Strasburgu, 20/10/2014

Inkjesta fuq inizjattiva proprja OI/9/2014/MHZ dwar il-mezzi li permezz tagħhom il-Frontex tiżgura r-rispett għad-drittijiet fundamentali f’operazzjonijiet konġunti ta’ ritorn (JROs)

Għażiż/a Kollega,

Qed niktiblek biex ninfurmak li ddeċidejt li neżamina u nevalwa, permezz ta’ inkjesta fuq inizjattiva proprja, kif il-Frontex (l-Aġenzija Ewropea għall-Ġestjoni tal-Kooperazzjoni Operazzjonali fil-Fruntieri Esterni tal-UE) tiżgura li l-operazzjonijiet konġunti ta’ ritorn (JROs) jirrispettaw id-drittijiet fundamentali tal-persuni li huma soġġetti għal ritorni furzati.

Jekk jogħġbok sib mehmuża l-ittra lill-Frontex li tispjega l-inkjesta fuq inizjattiva proprja.

L-ambitu tal-inkjesta jinkludi l-kooperazzjoni tal-Frontex mal-korpi nazzjonali ta’ monitoraġġ. Nifhem li, minbarra l-monitoraġġ tal-operazzjonijiet ta’ ritorn imwettqa minn Stati Membri individwali, il-korpi nazzjonali ta’ monitoraġġ jipparteċipaw ukoll fil-monitoraġġ tal-JROs ikkoordinati u organizzati mill-Frontex [1]. Dawn il-korpi jirrapportaw lill-awtoritajiet nazzjonali tagħhom u l-valutazzjoni tagħhom issir abbażi tar-regoli u l-prattika nazzjonali.

Wieħed mill-objettivi tal-inkjesta fuq inizjattiva proprja huwa li tippromwovi kooperazzjoni effettiva (i) bejn il-korpi ta’ monitoraġġ u l-Frontex u (ii) fost il-korpi ta’ monitoraġġ infushom. Nifhem li saru JROs li fihom osservaturi nazzjonali minn diversi Stati Membri akkumpanjaw lill-persuna/i rimpatrijata/i "tagħhom". Napprezza ħafna l-fehma tiegħek dwar jekk kooperazzjoni akbar fost il-korpi ta’ monitoraġġ tkunx fattibbli u mixtieqa. B’mod partikolari, jistgħu jinkisbu riżultati aħjar billi tiġi evitata d-duplikazzjoni tal-korpi ta’ monitoraġġ fuq it-titjiriet, filwaqt li jiġi żgurat ukoll li kull titjira fil-fatt tinkludi korp ta’ monitoraġġ?

B’mod aktar ġenerali, minħabba r-rwol importanti ta’ monitoraġġ li għandhom għadd ta’ uffiċċji nazzjonali tal-ombudsmen, nixtieq nistieden kontribut mill-ombudsmen fin-Network Ewropew tal-Ombudsmen dwar l-inkjesti possibbli tagħhom fir-rigward tal-monitoraġġ tal-operazzjonijiet ta’ ritorn. Fil-fehma tiegħi, l-inkjesti paralleli jistgħu jindirizzaw ħafna mill-kwistjonijiet tad-drittijiet fundamentali li jirriżultaw minn operazzjonijiet ta’ ritorn, kemm jekk uniċi kif ukoll konġunti, u b’hekk jgħinu biex titnaqqas it-tbatija umana li potenzjalment jiltaqgħu magħha dawk li jiġu rritornati bil-forza.

Napprezza jekk tkun tista’ tinfurmani bil-fehmiet tiegħek fir-rigward ta’ (i) il-potenzjal għal aktar kooperazzjoni fost il-korpi ta’ monitoraġġ u (ii) jekk tqisx li huwa fattibbli li tniedi inkjesta f’dan il-qasam, f’pajjiżek stess, u kwalunkwe informazzjoni rilevanti li tista’ tipprovdi f’dan ir-rigward.

Bil-permess tiegħek, nixtieq nibgħat it-tweġiba tiegħek lill-Frontex. Fl-interess tat-trasparenza, nixtieq ukoll nagħmilha disponibbli għall-pubbliku fuq is-sit web tiegħi. Jekk tqis li jkun utli li tinkludi kwalunkwe informazzjoni fit-tweġiba tiegħek li ma għandhiex issir pubblika (pereżempju, minħabba li tikkonċerna individwi identifikabbli), jekk jogħġbok ipprovdi tali informazzjoni separatament.

Jekk is-servizzi tiegħek jeħtieġu aktar informazzjoni jew kjarifiki dwar din l-inkjesta fuq inizjattiva proprja, jekk jogħġbok toqgħodx lura milli tikkuntattja lis-Sinjura Marta Hirsch-Ziembinska (+33 388 17 27 46), Kap tal-Unità tal-Ilmenti u l-Inkjesti.

Dejjem tiegħek,

Emily O'Reilly

Għeluq: kopja tal-ittra lill-Frontex datata...

[1] Tali kooperazzjoni hija prevista mill-Artikolu 9(1b) tar-Regolament Frontex (ir-Regolament 1168/2011 tal-25 ta’ Ottubru 2011 li jemenda r-Regolament tal-Kunsill (KE) Nru 2007/2004 li jistabbilixxi Aġenzija Ewropea għall-Ġestjoni ta’ Kooperazzjoni Operazzjonali fil-Fruntieri Esterni tal-Istati Membri tal-Unjoni Ewropea, ĠU 2011, L 304), flimkien mal-Artikolu 8(6) tad-Direttiva dwar ir-Ritorn (id-Direttiva 2008/115/KE tas-16 ta’ Diċembru 2008, dwar standards u proċeduri komuni fl-Istati Membri għar-ritorn ta’ ċittadini ta’ pajjiżi terzi li jkunu qegħdin fil-pajjiż illegalment, ĠU 2008, L 348).