Din l-inkjesta fuq inizjattiva proprja kienet tikkonċerna kif il-Kummissjoni Ewropea tiddeċiedi dwar l-applikazzjonijiet sottomessi mill-kumpaniji għall-awtorizzazzjonijiet ta’ użi speċifiċi ta’ sustanzi kimiċi partikolarment perikolużi. Skont ir-Regolament tal-UE dwar ir-Reġistrazzjoni, il-Valutazzjoni, l-Awtorizzazzjoni u r-Restrizzjoni ta’ Sustanzi Kimiċi (ir-“Regolament REACH”), filwaqt li dan il-proċess tat-teħid tad-deċiżjonijiet għadu għaddej, il-kumpaniji li ppreżentaw l-applikazzjonijiet fi żmien skadenza jistgħu jkomplu jużaw is-sustanzi fl-UE. Tqajjem tħassib dwar dewmien fil-proċess tat-teħid tad-deċiżjonijiet, li jfisser li sustanzi perikolużi bħal dawn jibqgħu jintużaw.

L-Ombudsman sabet li d-dewmien sistemiku mill-Kummissjoni u n-nuqqas konsegwenti tagħha li tirrispetta l-iskadenzi statutorji fil-proċess tat-teħid tad-deċiżjonijiet jikkostitwixxu amministrazzjoni ħażina. Biex tindirizza dan, l-Ombudsman għamlet rakkomandazzjoni li l-Kummissjoni tirrevedi l-proċeduri interni tagħha biex tiżgura li tkun tista’ tieħu deċiżjonijiet aktar rapidi dwar dawn l-applikazzjonijiet. Dan jirrifletti l-għan tal-leġiżlazzjoni, li huwa li telimina jew tikkontrolla b’mod urġenti l-użu ta’ sustanzi kimiċi partikolarment perikolużi. Bħala parti minn dan, jenħtieġ li l-Kummissjoni tiżgura li l-kumpaniji li japplikaw għall-awtorizzazzjonijiet jissodisfaw l-obbligu tagħhom li jissottomettu applikazzjonijiet li jkun fihom biżżejjed informazzjoni biex il-Kummissjoni tiddeċiedi jekk il-kundizzjonijiet legali għall-awtorizzazzjoni jkunux ġew issodisfati. Jenħtieġ li l-Kummissjoni tipprijoritizza wkoll ir-rifjut ta’ dawk l-applikazzjonijiet li ma fihomx biżżejjed informazzjoni, sabiex ma jkunux jistgħu jkomplu jikkummerċjalizzaw is-sustanzi għall-użu inkwistjoni.

L-Ombudsman kienet ukoll tal-fehma li l-Kummissjoni tonqos milli tiżgura trasparenza suffiċjenti tal-proċess tat-teħid tad-deċiżjonijiet. Biex tindirizza dan, l-Ombudsman irrakkomandat li l-Kummissjoni tippubblika rapporti aktar sinifikanti mil-laqgħat tal-“Kumitat REACH”, li japprova d-deċiżjonijiet finali. Dawn ir-rapporti għandhom jiġu ppubblikati fil-ħin, sabiex il-pubbliku jkun jista' jsegwi l-ħidma tiegħu.