Il-każ kien jikkonċerna kif l-Aġenzija tal-Unjoni Ewropea għall-Ażil (EUAA) indirizzat allegazzjonijiet ta’ ksur tad-drittijiet fundamentali fl-attivitajiet tagħha fil-gżira Griega ta’ Samos. L-ilmentaturi kienu mħassba li l-mod kif il-ħaddiema tal-każijiet skjerati fit-timijiet ta’ appoġġ għall-ażil tal-EUAA wettqu intervisti ma’ persuni vulnerabbli li jfittxu l-ażil kien kontra d-dritt tal-UE, u li l-EUAA kienet naqset milli tindirizza dan. Barra minn hekk, l-ilmentaturi kienu mħassba dwar kif l-EUAA ttrattat ir-rapporti ta’ pushbacks tal-applikanti għall-ażil.

L-Ombudsman sabet li, fiż-żmien tal-ilment, l-EUAA kienet naqset milli tiżgura li l-ħaddiema tal-każijiet skjerati fit-timijiet ta’ appoġġ għall-ażil tagħha kienu lesti jwettqu intervisti kif xieraq ma’ persuni vulnerabbli li jfittxu l-ażil, inkluż fir-rigward ta’ kif għandhom jitqiesu l-indikaturi tal-vulnerabbiltajiet meta dawn jitfaċċaw għall-ewwel darba matul l-intervista dwar l-ażil. L-Ombudsman sabet ukoll li l-EUAA naqset milli tipprovdi lill-persuni vulnerabbli li jfittxu l-ażil bi proċedura xierqa biex jirrapportaw l-iżbalji li saru matul l-intervisti u biex tali rapporti jiġu rieżaminati mill-EUAA. L-Ombudsman sabet li dan kien jikkostitwixxi amministrazzjoni ħażina u għamlet erba’ rakkomandazzjonijiet lill-EUAA biex tindirizza n-nuqqasijiet.

L-Ombudsman bagħtet ukoll dawn ir-rakkomandazzjonijiet lill-kontropartijiet tagħha min-Network Ewropew tal-Ombudsmen (ENO), fejn fittxet il-fehmiet tagħhom dwar kif tiġi żgurata l-konformità mad-drittijiet fundamentali fil-kooperazzjoni bejn il-ħaddiema tal-każijiet tal-EUAA u l-uffiċjali nazzjonali tal-ażil.

Barra minn hekk, l-Ombudsman identifikat nuqqasijiet importanti fir-rigward ta’ kif l-EUAA ttrattat id-divulgazzjoni mill-applikanti għall-ażil tal-esperjenzi ta’ pushbacks matul l-intervisti. Peress li l-EUAA bdiet timplimenta miżuri biex tirrimedja dawn in-nuqqasijiet matul l-inkjesta tal-Ombudsman, hija ma sabitx amministrazzjoni ħażina iżda minflok għamlet żewġ suġġerimenti għal titjib.