Wara lment minn trainee żagħżugħ tal-UE, l-Ombudsman Ewropew, Emily O'Reilly, irrakkomandat li s-Servizz Ewropew għall-Azzjoni Esterna (SEAE) iħallas lit-trainees kollha tiegħu allowance xierqa biex jippermetti aċċess akbar għaż-żgħażagħ minn kull sfond.

Is-SEAE għandu kważi 800 trainee fid-delegazzjonijiet tiegħu madwar id-dinja li s-servizzi full-time tagħhom mhumiex remunerati.

It-trainees iridu jkopru l-ispejjeż kollha tagħhom inklużi l-akkomodazzjoni, l-ivvjaġġar u l-assigurazzjoni tas-saħħa, sistema li tiddiskrimina b’mod ċar kontra ħafna żgħażagħ b’mezzi limitati.

L-Ombudsman jgħid li l-allowance għandha tiżgura li ż-żgħażagħ jiġu mħeġġa japplikaw għal traineeship irrispettivament mill-istatus finanzjarju tagħhom.

“It-traineeships f’dak li huwa fil-fatt is-servizz barrani tal-UE jistgħu jkunu pass sinifikanti fil-karrieri taż-żgħażagħ u għandhom ikunu disponibbli għal firxa wiesgħa kemm jista’ jkun ta’ persuni,” qalet is-Sa O’Reilly.

“Apprendistati mhux imħallsa jistgħu jipperpetwaw l-esklużjoni soċjali billi de facto jipprevjenu lil xi żgħażagħ milli jtejbu l-ħiliet u l-kwalifiki tagħhom, li jista’ jkollhom effett indirett fuq il-karrieri ulterjuri tagħhom.  

“Is-servizz diplomatiku tal-UE għandu jmexxi bl-eżempju fid-dinja billi jiżgura li kulħadd ikollu opportunità ġusta u ugwali biex jiżgura dawn it-traineeships ta’ valur. Dan se jkun ta’ benefiċċju kemm għat-trainees kif ukoll għad-delegazzjonijiet,” qal l-Ombudsman.

L-Ombudsman ippropona li allowance xierqa tista' tkun ibbażata fuq l-għoli tal-ħajja fil-pajjiż fejn tinsab id-delegazzjoni. L-Ombudsman hija konxja li l-ħlas għat-trainees fid-delegazzjonijiet iqajjem kwistjonijiet baġitarji iżda hija tagħti parir li din il-kwistjoni titqajjem mal-awtorità baġitarja tal-UE (il-Parlament Ewropew u l-Istati Membri). 

Sfond

L-Ilmentatur, ċittadin Awstrijak, irrikorra għand l-Ombudsman wara li ħadem bħala trainee mhux imħallas f’delegazzjoni tal-UE fl-Asja. Għall-ewwel is-SEAE ma weġibx l-ilment tagħha u pprovda ftit informazzjoni. Matul l-inkjesta tal-Ombudsman, is-SEAE ħa passi biex jagħmel l-informazzjoni dwar it-traineeships li ġejjin fid-delegazzjonijiet tiegħu disponibbli għall-pubbliku.

Is-SEAE għandu network ta’ 139 delegazzjoni tal-UE madwar id-dinja li jimpjegaw kważi 6,000 persuna u fl-2016 offra madwar 800 traineeship bla ħlas. Madwar l-istituzzjonijiet tal-UE, minbarra s-SEAE, it-traineeships bi ħlas huma n-norma. Madankollu, jitħallsu t-trainees tas-SEAE bbażati fi Brussell.

Ir-Rakkomandazzjoni tal-Ombudsman Ewropew hija disponibbli hawnhekk.