Assoċjazzjoni għad-difiża tal-lingwa Ġermaniża lmentat dwar in-nuqqas tal-Kunsill li jiżgura li s-siti web tal-Presidenza jkunu disponibbli bil-Ġermaniż.

L-ilmentatur indika li aktar ċittadini tal-UE kellhom il-Ġermaniż bħala l-lingwa materna tagħhom minn kwalunkwe lingwa oħra u li, wara l-adeżjoni tal-Istati Membri l-ġodda, il-Ġermaniż kien, ħdejn l-Ingliż, il-lingwa mifhuma mill-biċċa l-kbira taċ-ċittadini tal-UE, jew bħala l-lingwa materna tagħhom jew bħala lingwa barranija. L-ilmentatur sostna wkoll li l-komunikazzjonijiet mill-istituzzjonijiet tal-UE li kienu prinċipalment indirizzati lill-pubbliku għandhom ikunu aċċessibbli għal kemm jista’ jkun ċittadini tal-UE. Fejn in-numru ta' lingwi użati kien limitat, din l-għażla għandha, fil-fehma tal-ilmentatur, tkun ibbażata fuq il-piż demografiku ta' dawn il-lingwi. L-ilmentatur għalhekk sabha inkomprensibbli li s-siti web tal-Presidenza normalment jużaw biss l-Ingliż u l-Franċiż, minbarra l-lingwa tal-pajjiż li jkollu l-Presidenza.

Filwaqt li aċċetta li l-Presidenza tifforma parti mill-Kunsill bħala istituzzjoni, il-Kunsill sostna li ma għandha l-ebda responsabbiltà għas-siti elettroniċi tal-Presidenza, bl-argument li dawn jaqgħu taħt l-awtorità tal-Istati Membri li jkollhom il-Presidenza.

Fil-fehma tal-Ombudsman, peress li l-Presidenza b'mod ċar tifforma parti mill-Kunsill, il-websajts tal-Presidenza ma jistgħux jitqiesu bħala websajts "nazzjonali" li huma barra mill-ambitu tal-liġi Komunitarja. Konsegwentement, il-kwistjoni tal-lingwi użati fuq is-siti web tal-Presidenza ma tistax titqies li tmur lil hinn mill-kamp ta' applikazzjoni tal-Kunsill. Għalhekk, l-Ombudsman qieset li n-nuqqas tal-Kunsill li jikkunsidra s-sustanza tat-talba tal-ilmentatur kien jikkostitwixxi amministrazzjoni ħażina. Għaldaqstant, l-Ombudsman għamlet abbozz ta' rakkomandazzjoni dwar il-kwistjoni.

Wara li l-Kunsill irrifjuta l-abbozz ta' rakkomandazzjoni, l-Ombudsman għamel rapport speċjali lill-Parlament Ewropew fit-30 ta' Novembru 2006, fejn talab l-appoġġ tal-Parlament fir-rigward tal-konklużjonijiet li ġejjin ta' l-inkjesta tiegħu:

(i) il-Kunsill huwa responsabbli għal-lingwi użati fuq is-siti web tal-Presidenza tiegħu;

(ii) l-informazzjoni fuq is-sit web tal-Presidenza tal-Kunsill idealment għandha tkun disponibbli fil-lingwi uffiċjali kollha tal-Komunità;

(iii) jekk in-numru ta’ lingwi użati fuq is-sit web tal-Presidenza tal-Kunsill għandu jkun limitat, l-għażla tal-lingwi li għandhom jintużaw għandha tkun ibbażata fuq kunsiderazzjonijiet oġġettivi u raġonevoli; u

(iv) ir-rifjut tal-Kunsill li jittratta s-sustanza tal-każ, jiġifieri, it-talba tal-ilmentatur li l-preżentazzjonijiet fuq l-internet tal-Presidenzi għandhom ikunu disponibbli bil-Ġermaniż ukoll, għalhekk mhuwiex ġustifikat u jikkostitwixxi amministrazzjoni ħażina.