L-inkjesta tal-Ombudsman Ewropew dwar l-approvazzjoni [1] tal-pestiċidi mill-Kummissjoni Ewropea tenfasizza tħassib dwar il-prattika tal-Kummissjoni (magħrufa bħala l-proċedura ta’ data konfermatorja) li tapprova l-użu sikur ta’ sustanza attiva qabel ma tikseb id-data kollha meħtieġa biex tappoġġa dik id-deċiżjoni.

L-Ombudsman tinnota l-aċċettazzjoni ġenerali tal-Kummissjoni tal-proposti tagħha, li saru f'Ġunju 2015, dwar kif jista' jittejjeb il-proċess ta' approvazzjoni għas-sustanzi li jinsabu fil-pestiċidi iżda talbet rapport ta' segwitu mill-Kummissjoni sat-18 ta' Frar 2018 sabiex tiġi vverifikata bis-sħiħ il-konformità.

Emily O'Reilly qalet: "Ninnota l-intenzjoni tal-Kummissjoni li ttejjeb il-proċess tal-approvazzjoni u t-tqegħid fis-suq tal-pestiċidi, b'mod partikolari billi tirrestrinġi l-prattika tal-approvazzjoni ta' sustanza filwaqt li fl-istess ħin titlob data li mistennija tikkonferma s-sikurezza tagħha, iżda qabel ma tirċievi d-data mitluba.

“Minħabba l-implikazzjonijiet importanti għall-ambjent kif ukoll għas-saħħa tal-bniedem u tal-annimali, tlabt lill-Kummissjoni biex tirrapporta lura fi żmien sentejn dwar kif implimentat il-proposti tiegħi.”

Il-każ tressaq minn Pesticide Action Network Europe (PAN-Europe), network ta’ NGOs. PAN-Europe allegat li l-mod kif il-Kummissjoni approvat is-sustanzi għall-pestiċidi, f’xi każijiet, ma kienx sikur u/jew ma kienx konformi mal-leġiżlazzjoni rilevanti.

L-Ombudsman analizzat il-prattika tal-Kummissjoni li tapprova s-sustanzi filwaqt li fl-istess ħin talbet data li tikkonferma s-sikurezza tagħhom. Hija eżaminat ukoll l-approvazzjoni tal-Kummissjoni ta' għaxar sustanzi attivi speċifiċi minkejja r-riżervi dwar is-sustanzi espressi mill-Awtorità Ewropea dwar is-Sigurtà fl-Ikel [2] (EFSA).

Wara l-analiżi tagħha, u fid-dawl tal-importanza tal-protezzjoni tas-saħħa u tal-ambjent fl-UE, l-Ombudsman għamlet diversi proposti biex ittejjeb is-sistema tal-approvazzjoni tal-pestiċidi tal-Kummissjoni.

Wara li eżaminat it-tweġibiet tal-Kummissjoni għall-proposti tagħha, l-Ombudsman qieset li l-Kummissjoni ħadet approċċ kostruttiv biex tillimita l-użu tal-proċedura ta' data konfermatorja. L-Ombudsman kien ukoll ġeneralment sodisfatt bl-intenzjoni ddikjarata tal-Kummissjoni li tikkonkludi l-valutazzjonijiet ta' għaxar sustanzi li kienet approvat qabel minkejja n-nuqqas ta' informazzjoni xjentifika adegwata dwar is-sikurezza tagħhom fiż-żmien tal-approvazzjonijiet.

Fl-għeluq tal-inkjesta tagħha, l-Ombudsman ikkonkludiet li filwaqt li l-Kummissjoni fil-biċċa l-kbira aċċettat il-proposti tagħha, verifika xierqa tal-konformità se tkun possibbli biss meta tirċievi rapport ulterjuri, fil-bidu tal-2018, mill-Kummissjoni.

L-Ombudsman tistenna li, fir-rapport tagħha tal-2018, il-Kummissjoni se tkun tista' turi li l-proċedura ta' data konfermatorja qed tintuża b'mod restrittiv; juru sorveljanza mtejba tal-użu tal-pestiċidi mill-Istati Membri, u juru li l-valutazzjonijiet li fadal tal-għaxar sustanzi enfasizzati minn PAN-Europe tlestew. Id-deċiżjoni tal-Ombudsman Ewropew hija disponibbli hawnhekk.

[1] Il-Kummissjoni tapprova s-sustanzi attivi użati fil-pestiċidi u l-Istati Membri individwali jawtorizzaw l-użu ta’ prodotti tal-pestiċidi bbażati fuq dawk is-sustanzi attivi.

[2] L-Awtorità Ewropea dwar is-Sigurtà fl-Ikel tipprovdi pariri lill-Kummissjoni matul il-proċess ta’ approvazzjoni.