L-ilmentatur talab lill-Kummissjoni Ewropea aċċess pubbliku għal emails speċifiċi u skambji oħra relatati mal-politiki u l-leġiżlazzjoni ambjentali tal-UE. Il-Kummissjoni tat aċċess għal parti mid-dokumenti li identifikat bħala li jaqgħu fil-kamp ta’ applikazzjoni tat-talba. B’appoġġ għad-deċiżjoni tagħha li tħassar xi informazzjoni, hija invokat diversi eċċezzjonijiet skont il-leġiżlazzjoni tal-UE dwar l-aċċess pubbliku għad-dokumenti (ir-Regolament 1049/2001), bl-argument li l-iżvelar jista’ jimmina l-privatezza, l-interessi kummerċjali u l-proċess tat-teħid tad-deċiżjonijiet. Fir-rigward tal-emails mitluba, il-Kummissjoni qalet li ma kinux irreġistrati peress li ma qisithomx li jaqgħu taħt il-kriterji tagħha għar-reġistrazzjoni tad-dokumenti minħabba l-kontenut u n-natura qasira tagħhom.

L-inkjesta tal-Ombudsman uriet li l-emails jappartjenu għal “politiki, attivitajiet u deċiżjonijiet” li għalihom hija responsabbli l-Kummissjoni u kienu b’mod ċar “dokumenti” skont it-tifsira tar-Regolament 1049/2001. Bħala tali, filwaqt li l-inkjesta kienet għadha għaddejja, l-Ombudsman ħeġġet lill-Kummissjoni tivvaluta jekk jistax jingħata aċċess pubbliku. Il-Kummissjoni rreġistrat l-emails u qablet li teżaminahom għal żvelar possibbli skont ir-Regolament 1049/2001.

L-Ombudsman sabet li n-nuqqas inizjali tal-Kummissjoni li tirreġistra u tinkludi l-emails fl-ambitu tat-talba kien jikkostitwixxi amministrazzjoni ħażina. Madankollu, peress li l-Kummissjoni qablet li teżaminahom fil-kuntest tat-talba, inkjesti ulterjuri ma kinux ġustifikati. Minħabba ż-żmien konsiderevoli li ħadet il-Kummissjoni biex tittratta t-talba tal-ilmentatur għal aċċess pubbliku b’mod xieraq, l-Ombudsman ħeġġet lill-Kummissjoni tiffinalizza l-valutazzjoni tagħha mingħajr dewmien.