L-Ombudsman Ewropew, P. Nikiforos Diamandouros, jilqa’ l-isforzi tal-Kummissjoni Ewropea biex tagħmel id-data dwar il-benefiċjarji tal-fondi tal-UE aktar trasparenti. Huwa jappoġġja l-proposti tal-Kummissjoni fil-Green Paper tagħha dwar l-Inizjattiva għat-Trasparenza biex jiġi introdott obbligu legali għall-Istati Membri biex jiżvelaw informazzjoni dwar min jirċievi flus l-UE.

L-Ombudsman irċeviet ilmenti dwar nuqqas ta' trasparenza fil-qasam tal-benefiċjarji tal-fondi tal-UE. Is-Sur Diamandouros qal: "Huwa fl-interess pubbliku ġenerali li tiġi pprovduta informazzjoni dwar kif jintefqu l-flus tal-kontribwenti tal-UE. L-ispjegazzjoni miftuħa ta’ x’jagħmlu l-UE u l-Istati Membri f’isem iċ-ċittadin tagħmel lill-Unjoni Ewropea aktar demokratika u aċċessibbli”.

Il-Green Paper tal-Kummissjoni ġiet adottata f’Mejju ta’ din is-sena bħala parti mill-Inizjattiva Ewropea għat-Trasparenza. Din l-Inizjattiva għandha l-għan li tagħmel l-Unjoni Ewropea u l-istituzzjonijiet tagħha aktar miftuħa u responsabbli. Il-konsultazzjonijiet dwar il-Green Paper se jintemmu dalwaqt.

Lobbying

L-Inizjattiva ta’ Trasparenza tipproponi wkoll aktar trasparenza fir-rigward tal-attività tal-gruppi ta’ lobbying fil-livell tal-UE u tipprevedi reviżjoni tar-regolament dwar l-aċċess għall-informazzjoni u d-dokumenti tal-istituzzjonijiet tal-UE.

Għadd ta’ partijiet ikkonċernati ssuġġerew rwol għall-Ombudsman fil-monitoraġġ ta’ reġim ta’ reġistrazzjoni tal-lobbjar jew kodiċi ta’ kondotta.

Is-Sur Diamandouros qal: "Għandi l-mandat li nissorvelja l-amministrazzjoni pubblika tal-UE u li naġixxi meta nsib amministrazzjoni ħażina fl-attivitajiet tal-istituzzjonijiet, il-korpi jew l-aġenziji tal-UE. Fir-rigward tal-uffiċjali tal-UE, naturalment nista’ nissorvelja l-attivitajiet tagħhom u nżommhom responsabbli, inkluż fil-qasam tal-lobbjar. Wieħed mill-aktar modi effettivi biex tiżdied il-fiduċja fl-amministrazzjoni huwa li tittejjeb it-trasparenza. Ir-reviżjoni ppjanata tar-regolament dwar l-aċċess għad-dokumenti tirrappreżenta test ewlieni għall-Kummissjoni biex turi kemm verament hija serja f'dan ir-rigward."

Is-Sur Diamandouros żied, madankollu, li t-Trattat ma jagħtix lill-Ombudsman il-mandat li jikkontrolla l-attivitajiet ta' korpi privati bħal gruppi ta' interess. "Dan mhuwiex parti mir-rwol normali ta' Ombudsman."