L-Ombudsman Ewropew, Emily O'Reilly, fetħet investigazzjoni dwar kif il-Frontex tiżgura r-rispett tad-drittijiet fundamentali tal-migranti li huma soġġetti għal ritorni furzati mill-UE lejn il-pajjiżi ta’ oriġini tagħhom. L-aġenzija tal-UE, ibbażata f’Varsavja, tikkoordina u tiffinanzja operazzjonijiet konġunti ta’ ritorn (JROs) f’kooperazzjoni mal-Istati Membri. L-Ombudsman bagħtet lill-Frontex lista ta’ mistoqsijiet, inkluż min għandu r-responsabbiltà għall-benesseri tal-persuni rimpatrijati matul it-titjiriet u kif jista’ jiġi ggarantit monitoraġġ indipendenti matul il-JROs.

Emily O'Reilly qalet: “L-iżgurar li l-istituzzjonijiet tal-UE jirrispettaw id-drittijiet fundamentali huwa parti ewlenija mir-rwol tiegħi. Min-natura tagħhom stess, l-operazzjonijiet ta’ ritorn furzat għandhom il-potenzjal li jinvolvu ksur serju tad-drittijiet fundamentali. Permezz ta’ din l-investigazzjoni, irrid insir naf kif il-Frontex hija mgħammra biex tittratta ksur potenzjali u kif timminimizza r-riskju ta’ tali ksur.

Hekk kif iċ-ċittadini tal-UE qed jiffukaw dejjem aktar fuq l-immigrazzjoni, ir-rwol tal-Frontex qed ikun dejjem aktar fiċ-ċentru tal-attenzjoni. Is-sena l-oħra, appellajt lill-aġenzija biex tistabbilixxi mekkaniżmu tal-ilmenti għal ksur potenzjali tad-drittijiet fundamentali li jirriżulta mill-ħidma tagħha. Din l-investigazzjoni l-ġdida hija parti mill-ħidma li għaddejja tal-Ombudsman Ewropew f'dan il-qasam importanti."

Aktar minn 10 000 persuna rritornati f’operazzjonijiet konġunti tal-UE

Direttiva tal-UE tistabbilixxi standards u proċeduri komuni tal-UE għar-ritorn ta’ migranti irregolari minn pajjiżi terzi, inklużi applikanti għall-ażil miċħuda. Fl-2012, l-Istati Membri tal-UE ordnaw aktar minn 484 000 ċittadin mhux tal-UE biex jitilqu mit-territorju tagħhom, b’madwar 178 000 li fil-fatt jitilqu.

Il-Frontex tikkoordina operazzjonijiet konġunti ta’ ritorn, li fihom jikkooperaw diversi Stati Membri tal-UE. Bejn l-2006 u l-2013, saru 209 operazzjonijiet bħal dawn, li b’kollox irritornaw 10 855 persuna.

L-investigazzjoni tal-Ombudsman tinkludi l-kooperazzjoni tal-Frontex ma' korpi nazzjonali ta' monitoraġġ, bħall-ombudsmen. Emily O'Reilly kitbet lill-kollegi nazzjonali kollha tagħha fin-Netwerk Ewropew tal-Ombudsmen biex titlobhom kwalunkwe informazzjoni rilevanti dwar l-operazzjonijiet ta' ritorn.

L-inkjesta tinkludi wkoll mistoqsijiet dwar il-monitoraġġ tal-JROs, kif ukoll dwar it-trattament ta’ persuni rimpatrijati li huma, pereżempju, morda jew fi tqala avvanzata. Hija tqajjem ukoll kwistjonijiet ta’ implimentazzjoni fir-rigward tal-Kodiċi ta’ Kondotta tal-Frontex għall-JROs, bħall-istandards għall-iskorti, il-mekkaniżmi tal-ilmenti, u l-kooperazzjoni mal-Istati Membri tal-UE.

L-ittra tal-Ombudsman lill-Frontex hija disponibbli fuq: http://www.ombudsman.europa.eu/en/cases/correspondence.faces/en/58135/html.bookmark