L-ilmentatur, organizzazzjoni ambjentali mhux governattiva, qajjem tħassib dwar dokument ta’ gwida maħruġ mill-Kummissjoni Ewropea lill-awtoritajiet tal-Istati Membri dwar il-valutazzjoni komparattiva fil-kuntest tas-sostituzzjoni ta’ sustanzi perikolużi fil-pestiċidi. B’mod partikolari, l-ilmentatur huwa mħasseb li l-gwida tirreferi għal standard għal valutazzjoni komparattiva, li ġie żviluppat mill-Organizzazzjoni Ewropea u Mediterranja għall-Protezzjoni tal-Pjanti. L-ilmentatur sostna li l-istandard imur kontra d-dispożizzjonijiet tar-Regolament tal-UE dwar il-Prodotti għall-Protezzjoni tal-Pjanti. L-ilmentatur qajjem ukoll tħassib dwar ir-rwol tal-gruppi tal-industrija fl-organizzazzjoni.

L-Ombudsman sabet raġonevoli l-ispjegazzjoni tal-Kummissjoni dwar għaliex tqis li l-istandard tal-UPPE huwa konformi mad-dritt tal-UE. Hija nnotat li l-Kummissjoni hija konxja ta', u tfittex li tindirizza, il-progress limitat fis-sostituzzjoni ta' sustanzi perikolużi. Madankollu, diġà fl-2020, il-Kummissjoni kienet sabet li r-regoli dwar is-sostituzzjoni, li huma salvagwardja għall-ġestjoni tar-riskji relatati mal-użu tal-kandidati għas-sostituzzjoni, ma kinux qed jirnexxu fl-għan tagħhom. L-Ombudsman għalhekk ħeġġet lill-Kummissjoni biex tipprijoritizza l-isforzi tagħha biex ittejjeb is-sostituzzjoni. Hija għamlet ukoll suġġeriment għal titjib lill-Kummissjoni, jekk tkompli tiddependi fuq standards żviluppati mill-UPPE.