A Uasail X, a chara,

An 1 Nollaig 2019, chuir tú gearán faoi bhráid an Ombudsman Eorpaigh i gcoinne an Choimisiúin Eorpaigh maidir leis an gcaoi ar dhéileáil sé le do ghearán um shárú (CHAP(2018)01743) i gcoinne na hÍsiltíre. D'iarr an tOmbudsman orm déileáil le do ghearán agus freagra a thabhairt ort thar a ceann.

Baineann do ghearán leis an gcaoi ar dhéileáil an Coimisiún le do ghearán maidir le sárú ó thaobh nós imeachta de, chomh maith leis an gcinneadh a rinne sé ar deireadh é a dhúnadh.

Tar éis scrúdú cúramach a dhéanamh ar an bhfaisnéis a chuir tú ar fáil, ní fhaigheann an tOmbudsman aon drochriarachán ón gCoimisiún.^[1]

Maidir le gearáin faoi shárú, tá ról teoranta ag an Ombudsman. Féadfaidh sí scrúdú a dhéanamh féachaint ar choinnigh an Coimisiún an gearánach ar an eolas go cuí maidir le dul chun cinn sa chás agus maidir leis an seasamh a ghlacann sé sa chás ar deireadh. Ina theannta sin, féadfaidh an tOmbudsman scrúdú a dhéanamh féachaint ar tugadh an deis don ghearánach barúil a thabhairt ar sheasamh an Choimisiúin sula ndúnann an Coimisiún cás.

I gcás 1307/2019/DDJ, phléamar cheana leis na gnéithe de do chás a bhain le mainneachtain an Choimisiúin freagra a thabhairt ar do chuid fiosrúchán faoi na bearta a rinneadh maidir le do ghearán um shárú. Tugaim faoi deara gur ghabh an Coimisiún leithscéal leat as na moilleanna ar fhreagra a thabhairt i litreacha dar dáta an 6 Meán Fómhair agus an 11 Samhain 2019. Sa dara ceann, mhínigh an Coimisiún duit na cúiseanna nach raibh sé in ann freagra a thabhairt in am. Measaim gur freagra réasúnta é sin.

Tugaim do m’aire freisin gur chuir an Coimisiún in iúl duit i litir dar dáta an 6 Meán Fómhair 2019 cén fáth a raibh sé beartaithe aige do ghearán maidir le sárú a dhúnadh agus gur thug sé deis duit barúil a thabhairt maidir leis an rún atá aige é sin a dhéanamh. Chinn an Coimisiún ansin deireadh a chur leis an nós imeachta um shárú an 11 Samhain 2019, tar éis dó anailís a dhéanamh ar do bharúlacha.

Ó do ghearán, tuigim go measann tú nach bhfuil bunús maith leis an seasamh a ghlac an Coimisiún agus nár dhéileáil sé i gceart leis na hargóintí a d’ardaigh tú. Measann tú go háirithe gur cheart don Choimisiún measúnú a dhéanamh ar na saincheisteanna a d’ardaigh tú i ndáil leis na cúirteanna náisiúnta mar ábhar dhlí an Aontais, i gcomhréir le dlí-eolaíocht Chúirteanna an Aontais Eorpaigh maidir leis an smacht reachta

Tugaim faoi deara go míníonn an Coimisiún go soiléir cén fáth nach dtionscnóidh sé imeachtaí um shárú maidir le do ghearán. Go sonrach, chuir an Coimisiún in iúl duit nach measann sé gur fianaise é do chás ar neamhchomhlíonadh sistéamach dhlí an Aontais ag an Ísiltír. Tabhair do d’aire go bhfuil sé de rogha ag an gCoimisiún gan imeachtaí um shárú a thionscnamh. Is féidir leis, agus an lánrogha sin á húsáid aige, cinneadh a dhéanamh gan imeachtaí um shárú a thionscnamh nuair a mheasann sé nach n-ardaíonn cás saincheisteanna maidir le neamhchomhlíonadh sistéamach dhlí an Aontais.

Mar ábhar dlí, ní hionann imeachtaí um shárú agus leigheas dlí ar chásanna aonair ina bhféadfaí dlí an Aontais a chur i bhfeidhm go mícheart.

Dá bhrí sin, tagaim ar an gconclúid nach raibh aon drochriarachán sa chaoi ar láimhseáil an Coimisiún do ghearán maidir le sárú.

Tuigim gur dócha go gcuirfidh an cinneadh seo díomá ort. Tá súil agam go bhfuil an t-eolas agus na mínithe thuas cabhrach mar sin féin.

Dúnann an tOmbudsman an cás.

Le dea-mhéin,

Fergal Ó Regan  

Ceann na bhFiosrúchán ‐ Aonad 2

Strasbourg, 19/12/2019

[1] Is féidir teacht ar fhaisnéis iomlán faoin nós imeachta agus faoi na cearta a bhaineann le gearáin ag https://www.ombudsman.europa.eu/en/document/70707.