Fiosrúchán leantach OI/3/2017/AB-NF maidir leis an mbainistiú a dhéanann an Coimisiún Eorpach ar chásanna ‘doirse imrothlacha’ a bhaineann le foireann an Aontais

A Uachtaráin, a chara,

An 9 Meán Fómhair 2016, dhún mé m’fhiosrúchán bunaithe ar ghearáin 2077/2012/TN agus 1853/2013/TN maidir leis an gcaoi ar láimhseáil an Coimisiún cásanna ina bhfágann baill foirne institiúidí an Aontais chun oibriú don earnáil phríobháideach agus vice versa. Dhírigh m’fhiosrúchán ar (a) an baol go dtabharfadh iaroifigigh de chuid an Aontais faisnéis rúnda leo nó go n-úsáidfidís a dteagmhálacha pribhléideacha chun brústocaireacht a dhéanamh ar a n-iar-chomhghleacaithe agus (b) an baol go mbeadh coinbhleachtaí leasa ann agus baill foirne nua ag obair ar chomhaid a bhaineann lena bhfostaíocht roimhe sin.

Mar thoradh ar m’fhiosrúchán, d’eisigh mé moltaí agus treoirlínte chun nósanna imeachta an Choimisiúin a neartú maidir le forálacha ábhartha Rialachán Foirne an Aontais Eorpaigh a chur chun feidhme [1]. Sa chinneadh lenar dúnadh m’fhiosrúchán, d’fháiltigh mé roimh na gealltanais dhearfacha a thug an Coimisiún maidir le go leor gnéithe ar déileáladh leo san fhiosrúchán. Dúirt mé freisin go ndéanfainn obair leantach ar an dul chun cinn atá déanta ag an gCoimisiún i ndáil le mo chuid moltaí agus treoirlínte trí fhiosrúchán féintionscnaimh a dhéanamh ag tosú le cigireacht go luath in 2017.

I bhfianaise an mhéid sin, chinn mé fiosrúchán leantach a oscailt.
Ní bhaineann an fiosrúchán seo, cosúil le m'fhiosrúchán roimhe seo, le haon duine ar leith, ach díreoidh sé ar na saincheisteanna sistéamacha a sainaithníodh i m'fhiosrúchán roimhe seo. Ba mhaith liom a shoiléiriú freisin nach mbainfidh an fiosrúchán seo le saincheisteanna a eascraíonn as gníomhaíochtaí gairme a rinne iar-Choimisinéirí.

Mar chéad chéim, ba mhór agam dá gcuirfeadh an Coimisiún liosta ar fáil dom de na cásanna ar dhéileáil an Coimisiún leo faoi Airteagail 11, 12b agus 16 de na Rialacháin Foirne le dhá bhliain anuas (2015-2016). Ba cheart go n-áireofaí sa liosta gach cás de (i) oifigigh AE, (ii) gníomhairí sealadacha agus (iii) gníomhairí ar conradh a bhfuil rochtain acu ar ‘fhaisnéis íogair [2]’ a d’fhág an Coimisiún chun dul i mbun ‘gníomhaíocht ghairme’[3] (Airteagal 16), lena n-áirítear saoire ar fhorais phearsanta (Airteagal 12b). Ba cheart go n-áireofaí sa liosta freisin cásanna uile na n-oifigeach agus na ngníomhairí sealadacha atá ag teacht isteach (Airteagal 11).

Ba cheart a lua sa liosta (i) ainm an duine lena mbaineann, (ii) an cineál seirbhísigh (oifigeach buan, gníomhaire sealadach, gníomhaire ar conradh), (iii) teideal an phoist (go háirithe má bhí ról bainistíochta aige) agus (iv) an iarghníomhaíocht ghairme (do ghníomhairí isteach) nó an post nua san earnáil phríobháideach (do dhaoine a d’fhág an tseirbhís).

Bheinn buíoch dá gcuirfeadh an Coimisiún an liosta sin ar fáil dom laistigh de dhá mhí ón litir seo a fháil.

Ansin roghnóidh m’Oifig sampla de chomhaid ón liosta agus rachaidh sí i dteagmháil leis an gCoimisiún chun dáta oiriúnach a aimsiú le haghaidh cigireachta agus cruinnithe. Deis a bheidh sa chruinniú don Choimisiún m’Oifig a chur ar an eolas faoi na gníomhaíochtaí a rinneadh chun aghaidh a thabhairt ar na moltaí agus na treoirlínte a rinne mé le linn m’fhiosrúcháin roimhe seo (féach an iarscríbhinn).

Má bhíonn aon cheist ag d'fhoireann, féadfaidh siad teagmháil a dhéanamh le Alice Bossière, Oifigeach Fiosrúchán Straitéiseach i m'Oifig.

Le dea-mhéin,

Emily O'Reilly

Iarscríbhinn

Moltaí a rinne an tOmbudsman Eorpach i gcomhthéacs a fiosrúcháin bunaithe ar ghearáin 2077/2012/TN agus 1853/2013/TN

(i) A áirithiú gur baill foirne nach raibh aon nasc gairmiúil díreach acu leis an oifigeach lena mbaineann a dhéanfaidh an measúnú ar iarratais ó oifigigh atá ag fágáil na seirbhíse. Tá sé thar a bheith tábhachtach aird ar leith a thabhairt ar an gceanglas sin i gcás oifigigh shinsearacha;

(ii) I gcás inarb infheidhme, anailís a dhéanamh ar iarratais chun oibriú lasmuigh den Choimisiún ar bhonn Cóid eitice agus ionracais a bhaineann go sonrach leis an Ard-Stiúrthóireacht;

(iii) I ndáil le cinntí chun iarrataí ar obair lasmuigh den Choimisiún ó oifigigh shinsearacha a fhormheas, (i) ainm an oifigigh shinsearaigh lena mbaineann, (ii) sonraí na ndualgas a dhéanann an t-oifigeach sinsearach sin sa Choimisiún, (iii) sonraí na ndualgas atá le déanamh sna gníomhaíochtaí nua, agus (iv) measúnú mionsonraithe agus conclúidí mionsonraithe an Choimisiúin a fhoilsiú ar líne. Ba cheart don Choimisiún gach cinneadh den sórt sin a fhoilsiú agus ba cheart an foilsiú a dhéanamh a luaithe is féidir agus laistigh de thréimhse ama agus a mhinice is iomchuí do thábhacht an ábhair sin;

(iv) An tOmbudsman a chur ar an eolas faoi gach cás ina gcuireann cúiseanna príobháideachais eisceachtúla láidre cosc ar an bhfoilsiú dá dtagraítear i bpointe (iii) thuas. Déanfaidh an tOmbudsman iniúchadh agus measúnú ansin ar an gcomhad maidir leis an gcinneadh a rinneadh chun ligean don oifigeach sinsearach sin oibriú lasmuigh den Choimisiún.

(v) Anailís iomlán a dhéanamh ar gach iarratas aonair chun oibriú lasmuigh den Choimisiún agus an anailís sin a leagan amach i gcinntí dea-réasúnaithe dea-dhoiciméadaithe;

(vi) A thaifeadadh go cuí go ndearna sé anailís féachaint an bhfuil an fhaisnéis a chuir an t-oifigeach ar fáil maidir leis an obair sheachtrach atá beartaithe mionsonraithe go leor chun go mbeidh an Coimisiún in ann anailís iomlán a dhéanamh ar an obair sheachtrach sin;

(vii) Barúlacha a dhéanann seirbhísí eile de chuid an Choimisiúin a thaifeadadh agus a anailísiú i gceart, go háirithe nuair a imíonn seasamh an Choimisiúin faoi dheireadh ó na barúlacha sin;

(viii) Gach beart is gá a dhéanamh chun a áirithiú go gcuirfidh an Coimisiún na rialacha maidir le coinbhleachtaí leasa i bhfeidhm go comhsheasmhach ar fud an Choimisiúin, lena n-áirítear trí na hArd-Stiúrthóireachtaí a chur ar an eolas aon uair a shainaithnítear neamhréireachtaí maidir le coinníollacha a fhorchur;

(ix) Feabhas a chur ar shuíomh gréasáin Eitice agus Iompair an Choimisiúin;

(x) Cóid nó treoirlínte a bhaineann go sonrach leis an Ard-Stiúrthóireacht a fhoilsiú ar líne;

(xi) Clár láraithe a chur i bhfeidhm d’iarratais foirne chun oibriú lasmuigh den Choimisiún agus le haghaidh measúnuithe coinbhleachta leasa ar bhaill foirne atá ag teacht isteach;

(xii) Moltaí an Ombudsman a úsáid agus measúnú á dhéanamh ar choinbhleachtaí leasa a d’fhéadfadh a bheith ag baill foirne atá ag teacht isteach agus anailís á déanamh ar cé acu a chomhlíontar nó nach gcomhlíontar an toirmeasc ar bhaill foirne shinsearacha a fhágann an Coimisiún ó bheith ag gabháil do bhrústocaireacht nó d’abhcóideacht vis-à-vis an Coimisiún;

(xiii) Na bearta is gá a dhéanamh chun a áirithiú go léireoidh gach cás amach anseo an beartas go ndéantar tagairt agus anailís go sainráite sa chomhad ar ghealltanais a thairgeann na hoifigigh, arb é is aidhm dóibh coinbhleachtaí leasa a dhíothú.

[1] Cinneadh lena ndúntar an fiosrúchán bunaithe ar ghearáin 2077/2012/TN agus 1853/2013/TN maidir leis an gcaoi ar láimhseáil an Coimisiún Eorpach feiniméan na ‘ndoirse imrothlacha’. Ar fáil ag:

https://www.ombudsman.europa.eu/en/cases/decision.faces/en/71136/html.bookmark

[2] Airteagal 22 den Chinneadh ón gCoimisiún maidir le gníomhaíochtaí agus tascanna seachtracha, an 16 Nollaig 2013, C(2013) 9037 final.

[3] Ní bheidh sé riachtanach baill foirne a bhog go comhlacht poiblí eile, cibé acu ar leibhéal an Aontais nó ar leibhéal na mBallstát, a áireamh ar an liosta.