Íocaíocht chúitimh

D’aontaigh an Coimisiún cúiteamh EUR 56 000 a íoc le hiriseoir Francach tar éis don Ombudsman a chinneadh gur theip air ionchais réasúnacha an ghearánaigh a urramú. Chuir an Coimisiún a ranníocaíocht airgeadais le tionscadal an ghearánaigh ar ceal ceithre seachtaine sula raibh sé le tarlú.

Diúltú don Chomhairle teacht le chéile go poiblí

Chuir an tOmbudsman tuarascáil speisialta faoi bhráid Pharlaimint na hEorpa tar éis gur theip ar an gComhairle cúiseanna bailí a thabhairt le diúltú teacht le chéile go poiblí aon uair a bhí sí ag gníomhú ina cáil reachtach. Lean fiosrúchán an Ombudsman gearán ó FPE na Gearmáine, an tUasal Elmar BROK, inar líomhain sé nach bhfuil Rialacha Nós Imeachta na Comhairle i gcomhréir leis an gConradh ar an Aontas Eorpach, ar dá réir nach mór don Chomhairle agus d'institiúidí agus do chomhlachtaí eile an Chomhphobail cinntí a dhéanamh ar dhóigh chomh hoscailte agus is féidir.

Ráitis mhíthreoracha arna ndéanamh ag OLAF

Sheol an tOmbudsman tuarascáil speisialta chuig Parlaimint na hEorpa maidir le ráitis a rinne an Oifig Eorpach Frith-Chalaoise (OLAF) i gcomhthéacs fiosrúcháin a rinne sé. Bhain an fiosrúchán le líomhaintí breabaireachta, a rinne OLAF, ar dhócha go dtuigfí go raibh siad dírithe ar iriseoir ar leith. Chuir an t-iriseoir gearán faoi bhráid an Ombudsman ansin, inar líomhnaíodh go bhféadfadh an fhaisnéis a chuir OLAF ar fáil “an tOmbudsman Eorpach a chur ar míthreoir agus an fiosrúchán a chúbláil”. Ina thuarascáil speisialta, mhol an tOmbudsman go n-admhódh OLAF go ndearna sé ráitis mhíchearta agus mhíthreoracha.

Íocaíocht dhéanach

Shocraigh an Coimisiún cás d’íocaíocht dhéanach le hiriseoir eolaíochta Gearmánach, mhínigh sé na cúiseanna leis an moill agus d’aontaigh sé ús a íoc. Dheimhnigh sí go raibh bearta déanta aici idir an dá linn chun dlús a chur le híocaíochtaí le saineolaithe. Thug an gearánach le fios ina dhiaidh sin nár íocadh é ach laistigh de 30 lá as seirbhísí a tugadh faoina chonradh is déanaí.

Deireadh a chur leis an teorainn aoise d’oiliúnaithe

Chuir an Coimisiún deireadh leis an teorainn aoise 30 bliain mar cheann de na critéir roghnúcháin ina chlár oiliúna inseirbhíse. Tháinig sé sin sna sála ar ghearán maidir leis na rialacha lena rialaítear an clár. Thug an tOmbudsman dá aire go gcuireann roinnt institiúidí agus comhlachtaí Comhphobail eile teorainn aoise i bhfeidhm ina gcláir oiliúna. Dá bhrí sin, d’fhógair sé go seolfadh sé fiosrúchán féintionscnaimh ar na cláir sin.

Fadhbanna le rochtain ar dhoiciméid

Cháin an tOmbudsman an Chomhairle toisc nár dhéileáil sí le hiarratas ar rochtain phoiblí ar dhoiciméid i gceart agus go cúramach. Tháinig sé sin sna sála ar fhiosrúchán a léirigh, murab ionann agus freagra tosaigh na Comhairle ar an ngearánach maidir le líon na ndoiciméad ábhartha, go raibh go leor doiciméad breise ann i ndáiríre. Mar thoradh ar imscrúdú an Ombudsman, tugadh rochtain don ghearánach ar na doiciméid bhreise.