Strasburgu, 10/03/2015

Għal: Konsultazzjoni mmirata fil-kuntest tal-OI/9/2014/MHZ

Għażiż Sur Leggeri,

Fl-20 ta' Ottubru 2014, ftaħt l-inkjesta fuq inizjattiva proprja msemmija hawn fuq fir-rigward ta' kif il-Frontex tiżgura r-rispett għad-drittijiet fundamentali fl-Operazzjonijiet Konġunti ta' Ritorn (JROs) tagħha. Nixtieq nirringrazzja lill-Frontex għall-opinjoni mibgħuta lili f’dan il-każ fil-31 ta’ Jannar 2015.

Fl-ittra tal-ftuħ tiegħi, infurmajt lill-Frontex li nista’ nikkunsidra li nagħti lill-partijiet terzi interessati l-opportunità li jagħmlu osservazzjonijiet dwar l-opinjoni tal-Frontex. B'dan nixtieq ninfurmak li stedint għadd ta' organizzazzjonijiet biex jagħmlu dan sas-6 ta' April 2015. Jekk jogħġbok sib, fl-anness, il-mistoqsijiet li elenkajt f’din il-konsultazzjoni mmirata.

Il-kontribuzzjonijiet li nirċievi se jintbagħtu lill-Frontex u nistenna wkoll li nippubblikahom fuq is-sit web tiegħi: www.ombudsman.europa.eu.

Dejjem tiegħek,

Emily O'Reilly

Għeluq: Mistoqsijiet elenkati fil-konsultazzjoni mmirata

Mistoqsijiet elenkati fil-konsultazzjoni mmirata tal-Ombudsman Ewropew dwar l-inkjesta fuq inizjattiva proprja OI/9/2014/MHZ

1. Taf bi ksur konkret tad-drittijiet fundamentali tal-persuni rimpatrijati jew każijiet ta’ trattament ħażin matul il-JROs (qabel it-tluq; waqt it-titjira; it-trasferiment tal-persuni rimpatrijati fil-pajjiż tad-destinazzjoni), jew fil-fażi ta’ wara r-ritorn (il-wasla tal-persuni rimpatrijati fil-pajjiż tad-destinazzjoni)?

2. Skont il-Frontex, għadu ma sar l-ebda lment fir-rigward ta’ JRO kkoordinat mill-Frontex. Liema azzjonijiet għandha tieħu l-Frontex, fil-fehma tiegħek, biex tippromwovi s-sensibilizzazzjoni fost il-persuni soġġetti għal JRO dwar il-possibbiltà li jressqu lment mal-Frontex u biex tiżgura li l-problemi tabilħaqq jinġiebu għall-attenzjoni tal-Frontex?

3. Il-Frontex tikkoordina relattivament ftit JROs, bl-Istati Membri jwettqu l-maġġoranza l-kbira tal-operazzjonijiet ta’ ritorn furzat. Madankollu, minħabba r-rwol ta’ koordinazzjoni tagħha, x’taħseb li tista’ tagħmel aktar il-Frontex biex tippromwovi fost l-Istati Membri standards minimi u prattiki tajbin li jiżguraw ir-rispett għad-drittijiet tal-bniedem u d-dinjità tal-persuni rimpatrijati? Taħseb li l-Kodiċi tal-Frontex għal operazzjonijiet konġunti ta’ ritorn u l-Aħjar Prattiki tiegħu għall-JROs huma biżżejjed f’dan ir-rigward, speċifikament fir-rigward tal-istandards dwar l-idoneità għall-ivvjaġġar u l-eżami mediku, l-użu ta’ miżuri koerċittivi u r-ritorn ta’ persuni vulnerabbli, b’mod partikolari familji bit-tfal?

4. Taħseb li l-Kodiċi u l-Aħjar Prattiki jipprevedu salvagwardji suffiċjenti f’termini ta’ rispett għad-drittijiet tal-bniedem, id-dinjità u l-benesseri tal-persuni rimpatrijati abbord meta jiġu applikati għall-hekk imsejħa “JROs Kollettivi”^[1]?

5. Il-JROs għandhom jiġu mmonitorjati minn monitor wieħed maħtur mill-pajjiż li jospita l-operazzjoni (il-pajjiż li jirritorna l-akbar grupp), jew ikun aħjar li kull pajjiż li jipparteċipa fl-operazzjoni jaħtar monitor wieħed biex ikun preżenti matul il-JROs?

6. X’jista’ jsir aktar biex jittejjeb l-iskambju ta’ prattiki tajba ta’ monitoraġġ bejn l-osservaturi nazzjonali? X'tista' tagħmel aktar il-Frontex f'dan ir-rigward? [Fl-opinjoni tagħha, il-Frontex issemmi li tistieden lill-korpi nazzjonali ta’ monitoraġġ għal-laqgħat tal-Punti ta’ Kuntatt Dirett fi Kwistjonijiet ta’ Ritorn u tappoġġa l-proġett immexxi miċ-Ċentru Internazzjonali għall-Iżvilupp tal-Politika dwar il-Migrazzjoni biex tinħoloq riżerva Ewropea ta’ osservaturi indipendenti tar-ritorn furzat.]

7. Fl-opinjoni tagħha, il-Frontex tiddikjara li: (i) l-istandards ta’ mġiba fl-użu tal-forza huma rregolati mil-liġi nazzjonali; (ii) l-uniċi restrizzjonijiet/tagħmir li jistgħu jintużaw matul il-JROs huma dawk li huma fil-lista mfassla mill-Istat Membru organizzatur u appoġġati mill-firma tal-Frontex dwar il-Pjan ta’ Implimentazzjoni, u (iii) l-ebda Stat Membru parteċipanti ma huwa permess juża restrizzjonijiet mhux permessi skont il-leġiżlazzjoni nazzjonali tiegħu anke jekk dawk il-miżuri jiġu aċċettati mill-Istat Membru organizzatur u mill-Frontex. Barra minn hekk, l-osservaturi normalment josservaw/jirrapportaw dwar id-deċiżjonijiet u l-azzjonijiet fiż-żamma tal-liġi nazzjonali tagħhom mill-impjegati/l-iskorti pubbliċi nazzjonali preżenti abbord.

Għandek xi suġġerimenti dwar kif jiġi ffaċilitat ir-rapportar tal-osservaturi preżenti abbord fejn jiġu fdati bir-rapportar f’isem diversi Stati Membri parteċipanti skont l-Artikolu 14.5 tal-Kodiċi (“Meta jkun fattibbli u soġġett għal ftehim minn qabel bejn l-Istati Membri kkonċernati, l-osservaturi jistgħu jimmonitorjaw ukoll f’isem Stati Membri oħra li jieħdu sehem fil-JRO “-” il-prinċipju ta’ monitor wieħed għal kull titjira).

8. Taħseb li l-informazzjoni pprovduta mill-Frontex fuq is-sit web tagħha fir-rigward tal-JROs hija biżżejjed biex tiġi żgurata t-trasparenza tagħhom? Taħseb li r-rapporti tal-osservaturi li josservaw il-JROs għandhom jiġu ppreżentati lill-awtoritajiet nazzjonali jew lill-Frontex jew lit-tnejn? Ir-rapporti għandhom jiġu ppubblikati jew le? Jekk iva, għandhom jiġu ppubblikati fuq is-sit web tal-Istati Membri jew tal-Frontex?

9. Għandek kummenti oħra dwar l-opinjoni tal-Frontex? Jekk jogħġbok kun konċiż u konkret kemm jista’ jkun.

[1] F’dawn il-JROs, il-pajjiż terz li fih jiġu rritornati l-migranti jipprovdi l-ajruplan, l-iskorti u l-persunal mediku għall-operazzjoni. It-trasferiment tal-migranti mill-awtoritajiet/l-iskorti nazzjonali jseħħ f’ajruport fl-UE. Il-Frontex tipprovdi taħriġ lil skorti ta’ pajjiżi terzi.