Il-każ preżenti jikkonċerna l-mod li bih il-Kummissjoni Ewropea ttrattat ilment imressaq lilha fl-2006 minn 27 inizjattiva taċ-ċittadini ("il-kwerelanti") li qed jiġġieldu kontra dak li huma qiesu bħala l-konsegwenzi negattivi tal-espansjoni tal-ajruport ta' Vjenna. Il-Kummissjoni waslet għall-konklużjoni li x-xogħlijiet rilevanti twettqu mingħajr il-valutazzjoni obbligatorja tal-impatt ambjentali (“VIA”) meħtieġa mid-Direttiva 85/337/KEE. Sabiex tirrimedja din l-ommissjoni, hija qablet mal-awtoritajiet Awstrijaċi li dawn tal-aħħar iwettqu VIA ex post, billi jissimulaw bl-aħjar mod possibbli VIA ex ante u jagħmlu possibbli valutazzjoni sħiħa tal-impatt ambjentali tal-proġetti rilevanti. Ir-rapport finali dwar din il-proċedura ġie ppreżentat lill-Kummissjoni fi Frar 2011.

L-ilmentaturi ma kinux kuntenti bil-mod li bih twettqet il-VIA ex post. Fost affarijiet oħra, huma kkritikaw li (i) l-awtorità inkarigata mill-proċedura rilevanti kienet l-istess awtorità li kienet tat il-permessi għax-xogħlijiet rilevanti u għalhekk sabet ruħha f’kunflitt ta’ interess evidenti u (ii) li ma kellhiex aċċess għal proċedura ta’ rieżami, kif previst mid-direttiva rilevanti tal-UE.

Fl-2008, l-ilmentaturi rrikorrew għand l-Ombudsman Ewropew (ilment 1532/2008). Wara li eżamina l-kwistjoni, l-Ombudsman kien tal-fehma li l-argumenti tal-ilmentaturi dwar iż-żewġ kwistjonijiet ta' hawn fuq dehru li kienu fondati mal-ewwel daqqa t'għajn u li, f'dak il-mument, huwa għalhekk ma setax jikkonkludi li l-Kummissjoni kienet żgurat li l-VIA ex post kienet twettqet kif suppost. Madankollu, peress li l-proċedura kienet għadha għaddejja u li l-Kummissjoni kienet iddikjarat li kienet se tagħlaq il-każ ta’ ksur biss meta kienet sodisfatta li l-awtoritajiet Awstrijaċi kienu ħadu l-passi meħtieġa, l-Ombudsman qies li ma kienx hemm bżonn ta’ azzjoni ulterjuri min-naħa tiegħu f’dak l-istadju. Għalhekk, huwa għalaq l-inkjesta tiegħu f’Diċembru 2009, u għamilha ċara li huwa kien jaf li l-Kummissjoni kienet se tqis is-sejbiet tiegħu.

F'Novembru 2010, l-ilmentaturi reġgħu rrikorrew għand l-Ombudsman (ilment 2591/2010). L-Ombudsman fetaħ it-tieni inkjesta, li matulha huwa spezzjona l-fajl tal-Kummissjoni. L-ispezzjoni wriet li l-fajl ma kien fih l-ebda korrispondenza sinifikanti oħra bejn il-Kummissjoni u l-awtoritajiet Awstrijaċi matul il-perjodu meta kienet qed titwettaq il-VIA ex post. B’mod partikolari, ma kien hemm xejn li jissuġġerixxi li r-rappreżentazzjonijiet li l-ilmentaturi għamlu matul dak il-perjodu kienu ġew diskussi bil-miktub mal-awtoritajiet Awstrijaċi. Id-deċiżjoni tal-Ombudsman dwar l-ilment 1532/2008 lanqas ma dehret li tat lok għal tali korrispondenza. Din is-sitwazzjoni wasslet lill-Ombudsman għall-konklużjoni li l-Kummissjoni naqset milli tqis is-sejbiet tiegħu mill-ewwel inkjesta. Għalhekk huwa għamel abbozz ta' rakkomandazzjoni fejn ħeġġeġ lill-Kummissjoni terġa' tikkunsidra l-pożizzjoni tagħha. Dan l-abbozz ta’ rakkomandazzjoni ma rnexxiex.

L-Ombudsman qies li dan il-każ kien jikkostitwixxi eżempju deplorevoli ta' sitwazzjoni fejn il-Kummissjoni (i) naqset milli tieħu azzjoni ta' rimedju xierqa fir-rigward ta' ksur ċar tad-dritt tal-UE f'każ importanti u (ii) għażlet li tinjora l-parir tal-Ombudsman. Għalhekk huwa kien tal-fehma li kien xieraq li l-kwistjoni tinġieb għall-attenzjoni tal-Parlament Ewropew. L-Ombudsman għalhekk għalaq l-inkjesta tiegħu b'rapport speċjali lill-Parlament.