Faoi Chonarthaí AE, tá an Coimisiún Eorpach freagrach as a áirithiú go gcuireann gach Ballstát dlí an Aontais i bhfeidhm i gceart. Déantar amhlaidh ar bhonn a imscrúduithe féin nó tar éis gearáin a fháil ó dhaoine aonair nó ó dhaoine dlíthiúla mar gheall ar sháruithe ar dhlíthe an Aontais (tuillleadh eolais ar imeachtaí sáraithe)

Tá lánrogha ag an gCoimisiún maidir le cinneadh a dhéanamh maidir le cibé ar cheart nós imeachta um shárú a thionscnamh agus cathain ar cheart é a thionscnamh. Agus é ag déileáil le gearáin maidir le sárú, ní mór don Choimisiún rialacha áirithe a chomhlíonadh. (tuilleadh faisnéise)

Féadfaidh saoránaigh agus daoine dlíthiúla dul i dteagmháil leis an Ombudsman nuair a mheasann siad nár láimhseáil an Coimisiún gearán mar gheall ar shárú i gceart, mar shampla, nuair a theip ar an gCoimisiún déileáil leis an ngearán ar bhealach tráthúil nó nuair a theip air iad a choinneáil ar an eolas faoina chéimeanna.

Mar sin féin, ó thaobh an tseasaimh shubstaintigh a ghlacann an Coimisiún ar ghearán maidir le sárú, ar nós an cinneadh an cás a dhúnadh gan gníomhú, tá teorainn le ról an Ombudsman de bharr lánrogha an Choimisiúin. I gcásanna den sórt sin, féadfaidh an tOmbudsman féachaint le cinntiú gur mhínigh an Coimisiún a sheasamh i gceart ach ní iarrfaidh an tOmbudsman ar an gCoimisiún a chinneadh a athbhreithniú ach amháin má bhíonn fianaise ar earráid fhollasach ann.