L-Ombudsman fetħet inkjesta fuq inizjattiva proprja dwar kif il-Kummissjoni Ewropea biħsiebha tiggarantixxi r-rispett għad-drittijiet tal-bniedem fil-kuntest tal-Memorandum ta' Qbil (MtQ) bejn l-UE u t-Tuneżija. L-inkjesta tkompli fuq inizjattiva strateġika dwar l-istess kwistjoni.

L-Ombudsman enfasizzat it-tħassib dwar in-nuqqas ta' valutazzjoni minn qabel tal-impatt fuq id-drittijiet tal-bniedem, b'mod partikolari relatata mal-pilastru "Migrazzjoni u mobbiltà" tal-MtQ u l-azzjonijiet previsti taħt dak il-pilastru. Hija talbet lill-Kummissjoni twieġeb sensiela ta' mistoqsijiet dwar kif biħsiebha timmonitorja l-impatt fuq id-drittijiet tal-bniedem tal-azzjonijiet taħt il-MtQ u liema miżuri pprevediet, inkluż fir-rigward tas-sospensjoni possibbli tal-finanzjament tal-UE, jekk jiġi identifikat ksur tad-drittijiet tal-bniedem.

L-Ombudsman sabet li l-Kummissjoni kienet adottat dokument li jistabbilixxi kif għandu jiġi vvalutat l-impatt tal-proġetti fuq id-drittijiet tal-bniedem fl-ambitu tal-MtQ, u introduċiet miżuri għall-monitoraġġ tal-konformità mad-drittijiet tal-bniedem. Madankollu, il-Kummissjoni naqset milli tagħmel din l-informazzjoni pubblika. L-Ombudsman għamlet suġġerimenti għal titjib biex dan jiġi indirizzat. L-Ombudsman issuġġeriet ukoll li l-Kummissjoni telabora kriterji konkreti li jistabbilixxu kif se tissospendi kuntratti ffinanzjati mill-UE relatati mal-ġestjoni tal-migrazzjoni fejn issib evidenza ta’ ksur tad-drittijiet tal-bniedem minn riċevituri ta’ fondi (kuntratturi). F'dan il-kuntest, hija ssuġġeriet ukoll li l-Kummissjoni tħeġġeġ lis-sħab ta' implimentazzjoni tagħha taħt il-MtQ biex jistabbilixxu mekkaniżmi ta' lment fejn l-individwi jistgħu jirrapportaw allegat ksur tad-drittijiet tal-bniedem tagħhom.