Filwaqt li għalqet inizjattiva ta' sentejn dwar in-negozjati tal-Brexit, l-Ombudsman Ewropew Emily O'Reilly laqgħet il-livell ġeneralment għoli ta' trasparenza, u ħeġġet lill-Kummissjoni u lill-Kunsill biex iżommu dawn l-istandards fi kwalunkwe negozjati futuri dwar ir-relazzjonijiet.

Is-Sa O'Reilly mistennija tiltaqa' mal-Kap Negozjatur tal-UE, Michel Barnier, illum waranofsinhar fi Strasburgu.

Passi pożittivi mit-Taskforce tal-Kummissjoni dwar il-Brexit jinkludu l-pubblikazzjoni ta’ aktar minn 100 dokument ta’ negozjar, li jagħmlu l-kalendarju tas-Sur Barnier disponibbli għall-pubbliku, u li jiltaqgħu biss ma’ lobbisti rreġistrati. It-Taskforce ħadmet permezz ta’ qafas trasparenti stabbilit mill-Kunsill Ewropew.

Minħabba l-implikazzjonijiet kbar tal-Brexit għaċ-ċittadini u għan-negozji, l-Ombudsman kienet kitbet lill-Kummissjoni qabel ma ġie invokat l-Artikolu 50 biex tissuġġerixxi miżuri prattiċi ta' trasparenza.

L-Ombudsman immonitorjat kif il-pubbliku seta’ jsegwi t-taħditiet dwar l-irtirar, jagħmel aktar suġġerimenti dwar it-trasparenza, u jorganizza diversi laqgħat fil-livell tekniku mat-Taskforce.

“Minbarra l-prattika amministrattiva tajba, il-livell għoli ta’ trasparenza ta lin-negozjaturi tal-UE żewġ vantaġġi ċari. Hija żiedet il-leġittimità tagħhom f’għajnejn il-pubbliku u għenet biex l-UE tinżamm magħquda, hekk kif l-Istati Membri, il-Parlament Ewropew u ċ-ċittadini nżammu infurmati u inklużi f’kull pass fil-proċess,” qalet is-Sinjura O’Reilly.

“Dawn il-vantaġġi għandhom jitqiesu matul kwalunkwe negozjati futuri dwar ir-relazzjonijiet bejn l-UE u r-Renju Unit meta se jidħlu fis-seħħ fatturi differenti, se jkunu jridu jiġu involuti aktar partijiet ikkonċernati, u se jitfaċċaw diversi interessi settorjali biex jippruvaw jinfluwenzaw it-taħditiet.”

Sfond

L-Ombudsman kitbet lill-Kummissjoni u lill-Kunsill tal-UE f'Marzu 2017. Is-suġġerimenti tagħha għat-trasparenza kienu jinkludu l-pubblikazzjoni proattiva tad-dokumenti ta’ negozjar; li l-Kummissjoni għandha tiżgura kontribut wiesa’ tal-partijiet ikkonċernati, u li għandha tikkunsidra li tippubblika noti tekniċi konġunti li jagħtu dettalji dwar il-progress wara kull ċiklu ta’ negozjati.

It-Taskforce indirizzat 70 talba għal aċċess għal dokumenti li - minnhom tlieta ġew eskalati lill-Ombudsman – u wieġbet għal madwar 10,000 messaġġ mill-pubbliku.

It-Taskforce indikat li se terġa’ lura għall-proposti tal-Ombudsman dwar il-kontribut tal-partijiet ikkonċernati li jkun wiesa’ u inklużiv kemm jista’ jkun ladarba jibdew it-taħditiet dwar ir-relazzjoni futura bejn l-UE u r-Renju Unit.

Is-sommarju tal-Ombudsman ta’ dan il-proċess ta’ monitoraġġ jinsab hawnhekk.