L-ilmentatur talab lill-Bord Ewropew għall-Protezzjoni tad-Data (EDPB) biex jagħti aċċess pubbliku għad-dokumenti kollha (inklużi dokumenti preparatorji) dwar dikjarazzjonijiet u linji gwida differenti tal-EDPB dwar it-trasferimenti internazzjonali tad-data. L-EDPB identifika aktar minn 100 dokument bħala li jaqgħu taħt it-talba u ta aċċess sħiħ għal ċerti dokumenti u partijiet oħrajn. Fir-rifjut tal-aċċess għall-bqija (il-maġġoranza tad-dokumenti), l-EDPB invoka eċċezzjonijiet skont ir-regoli tal-UE dwar l-aċċess pubbliku għad-dokumenti, u argumenta li l-iżvelar jista’ jimmina l-proċessi tat-teħid ta’ deċiżjonijiet li għaddejjin, l-investigazzjonijiet li għaddejjin u l-proċedimenti tal-qorti li għaddejjin.

Abbażi ta’ spezzjoni tad-dokumenti mit-tim ta’ inkjesta tagħha, l-Ombudsman ma kinitx konvinta mir-raġunijiet imressqa mill-EDPB biex tirrifjuta l-aċċess. Għalhekk hija pproponiet bħala soluzzjoni li l-EDPB jivvaluta mill-ġdid it-talba u jikkunsidra mill-ġdid id-deċiżjoni tiegħu li jiċħad l-aċċess. L-EDPB ma aċċettax il-proposta għal soluzzjoni. Għalhekk, l-Ombudsman ikkonkludiet li kif l-EDPB ittratta t-talba jikkostitwixxi amministrazzjoni ħażina, u għamlet rakkomandazzjoni li l-EDPB jivvaluta mill-ġdid it-talba u jikkunsidra mill-ġdid id-deċiżjoni tiegħu li jiċħad l-aċċess.

L-EDPB irreaġixxa b’mod pożittiv għar-rakkomandazzjoni tal-Ombudsman´s u ta aċċess usa’ għad-dokumenti mitluba. L-Ombudsman għalqet il-każ, iżda fakkret lill-EDPB li, jekk jiddeċiedi li japplika eċċezzjoni għad-dritt ta’ aċċess pubbliku, għandu jiżgura li jivvaluta kif xieraq ir-riskju maħluq mid-divulgazzjoni għal kull dokument individwali jew parti minn dokument.