Fl-okkażjoni tal-"Jum Internazzjonali tad-Dritt għall-Għarfien", fit-28 ta' Settembru, l-Ombudsman Ewropew, P. Nikiforos Diamandouros, appella lill-amministrazzjoni tal-UE biex tkun kemm jista' jkun trasparenti u faċli għaċ-ċittadini. Huwa u jitkellem f'avveniment li organizza flimkien ma' Transparency International fi Brussell, bit-titolu "Trasparenza fil-livell tal-UE u fl-Istati Membri", huwa qal: "Huwa biss jekk iċ-ċittadini Ewropej iħossu li l-amministrazzjoni tal-UE hija trasparenti, aċċessibbli u responsabbli, li jiżviluppaw il-fiduċja u r-rieda meħtieġa biex jipparteċipaw b'mod attiv fil-ħajja demokratika tal-Unjoni."

Ilmenti relatati mat-trasparenza u l-istandards etiċi

Aktar minn terz tal-inkjesti tal-Ombudsman jikkonċernaw ilmenti dwar nuqqas ta' trasparenza fl-amministrazzjoni tal-UE. Dawn l-ilmenti jikkonċernaw, pereżempju, l-aċċess għall-informazzjoni jew għad-dokumenti, il-kompożizzjoni tal-gruppi ta' ħidma, jew it-tfassil tal-politika tal-istituzzjonijiet.

Is-Sur Diamandouros enfasizza: "It-Trattat ta' Lisbona jipprevedi aktar trasparenza fl-attivitajiet tal-amministrazzjoni tal-UE. Dan jirrikjedi li l-Kunsill jiltaqa' fil-pubbliku meta jiddelibera dwar abbozz ta' leġislazzjoni u jkun fih id-dritt taċ-ċittadini ta' aċċess għad-dokumenti tal-istituzzjonijiet, il-korpi, l-uffiċċji u l-aġenziji kollha tal-UE, inkluż, għall-ewwel darba, il-Kunsill Ewropew. It-Trattat jirrikjedi wkoll li l-amministrazzjoni tal-UE twettaq il-ħidma tagħha bl-aktar mod miftuħ possibbli, sabiex tippromwovi l-governanza tajba u l-parteċipazzjoni tas-soċjetà ċivili. Jien impenjat li ninforma liċ-ċittadini dwar id-dritt tagħhom li jkunu jafu x’qed tagħmel l-amministrazzjoni tal-UE.”

L-Ombudsman jirċievi wkoll għadd dejjem akbar ta’ lmenti li jqajmu tħassib etiku. Dawn ivarjaw mill-kwistjoni ta' liema rigali l-uffiċjali tal-UE jistgħu jaċċettaw għall-kwistjoni ta' "revolving doors" fejn ex Kummissarji jew uffiċjali tal-UE jmorru fis-settur privat u b'hekk jirriskjaw li joħolqu kunflitti ta' interess. Bil-ħsieb li jiġu identifikati l-aħjar prattiki fir-rigward tal-prinċipji etiċi fundamentali li għandhom japplikaw għall-uffiċjali tal-UE, l-Ombudsman dan l-aħħar nediet konsultazzjoni mal-ombudsmen nazzjonali fl-Istati Membri.

Aktar informazzjoni dwar l-avveniment "Jum Internazzjonali tad-Dritt għall-Informazzjoni" hija disponibbli fuq:

http://www.ombudsman.europa.eu/activities/calendarevent.faces/en/400/html.bookmark

L-identità viżiva l-ġdida tal-Ombudsman

Mil-lum, l-Ombudsman Ewropew għandu identità viżiva ġdida, inkluż logo ġdid. Il-logo huwa mfassal biex itejjeb l-isforzi tal-Ombudsman biex jilħaq firxa wiesgħa ta' udjenzi, filwaqt li jevoka l-identità u l-valuri tal-istituzzjoni. Il-kuluri huma maħsuba biex iservu bħala tfakkira tal-bandiera Ewropea, filwaqt li l-forma ċirkolari tirrappreżenta unità u kunsens. Il-vleġeġ u s-sinjal tal-ugwali fil-logo rispettivament jissimbolizzaw l-iskambju u d-djalogu, kif ukoll l-ugwaljanza u l-ġustizzja, karatteristiċi ewlenin, jiġifieri, tal-metodoloġija tal-Ombudsman.