L-Ombudsman Ewropew

L-Ombudsman Ewropew ifittex eżiti ġusti għall-ilmenti kontra l-istituzzjonijiet tal-Unjoni Ewropea, iħeġġeġ it-trasparenza u jippromwovi kultura amministrattiva ta' servizz. Huwa għandu l-għan li jibni l-fiduċja permezz ta' djalogu bejn iċ-ċittadini u l-Unjoni Ewropea u li jrawwem l-ogħla standards ta' mġiba fl-istituzzjonijiet tal-Unjoni.

Il-prinċipji gwida tagħna: L-Integrità, il-Ġustizzja, ir-Responsabbiltà, id-Djalogu u s-Servizz.

L-Ombudsman Ewropew huwa impjegatur b'opportunità ugwali li jinkoraġġixxi applikazzjonijiet minn irġiel u nisa kwalifikati u ma jiddiskriminax fuq il-bażi ta', fost affarijiet oħra, l-età, id-diżabilità, ir-razza, ir-reliġjon, jew l-orjentazzjoni sesswali.

1. L-għan tas-sejħa għal espressjoni ta’ interess

L-Ombudsman Ewropew iddeċieda li jorganizza proċedura tal-għażla sabiex jistabbilixxi lista ta’ riżerva ta’ ġuristi lingwisti bl-Ingliż bħala l-lingwa ewlenija tagħhom. Il-kandidati magħżula bħala riżultat ta’ din il-proċedura tal-għażla se jiffurmaw parti minn lista ta’ riżerva b’massimu ta’ ħames kandidati. Il-lista ta’ riżerva se tkun valida għal sentejn u l-validità tagħha tista’ tiġi estiża.

2. Post tal-impjieg

Il-post tal-impjieg huwa Strasburgu.

Il-kandidat reklutat jista' jiġi assenjat mill-ġdid fl-uffiċċju tal-Ombudsman Ewropew fi Brussell u l-kompiti tiegħu/tagħha jistgħu jinvolvu missjonijiet f'postijiet tax-xogħol oħra tal-Istituzzjonijiet.

3. Kundizzjonijiet tal-impjieg

Il-kandidat magħżul mil-lista ta’ riżerva se jiġi offrut kuntratt bħala aġent kuntrattwali tal-grupp ta’ funzjoni IV, għal tul ta’ żmien definit. Il-kuntratt jista' jiġġedded. Skont ir-regoli attwali, il-perjodu massimu ta’ impjieg huwa ta’ tliet snin.

4. In-natura tal-kompiti

Taħt is-superviżjoni tad-Direttur kompetenti, u flimkien mal-ġuristi-lingwisti eżistenti tal-Ombudsman Ewropew, il-kandidat magħżul se jkun responsabbli għal:

● Ir-reviżjoni tad-deċiżjonijiet, il-proposti għal soluzzjonijiet amikevoli, l-abbozzi ta’ rakkomandazzjonijiet u r-rapporti speċjali abbozzati bl-Ingliż qabel is-sottomissjoni tagħhom lill-Ombudsman;

● Ir-reviżjoni tal-korrispondenza maċ-ċittadini u l-istituzzjonijiet abbozzata bl-Ingliż;

● Ir-reviżjoni ta’ dokumenti oħra abbozzati bl-Ingliż;

● Ġeneralment tiġi żgurata l-kwalità tad-dokumenti abbozzati bl-Ingliż minn perspettiva lingwistika u legali;

● Aġġornament tal-gwida tal-istil tal-Uffiċċju;

● Il-promozzjoni u l-iżgurar tal-użu ta’ lingwaġġ sempliċi fil-ħidma tal-Uffiċċju;

● L-għoti ta’ taħriġ dwar il-lingwaġġ sempliċi fejn xieraq.

5. Eliġibbiltà

Il-proċedura hija miftuħa għall-kandidati li, fid-data tal-għeluq għall-applikazzjonijiet, jissodisfaw il-kundizzjonijiet li ġejjin:

(a) Kundizzjonijiet minimi

Il-kandidati għandhom:

1. ikollhom iċ-ċittadinanza tal-Unjoni Ewropea;
2. igawdu drittijiet sħaħ bħala ċittadini;
3. ikunu ssodisfaw kwalunkwe obbligu impost fuqhom mil-liġijiet dwar is-servizz militari;
4. ikollhom livell ta’ edukazzjoni li jikkorrispondi għal studji universitarji mitmuma ta’ mill-inqas tliet snin iċċertifikati b’diploma;
5. ikollhom esperjenza professjonali ta’ mill-inqas sena bħala ġurista lingwista jew f’qasam rilevanti ieħor.

(b) Kundizzjonijiet speċifiċi

(i) Għarfien meħtieġ

● Għarfien ġenerali tajjeb tal-affarijiet Ewropej;

● Għarfien tajjeb tal-liġi tal-Unjoni Ewropea, inkluża l-liġi amministrattiva pubblika;

● Ħila li jwettaq rieżami lingwistiku tad-deċiżjonijiet biex jagħmilhom ċari, jinftiehmu u konsistenti u biex jgħin lill-uffiċjali legali jgħollu l-kwalità lingwistika tal-output tagħhom;

● Kapaċità ta’ adattament għal ambjent internazzjonali u multikulturali.

(ii) Ħiliet

● Ħiliet legali tajbin ħafna;

● Ħiliet ta’ abbozzar tajbin ħafna;

● Ħila li jlaħħaq b’mod effettiv mal-isfida tal-korrezzjoni u t-titjib tal-kwalità tat-testi prodotti bl-Ingliż minn persuni li ma għandhomx ħakma fil-livell tal-lingwa materna tal-Ingliż;

● Ħiliet ta’ editjar tajbin ħafna;

● Ħila li jaħdem f’tim u li jħeġġeġ u jissensibilizza lill-kollegi għall-użu ta’ Ingliż sempliċi;

● Kapaċità qawwija li jorganizzaw il-ħin tax-xogħol tagħhom u li jistabbilixxu l-prijoritajiet;

● Impenn għal kultura ta’ servizz lejn iċ-ċittadini u l-istituzzjonijiet.

(iii) Lingwi

● Għarfien ekwivalenti tal-lingwa materna tal-Ingliż biex jippermetti r-reviżjoni u l-abbozzar ta’ testi legali f’din il-lingwa;

● Għarfien fil-livell tax-xogħol ta’ żewġ lingwi uffiċjali tal-Unjoni Ewropea minbarra l-Ingliż;

● L-għarfien ta’ lingwi uffiċjali addizzjonali tal-Unjoni Ewropea jkun ta’ vantaġġ.

6. Skadenza għas-sottomissjoni tal-applikazzjonijiet

Id-dossiers tal-applikazzjoni [1] għandhom jirreferu għas-sejħa għal espressjoni ta' interess nru OMB/CA/02/2012 - Lawyer-linguist u jintbagħtu fl-indirizz t'hawn taħt bil-posta rreġistrata sa mhux aktar tard mit-3 ta' April 2012:

Uffiċċju tal-Ombudsman Ewropew
Persunal, Amministrazzjoni u Unità tal-Baġit
Sejħa għal espressjoni ta' interess OMB/CA/02/2012
1, av. du Président Robert Schuman
CS 30403
67001 Strasburgu Cedex
France

L-applikanti għandhom jinkludu:

a) Il-formola tal-applikazzjoni mimlija kif xieraq, li tista' tinstab fuq is-sit web tal-Ombudsman Ewropew fl-indirizz li ġej: http://ombudsman.europa.eu (jew li jista’ jinkiseb billi ċċempel in-numru tat-telefon li ġej: +33 (0)3 88 17 23 94);

ittra li tispjega r-raġunijiet tal-kandidat għall-applikazzjoni;

kopja tal-curriculum vitae tal-kandidat bl-Ingliż (preferibbilment europass CV: http://europass.cedefop.europa.eu);

kopja ta' dokument li jagħti prova taċ-ċittadinanza tal-applikant;

kopja tad-diploma li tissodisfa r-rekwiżiti stabbiliti fit-Taqsima 5(a) ta' din is-sejħa għal espressjoni ta' interess;

kopji ta' evidenza ta' esperjenza professjonali, li tindika b'mod ċar id-dati tal-bidu u tat-tmiem u n-natura eżatta tad-dmirijiet imwettqa;

lista nnumerata tad-dokumenti ta' sostenn kollha meħtieġa hawn fuq.

Il-kopji msemmija hawn fuq ma għandhomx għalfejn jiġu ċċertifikati. Peress li d-dokumenti mhux se jintbagħtu lura lill-applikanti, is-sottomissjoni tad-dokumenti oriġinali għandha tiġi evitata.

Applikazzjonijiet mhux kompluti se jiġu esklużi mill-għażla.

7. Proċedura

a) Id-data tal-istazzjonar tal-applikazzjoni għandha tkun mhux aktar tard mit-3 ta' April 2012. L-applikazzjonijiet mibgħuta wara t-3 ta' April 2012 għandhom jitqiesu inammissibbli.

b) L-applikazzjonijiet mibgħuta fid-data tal-għeluq se jiġu eżaminati mill-Kumitat tal-Għażla li għandu jinħatar mill-Ombudsman Ewropew sabiex jiġi ddeterminat jekk il-kandidati jissodisfawx (u ppreżentawx l-evidenza meħtieġa li jissodisfaw) l-ewwel, ir-raba' u l-ħames kundizzjonijiet minimi għall-eliġibbiltà stabbiliti fit-Taqsima 5(a) ta' din is-sejħa għal espressjoni ta' interess. Il-kandidati li ma jissodisfawx (jew li naqsu milli jissottomettu l-evidenza meħtieġa biex juru li jissodisfaw) dawn il-kundizzjonijiet minimi, għandhom jiġu esklużi. Il-kandidat li fil-fatt se jiġi rreklutat biss se jintalab jipprovdi informazzjoni li tikkonferma li jissodisfa t-tieni u t-tielet kundizzjonijiet minimi għall-eliġibbiltà.

c) L-applikazzjonijiet eliġibbli se jiġu vvalutati mill-Kumitat tal-Għażla abbażi tal-kwalifiki u l-esperjenza professjonali tal-kandidati, sabiex titfassal lista qasira tal-kandidati l-aktar xierqa.

d) Il-kandidati fuq din il-lista qasira se jiġu mistiedna jagħmlu test bil-miktub. Il-kandidati li jkunu kisbu l-aħjar riżultati f'dan it-test jiġu mistiedna għal intervista. Il-Kumitat tal-Għażla jevalwa l-profil, l-għarfien u l-ħiliet tal-kandidati abbażi tar-riżultati ta’ dan it-test u tal-intervista u jfassal lista ta’ riżerva ta’ massimu ta’ ħames kandidati.

Il-kandidati jirċievu konferma tal-wasla tal-applikazzjonijiet tagħhom. Dawk il-kandidati li l-applikazzjonijiet tagħhom huma inammissibbli jew li ma jissodisfawx il-kundizzjonijiet minimi għall-eliġibbiltà se jiġu infurmati mill-aktar fis possibbli.

Il-kandidati li l-applikazzjonijiet tagħhom huma ammissibbli u li jissodisfaw il-kundizzjonijiet minimi għall-eliġibbiltà se jiġu infurmati dwar jekk ġewx inklużi fil-lista qasira tal-kandidati l-aktar xierqa hekk kif titfassal tali lista qasira.

Il-kandidati magħżula se jiġu infurmati dwar jekk ġewx inklużi fil-lista ta’ riżerva hekk kif titfassal tali lista ta’ riżerva.

Strasburgu, 05-03-2012

P. Nikiforos Diamandouros