Ba cheart na páirtithe atá faoi imscrúdú a chur ar an eolas, ag tráth iomchuí in imscrúdú, faoi raon feidhme imscrúdaithe. Cuireann sé sin ar a gcumas dóibh cearta áirithe cosanta a fheidhmiú go héifeachtach, amhail an ceart go ndéanfadh abhcóide dlí ionadaíocht orthu. Nuair a iarrann OLAF faisnéis ó pháirtí atá faoi imscrúdú, nó nuair a chuireann sé agallamh ar an bpáirtí atá faoi imscrúdú, ba cheart dó an páirtí sin a chur ar an eolas faoi raon feidhme an imscrúdaithe. Chun raon feidhme an imscrúdaithe a thuiscint, áfach, ní gá ach go dtuigfeadh an duine lena mbaineann cineál na líomhaintí a rinneadh ina choinne nó ina coinne. Ní gá cuntas mionsonraithe a thabhairt don duine sin ar an bhfianaise a bailíodh go dtí seo chun tacú leis na líomhaintí sin.

Nuair a bheidh an fhianaise go léir bailithe, agus nuair a bheidh cinneadh a dhéanann dochar do dhuine ar tí a bheith glactha, ceanglaítear leis an gceart chun éisteacht a fháil ansin go dtabharfar an deis don duine lena mbaineann trácht a dhéanamh ar an bhfianaise atá le húsáid chun críocha an chinnidh sin. Dá bhrí sin, níl raon feidhme na faisnéise a aistrítear chuig an duine lena mbaineann chun go mbeidh an duine sin in ann raon feidhme fiosrúcháin a thuiscint chomh fairsing le raon feidhme na faisnéise nach mór a aistriú chuig duine chun go mbeidh an duine sin in ann an ceart chun éisteacht a fháil a fheidhmiú.