A Uasail X., a chara,

An 23 Márta 2004, rinne tú gearán leis an Ombudsman Eorpach i gcoinne an Choimisiúin Eorpaigh, maidir leis an gcaoi a bhfuil na Scoileanna Eorpacha ag láimhseáil oideachas leanaí faoi mhíchumas.

Fuair an tOmbudsman líon suntasach gearán maidir leis an ábhar céanna. Bhí na líomhaintí a rinneadh sna gearáin sin an-chosúil leis na líomhaintí a ceapadh i ngearán roimhe seo (tagairt: 1391/2002/JMA), a raibh fiosrúchán ar bun ina leith cheana féin. Le linn an fhiosrúcháin sin, seoladh dréachtmholadh chuig an gCoimisiún. Cuireadh an Coimisiún ar an eolas faoi do ghearán agus d’iarr sé air tuairim a chur isteach ina leith. Roghnaigh an institiúid freagra comhpháirteach a thabhairt ar na gearáin uile a bhaineann leis an ábhar sin trína tuairim mhionsonraithe féin i gcás 1391/2002/JMA. An 29 Meán Fómhair 2004, sheol mé cóip den fhreagra ón gCoimisiún chugat.

An 27 Bealtaine 2005, tar éis grinnfhiosrúchán ar ghearán 1391/2002/JMA, chuir mé tuarascáil speisialta faoi bhráid Pharlaimint na hEorpa, i gcomhréir le hAirteagal 3(7) de Reacht an Ombudsman. Moltar sa tuarascáil speisialta gur cheart don Choimisiún na bearta is gá a dhéanamh chun a áirithiú nach gceanglófar ar thuismitheoirí leanaí a bhfuil riachtanais speisialta oideachais acu (leanaí SEN) atá eisiata ó na Scoileanna Eorpacha mar gheall ar a leibhéal míchumais ranníocaíocht a dhéanamh le costais oideachais a leanaí.

Mar a luadh sa tuarascáil speisialta, mheas an tOmbudsman gur cheart go mbeadh feidhm ag an moladh thuas freisin maidir leis na gearáin bhreise a fuair sé a raibh fíorais chomhchosúla agus líomhaintí comhionanna i gceist leo, lena n-áirítear do chuid féin.

Tabhair do d’aire gur tugadh aghaidh sa tuarascáil speisialta freisin ar do líomhain maidir le mainneachtain líomhnaithe na Scoileanna Eorpacha cláir oideachais oiriúnacha a chur ar fáil do leanaí SEN uile oifigigh an Aontais. Tá a fhios ag an Ombudsman gur cosúil go léiríonn na cleachtais atá ann cheana i measc na mBallstát maidir le beartais a fhorbairt chun leanaí SEN a chuimsiú i scoileanna príomhshrutha go leor éagsúlachta. Cé go bhfuil córas oideachais lán-chomhtháite leagtha amach ag roinnt Ballstát de chuid an Aontais a fhreastalaíonn ar riachtanais uile leanaí SEN, tá cur chuige ilriain fós ag tíortha Eorpacha eile lena gcomhcheanglaítear córais oideachais príomhshrutha agus riachtanais speisialta ar leithligh. Cuireann an tOmbudsman in iúl nach bhfuil sé ar an eolas faoi aon fhoráil dhlíthiúil cheangailteach lena gceanglaítear ar an gCoimisiún nó ar na Scoileanna Eorpacha córas aontaithe a chur ar bun. In éagmais aon fhoráil dhlíthiúil den sórt sin, ní féidir leis an Ombudsman teacht ar an gconclúid gur theip ar an gCoimisiún gníomhú i gceart trí gan a chinntiú go gcuireann na Scoileanna Eorpacha cláir oideachais ar fáil do leanaí SEN uile oifigigh AE. Dá bhrí sin, tháinig an tOmbudsman ar an gconclúid gur chosúil nach raibh aon drochriarachán ann maidir leis an ngné sin den chás.

Tá cóip de mo thuarascáil speisialta i mBéarla á cur faoi iamh agam leis an litir seo.

Foráiltear le Reacht an Ombudsman gurb é an chéim dheiridh i bhfiosrúchán ag an Ombudsman tuarascáil a chur faoi bhráid Pharlaimint na hEorpa. Dá bhrí sin, dúnaim an comhad ar an ngearán.

Cuirfear Uachtarán an Choimisiúin ar an eolas faoin gcinneadh sin freisin.

Le dea-mhéin,

P. Nikiforos DIAMANDOUROS