Bhain an cás leis an bhfíoras nár cuireadh aistriúchán ar aguisín a ghabhann le rialachán cur chun feidhme ón gCoimisiún Eorpach ar fáil. Tá an aguisín, a bhí ar fáil i mBéarla amháin, mar chuid de bhearta atá déanta ag an Aontas chun idir-inoibritheacht na gcóras iarnróid san Aontas a áirithiú.

Chuir an Coimisiún Eorpach in iúl don Ombudsman gur chinn sé ábhar an aguisín a aistriú, agus go n-aistreofar ábhar den chineál céanna amach anseo.

Dá bhrí sin, chinn an tOmbudsman nach raibh aon fhorais ann le tuilleadh fiosraithe a dhéanamh.

Bhain an cás leis an gcaoi a ndearna an Oifig Eorpach um Roghnú Foirne (EPSO) measúnú ar incháilitheacht iarrthóra i nós imeachta roghnúcháin do dhlítheangeolaithe Fraincise. Mheas EPSO nach raibh an gearánach incháilithe toisc nach raibh na dioplómaí riachtanacha aige. Chuir an gearánach i gcoinne chinneadh EPSO, agus mhaígh sé go raibh na dioplómaí riachtanacha aige.

Le linn an fhiosrúcháin, tháinig an tOmbudsman ar shaincheisteanna maidir le cinneadh an bhoird roghnúcháin an gearánach a mheas a bheith neamh-incháilithe. Mhol sí go n-iarrfadh EPSO ar an mbord roghnúcháin athmhachnamh a dhéanamh ar a sheasamh maidir le hincháilitheacht an ghearánaigh don phróiseas roghnúcháin. D’aontaigh EPSO athbhreithniú a dhéanamh ar incháilitheacht an iarrthóra agus d’iarr sé doiciméid bhreise ar an ngearánach. Theip ar an ngearánach freagra a thabhairt ar iarratas EPSO. Ar an mbonn sin, dhiúltaigh EPSO don togra réitigh, toisc gur mheas sé nach bhféadfadh sé incháilitheacht an iarrthóra a athbhreithniú gan na doiciméid bhreise sin.

I bhfianaise an mhéid sin, bhí an tOmbudsman den tuairim nach bhfuil údar le tuilleadh fiosrúchán sa chás seo. Mar sin féin, mhol sí do EPSO go gcinnteodh na boird roghnúcháin, sna próisis roghnúcháin a bheidh ann amach anseo, go mbeadh na cinntí maidir le hincháilitheacht na n-iarrthóirí bunaithe ar thuiscint shoiléir ar an bhfaisnéis a chuir na hiarrthóirí ar fáil ina n-iarratais. I gcás amhrais maidir le hincháilitheacht iarrthóra, ba cheart don bhord roghnúcháin faisnéis bhreise a iarraidh ar an iarrthóir nó soiléirithe a lorg ó údaráis náisiúnta nó ó thríú páirtithe eile.

Bhain an cás leis an gcaoi a ndearna Ionad Aistriúcháin Chomhlachtaí an Aontais Eorpaigh (CdT) meastóireacht ar thairiscintí in dhá nós imeachta soláthair chun seirbhísí aistriúcháin a sholáthar. D’áitigh an gearánach go raibh CdT neamhréireach ina mheastóireacht, ós rud é go ndearna sé measúnú éagsúil ar a thairiscintí san am a chuaigh thart. D’áitigh sé freisin go ndearna CdT measúnú mícheart ar thairiscintí an ghearánaigh in aghaidh dhá chritéar a leagtar amach sna glaonna ar thairiscintí.

Chinn an tOmbudsman gur lean CdT i gceart an mhodheolaíocht a chuir sé i bhfeidhm chun measúnú a dhéanamh ar na tairiscintí sa dá nós imeachta. Bhí sí den tuairim freisin nár léiríodh aon earráid fhollasach sa chaoi a ndearna CdT measúnú ar thairiscintí an ghearánaigh.

Ar an mbonn sin, mheas an tOmbudsman nach raibh aon drochriarachán ag CdT agus dhún sí an cás. Mar sin féin, tá muinín ag an Ombudsman go gcuirfidh CdT faisnéis níos mionsonraithe ar fáil do thairgeoirí faoina mheasúnú i nósanna imeachta amach anseo, toisc go bhféadfadh faisnéis níos soiléire ag céim luath an baol a bhaineann le gearáin a laghdú amhail an ceann as ar eascair an fiosrúchán seo.

Bhí imní ar an ngearánach go bhfuil an chuid is mó den fhaisnéis ar shuíomh gréasáin na Gníomhaireachta Leigheasra Eorpaí (EMA) ar fáil i mBéarla amháin.

I gcomhthéacs an fhiosrúcháin, mheabhraigh an tOmbudsman do EMA a moltaí maidir le húsáid theangacha oifigiúla an Aontais do riarachán an Aontais agus cumarsáid á déanamh aici leis an bpobal.

Chuir EMA in iúl don Ombudsman go bhfuil sé ag obair ar bheartas teanga agus ar chomhéadan ilteangach dá shuíomh gréasáin.

D’fháiltigh an tOmbudsman roimh phleananna EMA aghaidh a thabhairt ar an ábhar agus dhún sé an fiosrúchán ag moladh go ndéanfadh sé obair leantach ar a thiomantas in am trátha. Mhol an tOmbudsman freisin, idir an dá linn, go bhféachfadh EMA le faisnéis lárnach i dteangacha oifigiúla uile an Aontais a dhéanamh níos feiceálaí ar a shuíomh gréasáin.

Bhain an cás le polasaí árachais nua a chinn an Coimisiún Eorpach le cuideachta phríobháideach árachais chun árachas tionóisce agus breoiteachta a sholáthar do Ghníomhairí Ateangaireachta Comhdhála (ACInna).

Iar-ACI is ea an gearánach a mheas go raibh coinníollacha an pholasaí árachais nua an-mhíbhuntáisteach i gcomparáid leis an bpolasaí roimhe sin, agus go ndearna sé idirdhealú i gcoinne ACInna áirithe.

Le linn an fhiosrúcháin, ba léir go mbeadh an gearánach níos lú faoi mhíbhuntáiste ná mar a bhí eagla air. Chinn an tOmbudsman go bhfuil mínithe an Choimisiúin ar na hathruithe sa bheartas áititheach agus réasúnach. Níor aimsíodh aon fhianaise san fhiosrúchán ach oiread a chaithfeadh amhras ar an nós imeachta as ar eascair an conradh árachais nua, lenar áiríodh comhairliúchán le comhlachas na n-ateangairí idirnáisiúnta.

Dhún an tOmbudsman an fiosrúchán leis an gconclúid nach raibh aon drochriarachán ag an gCoimisiún.