L-Ombudsman Ewropew, P. Nikiforos Diamandouros, irċieva għadd kbir ta' lmenti minn ċittadini dwar il-mewt ta' immigranti li kienu qed jiġu trasportati illegalment mill-kosta tal-Afrika ta' Fuq lejn in-Nofsinhar ta' Spanja. L-ilmentaturi jirreferu prinċipalment għar-responsabbiltà tal-gvernijiet Spanjoli u Marokkini għall-imwiet li jirriżultaw minn din l-immigrazzjoni illegali. Huma jissuġġerixxu li dawn l-awtoritajiet u, b'estensjoni, l-awtoritajiet tal-UE, għandhom jindirizzaw il-problema tal-immigrazzjoni illegali u jadottaw il-miżuri xierqa.

L-Ombudsman Ewropew jinvestiga lmenti dwar amministrazzjoni ħażina mill-istituzzjonijiet u l-korpi tal-Komunità Ewropea. Huwa ma jistax jittratta lmenti li jikkonċernaw l-amministrazzjonijiet nazzjonali, reġjonali jew lokali tal-Istati Membri. Ilmenti li jikkonċernaw il-ħtieġa għal, jew il-merti ta', leġiżlazzjoni Komunitarja jaqgħu lil hinn mill-kamp ta' applikazzjoni tas-setgħat tiegħu.

Għalhekk, l-Ombudsman Ewropew ta parir lill-ilmentaturi biex jirrikorru għand l-ombudsman nazzjonali Spanjol f'dak li għandu x'jaqsam mal-attivitajiet tal-amministrazzjoni Spanjola. Fir-rigward tas-suġġeriment tal-ilmentaturi li l-awtoritajiet tal-UE għandhom jieħdu pożizzjoni, ingħataw il-parir li jressqu petizzjoni lill-Parlament Ewropew, li għandu kemm setgħat investigattivi kif ukoll leġiżlattivi li jistgħu jintużaw fir-rigward ta' din il-kwistjoni.