L-Ombudsman huwa tal-fehma li huwa importanti li applikant ikollu mill-inqas għarfien ġenerali suffiċjenti tal-identità u l-kontenut tad-dokumenti mitluba sabiex jeżerċita dan id-dritt ta' konfutazzjoni. Dan ċertament ikun il-każ jekk id-dokumenti kienu diġà elenkati f’reġistru pubbliku ta’ dokumenti jew jekk id-dokumenti kienu elenkati fit-tweġiba għall-applikazzjoni inizjali. Jekk istituzzjoni ma tkunx għamlet użu minn preżunzjoni ġenerali fit-tweġiba tagħha għal applikazzjoni inizjali, iżda pjuttost tkun wettqet eżami konkret u individwali tad-dokumenti mitluba, tkun ukoll amministrazzjoni tajba għall-istituzzjoni li tidentifika d-dokumenti li tkun eżaminat meta wieġbet għall-applikazzjoni inizjali. Dan jippermetti lill-applikant jagħmel applikazzjoni konfermatorja infurmata li tistabbilixxi għaliex iqis li l-analiżi tal-istituzzjoni mhijiex adegwata.