A Bhlainséir, a chara,

Tagraím do do fhreagra an 18 Deireadh Fómhair 2022 ar mo litir, inar iarr mé ar an gComhairle a mheas an bhféadfadh sí doiciméid bhreise a bhaineann le glacadh beart sriantach a chur ar fáil go réamhghníomhach don phobal.

Ba mhaith liom buíochas a ghabháil leis an gComhairle as mionscrúdú a dhéanamh ar na hábhair a ardaíodh i mo litir. Is díol sásaimh dom go n-aontaíonn an Chomhairle liom go bhfuil leas láidir dlisteanach ag an bpobal sna bearta sriantacha a ghlacann sí, arb é is aidhm dóibh sa chás seo deireadh a chur le cogadh foghach gan údar na Rúise i gcoinne na hÚcráine.

Tugaim faoi deara go measann an Chomhairle nach gcuireann cineál speisialta an phróisis cinnteoireachta as a n-eascraíonn glacadh beart sriantach, an gá atá le cosaint a thabhairt do na leasanna a aithnítear faoi reachtaíocht an Aontais maidir le rochtain phoiblí ar dhoiciméid (Rialachán 1049/2001) agus imthosca an-sonrach staid reatha an chogaidh ar chumas na Comhairle tuilleadh doiciméad a bhaineann le glacadh smachtbhannaí a chur ar fáil go réamhghníomhach.

Tuigim go bhfuil na mínithe a chuir an Chomhairle ar fáil gan dochar do na hiarrataí ar rochtain phoiblí ar dhoiciméid a d’fhéadfadh sí a fháil ar an ábhar seo. I gcás iarratais den sórt sin a fháil, tá súil agam go ndéanfaidh an Chomhairle measúnú orthu ar a bhfiúntas féin. Ar bhonn níos ginearálta, molaim don Chomhairle leanúint dá hiarrachtaí an pobal a chur ar an eolas go leordhóthanach faoi na bearta sriantacha, a mhéid is féidir.

 Go raibh maith agat arís as do fhreagra agus as do chomhoibriú maidir leis an tionscnamh seo, atá dúnta leis seo. Tabhair faoi deara le do thoil go bhfuil sé ar intinn agam an litir seo a fhoilsiú.

Le dea-mhéin,

Emily O'Reilly An tOmbudsman
Eorpach

Strasbourg, 15/02/2023