigh an Coimisiún gur stop sé de ranníocaíocht phearsanta a asbhaint ó thuarastal an ghearánaigh le linn an ama sin. Mar sin féin, ós rud é nach raibh na taifid íocaíochta ábhartha aige a thuilleadh, níorbh fhéidir leis é sin a chruthú.

D'áitigh an tOmbudsman go n-éilíonn prionsabail an dea-riaracháin go gcoinneofaí taifid a bhaineann le teidlíochtaí pinsin go hiontaofa thar thréimhsí fada ama chun a chinntiú gur féidir le daoine aonair leas a bhaint as na sochair atá tuillte acu. Ós rud é nár éirigh leis an gCoimisiún é sin a dhéanamh sa chás seo, d’iarr sé air an t-ábhar a réiteach. Ghlac an Coimisiún le moladh an Ombudsman agus chuaigh sé i dteagmháil leis an ngearánach chun obair leantach a dhéanamh ar an gcás. Ghabh an gearánach buíochas leis an Ombudsman as a chuid oibre.

D'oibrigh an gearánach mar ghníomhaire cúnta sa Choimisiún ó Iúil 1965 go Nollaig 1968. In 2002, chuir Oifig Náisiúnta Pinsean na Beilge in iúl dó nár íoc an Coimisiún a ranníocaíochtaí pinsin do na blianta 1967 agus 1968. Mar gheall air sin, bhí fadhbanna aige leis an eagraíocht náisiúnta árachais ábhartha maidir lena theidlíochtaí pinsin. Chuaigh an gearánach i dteagmháil leis an gCoimisiún, a chuir in iúl dó, de réir a chuid taifead, go raibh sé cláraithe faoi scéim árachais shaorálaigh de chuid na Gréige le linn na tréimhse atá faoi chonspóid agus nár íocadh aon ranníocaíochtaí le ONSS tar éis mhí Mheán Fómhair 1966 dá bhrí sin.

Is féidir teacht ar chinneadh an Ombudsman ar a shuíomh gréasáin, ag an seoladh seo a leanas: