L-Ombudsman Ewropew fetħet inkjesta fuq inizjattiva proprja dwar il-ħlas tard mill-Kummissjoni wara li rċeviet għadd dejjem akbar ta' lmenti dwar il-kwistjoni.
F’ilmenti reċenti lill-Ombudsman, espert isostni li stenna aktar minn seba’ xhur u nofs għall-ħlas tal-ispejjeż u li ġie infurmat li “d-dewmien huwa inerenti fis-sistema”; ċentru ta' politika bbażat fi Brussell isostni li fattura ma tħallsitx għal aktar minn 16-il xahar u kumpanija stenniet disa' xhur għall-ħlas qabel ma kkuntattjat lill-Ombudsman minħabba tħassib li lment jista' jipperikola r-relazzjonijiet futuri tagħha mal-Kummissjoni.
Fl-inkjesta fuq inizjattiva proprja, l-Ombudsman titlob lill-Kummissjoni biex:

- jinformah dwar il-passi li jkun ħa biex jidentifika u jittratta l-kawżi tad-dewmien fil-ħlasijiet lill-kuntratturi u lill-benefiċjarji tal-għotjiet u s-sussidji;

- tippreżenta analiżi tal-kawżi tal-problema tal-ħlas tard u l-modi possibbli li bihom tista' tiġi ttrattata;

- tikkunsidra titjib fil-proċeduri li l-kuntratturi jistgħu jużaw biex jiksbu rimedju f’każ ta’ tilwima mal-Kummissjoni dwar l-adegwatezza tal-prestazzjoni tal-kuntrattur, jew tad-dokumentazzjoni li jkun ipprovda l-kuntrattur.

L-għadd ta’ impriżi u ċittadini li jistgħu jiġu affettwati minn problemi li jirriżultaw minn ħlas tard mill-Kummissjoni huwa potenzjalment kbir ħafna. Għalhekk, l-Ombudsman se jibgħat kopja tal-ittra tiegħu li tħabbar l-inkjesta lill-organizzazzjonijiet rappreżentattivi u jippubblikaha fuq is-sit web tiegħu (http://www.ombudsman.europa.eu). Dan se jipprovdi opportunità għall-pubbliku biex jissottometti osservazzjonijiet rilevanti għall-inkjesta.
L-inkjesta fuq inizjattiva proprja mhux se tittratta każijiet individwali, li jistgħu jkunu s-suġġett ta' lmenti separati lill-Ombudsman.
Għal aktar informazzjoni, jekk jogħġbok ċempel lis-Sur Ian Harden, Kap tas-Segretarjat, tel. + 33 (0)3 88 17 23 84.