A Uachtaráin, a chara,

Tá gearán faighte agam i gcoinne an Choimisiúin Eorpaigh. Baineann an gearán le mainneachtain an Choimisiúin teachtaireachtaí téacs a choinneáil (agus rochtain phoiblí a thabhairt orthu) a mhalartaigh tú le ceann cuideachta cógaisíochta i gcomhthéacs na caibidlíochta maidir le vacsaíní COVID-19. Go sonrach, tá imní ar an ngearánach go bhféadfadh sé gur scrios an Coimisiún na teachtaireachtaí téacs tar éis do roinnt daoine den phobal rochtain orthu a iarraidh cheana féin.

Tá cinneadh déanta agam gan fiosrúchán a oscailt faoin ngearán seo.

D’fhéach m’Oifig cheana féin ar dhiúltú an Choimisiúin rochtain phoiblí a thabhairt ar na teachtaireachtaí téacs atá i gceist (cás 1316/2021/MIG).[1] I gcomhthéacs an fhiosrúcháin sin, chinn m’Oifig go raibh drochriarachán déanta ag an gCoimisiún, toisc nach ndearna sé cuardach cuí chun na teachtaireachtaí téacs a shainaithint.[2] Go sonrach, agus é ag déileáil leis an iarraidh ar rochtain, d’iarr an Coimisiún ar d’Oifig phríobháideach (Cabinet) gan ach doiciméid a chomhlíonann critéir taifeadta an Choimisiúin a chuardach. Nuair nár shainaithin do Chomh-Aireacht aon teachtaireacht téacs, níor cheistigh an Coimisiún an toradh sin, in ainneoin agallamh leis na meáin inar thagair tú do theachtaireachtaí téacs ábhartha.

Tar éis fhiosrúchán an Ombudsman, thug iarratasóir eile a fuair an freagra céanna ón gCoimisiún agus a fuair an gearánach i gcás 1316/2021/MIG diúltú an Choimisiúin rochtain phoiblí a thabhairt ar na teachtaireachtaí téacs sin os comhair na Cúirte Ginearálta. Chuir an Chúirt Ghinearálta cinneadh daingniúcháin an Choimisiúin[3] ar neamhní, agus chinn sí nár sholáthair an Coimisiún mínithe inchreidte chun údar a thabhairt le neamhshealbhú (líomhnaithe) na dteachtaireachtaí téacs a iarradh.

Tuigim go bhfuil cinneadh daingniúcháin nua glactha ag an gCoimisiún anois maidir le hiarraidh rochtana an iarratasóra, á rá go ndearna sé cuardach athnuaite ar theachtaireachtaí téacs a d’fhéadfadh a bheith ann, ach nár tháinig aon torthaí as an gcuardach sin. I measc cúiseanna eile, luaigh an Coimisiún nár coinníodh na teachtaireachtaí téacs, a bhí ann roimhe seo, bunaithe ar mheasúnú ó Cheann Comh-Aireachta an Uachtaráin, a tháinig ar an gconclúid, i samhradh 2021, go raibh a n-ábhar ‘gearrshaolach’ agus ‘nach raibh aon obair leantach ag teastáil ina leith’.

I bhfianaise an chinnidh daingniúcháin nua sin, tá imní ar an ngearánach sa chás seo go bhféadfadh sé gur scrios an Coimisiún na teachtaireachtaí téacs tar éis do roinnt daoine den phobal rochtain phoiblí orthu a iarraidh cheana féin.

Ba mhaith liom cinneadh a rinne an tOmbudsman roimhe seo a mheabhrú, ina luaitear, ‘mar riail ghinearálta, nár cheart d’institiúid, do chomhlacht, d’oifig nó do ghníomhaireacht de chuid an Aontais doiciméad atá faoi réir iarraidh ar rochtain phoiblí a scriosadh go dtí go mbeidh an próiseas chun agóid a dhéanamh i gcoinne diúltú rochtain a dheonú curtha i gcrích. Leis an doiciméad atá idir lámha, is féidir athbhreithniú cuí a dhéanamh ar an diúltú, lena n-áirítear athbhreithniú a dhéanann an tOmbudsman Eorpach agus/nó Cúirt Bhreithiúnais an Aontais Eorpaigh.’ [4]

Chinn mé scrúdú a dhéanamh ar an tsaincheist thábhachtach a d’ardaigh an gearánach i gcomhthéacs m’fhiosrúcháin ar chás 2482/2025/NH, a d’oscail mé inniu. Dá bhrí sin, ní osclóidh mé fiosrúchán ar leith ar an ngearán seo, ar na cúiseanna a leagtar amach i mo chinneadh, a gheobhaidh tú i gceangal leis seo.

Ar deireadh, is oth liom nár roinneadh an fhaisnéis atá anois i gcinneadh daingniúcháin nua an Choimisiúin, a glacadh tar éis bhreithiúnas na Cúirte Ginearálta i gCás T-36/23, leis an Ombudsman i gcomhthéacs an fhiosrúcháin ar chás 1316/2021/MIG.

Tabhair faoi deara gur roinneadh an litir seo leis an ngearánach agus go bhfoilseofar í ar shuíomh gréasáin an Ombudsman.

Le dea-mhéin,

Teresa Anjinho An tOmbudsman
Eorpach

Strasbourg, 19/09/2025

[1] Fiosrúchán an Ombudsman maidir le diúltú an Choimisiúin Eorpaigh rochtain phoiblí a thabhairt ar theachtaireachtaí téacs arna malartú idir Uachtarán an Choimisiúin agus POF cuideachta cógaisíochta maidir le vacsaín in aghaidh COVID-19 a cheannach (cás 1316/2021/MIG): https://www.ombudsman.europa.eu/en/case/en/59777.

[2] Féach cinneadh an Ombudsman i gcás 1316/2021/MIG: https://www.ombudsman.europa.eu/en/decision/en/158295.

[3] Féach Breithiúnas na Cúirte Ginearálta an 14 Bealtaine 2025, Stevi agus NYT v an Coimisiún, T-36/23: https://curia.europa.eu/juris/document/document.jsf?text=&docid=299492&pageIndex=0&doclang=EN&mode=lst&dir=&occ=first&part=1&cid=56780.

[4] Féach an Cinneadh ón Ombudsman Eorpach maidir leis an gcaoi ar dhéileáil an Coimisiún Eorpach le hiarraidh ar rochtain phoiblí ar ríomhphoist óna ionadaithe atá lonnaithe sa Ghréig maidir le staid na himirce in dhá theophointe (cás 211/2022/TM): https://www.ombudsman.europa.eu/en/decision/en/157768.