Is léir ó fhoclaíocht na rialacha ("oifigeach a bhfuil sé beartaithe aige ", "cosc a chur air ", "ar mian leis dul i mbun sannta") gur cheart an fhaisnéis ábhartha a sholáthar don institiúid lena mbaineann in am trátha sula dtosóidh an t-oifigeach atá ag imeacht ar a shannachán nua nó ar a sannadh nua. Ós rud é gurb é is cuspóir do na rialacha ábhartha coinbhleacht leasa a d’fhéadfadh a bheith ann a chosc, ba cheart an cinneadh maidir le cibé acu a d’fhéadfadh nó nach bhféadfadh coinbhleacht leasa teacht chun cinn a dhéanamh in aon chás sula nglacfar leis an bhfostaíocht nua. Is léir gur cheart d’institiúid gach beart is gá a dhéanamh chun a áirithiú go gcomhlíonfaidh gach ball dá foireann na rialacha thuasluaite. I gcás ina nglacfaidh ball foirne le post nua gan faisnéis a thabhairt roimh ré, ní mór don institiúid lena mbaineann, a luaithe a aimseoidh sí an cás, gníomhaíocht leantach iomchuí a dhéanamh.