D'iarr an tOmbudsman Eorpach, Emily O'Reilly, ar an gCoimisiún Eorpach na socruithe atá beartaithe aige a chur i bhfeidhm chun trédhearcacht a chinntiú agus chun ionchur cuí ó pháirtithe leasmhara a fháil le linn na caibidlíochta faoi Brexit atá ar na bacáin. Ba cheart go gcumhdófaí leo sin na cineálacha faisnéise agus doiciméad atá beartaithe ag an gCoimisiún a fhoilsiú - lena n-áirítear an amlíne le haghaidh caibidlíochta agus tuarascálacha maidir le babhtaí caibidlíochta - agus cathain.

Molann an tOmbudsman freisin don Choimisiún mionsonrú a dhéanamh ar an gcaoi a bhfuil sé beartaithe aige ionchur a fháil ó pháirtithe leasmhara le linn an phróisis agus a chur in iúl go soiléir ón tús go bhfoilseofar an t-ionchur sin de ghnáth.

“Is eol dom na hábhair imní atá ag saoránaigh agus gnólachtaí an Aontais maidir leis na himpleachtaí forleathana a d’fhéadfadh a bheith ag toradh na caibidlíochta faoi Brexit. Tá gearáin faighte cheana féin ag m'oifig ó dhaoine aonair atá ag lorg tuilleadh faisnéise faoi na rudaí a tharla go dtí seo agus tá súil agam go bhfaighidh sí níos mó. Beidh cinnteacht áirithe ag teastáil ó ghnólachtaí go háirithe maidir leis an gcaoi a dtógfar an caidreamh sa todhchaí.’ arsa an tUasal O’Reilly.

‘Is léir go bhfuil machnamh á dhéanamh ag an gCoimisiún cheana féin ar conas socruithe a chur i bhfeidhm chun trédhearcacht a áirithiú agus chun ionchur iomchuí a fháil ó pháirtithe leasmhara le linn an phróisis sin. Léiríonn sé sin an ról tábhachtach atá aige maidir le leasanna an Aontais agus a chuid saoránach a chosaint le linn na caibidlíochta atá ar na bacáin.

“Go deimhin, ní féidir le taobh an Aontais ach tairbhe a bhaint as níos mó trédhearcachta, ós rud é go leagtar amach réaltacht na caibidlíochta déine sin céim ar chéim ar thaobh na Ríochta Aontaithe.”

Ina litir chuig an Uachtarán Juncker, tugann an tOmbudsman dá aire freisin go bhféadfadh go leor ceisteanna faoi chearta shaoránaigh an Aontais teacht chuig a hoifig trí Líonra Eorpach na nOmbudsman.

Dúirt an tUasal O’Reilly go mbeidh sí ag spreagadh a comhghleacaithe náisiúnta agus réigiúnacha dul chuig a hoifig a chuidíonn le baill an Líonra trí fhreagraí saineolacha a fháil ón gCoimisiún agus ó institiúidí eile de chuid an Aontais ar ábhair a bhaineann le dlí agus cleachtas an Aontais.  

“Is léir gur ábhar conspóideach iad cearta na saoránach, go háirithe i réimse na saorghluaiseachta, fiú sular cuireadh tús leis an gcaibidlíocht. Táim ag spreagadh mo chomhghleacaithe i Líonra Eorpach na nOmbudsman chun m’oifig a úsáid mar chainéal chun an fhaisnéis uile a theastaíonn uathu faoi chearta na saoránach faoi dhlí an Aontais a fháil,” a dúirt an tUasal O’Reilly.

D'iarr an tOmbudsman ar an gCoimisiún Eorpach freagra a thabhairt ar a litir faoin 30 Aibreán 2017.

Tá litir an Ombudsman Eorpaigh chuig an Uachtarán Juncker ar fáil anseo.