Ar ócáid an "Lá Idirnáisiúnta um an gCeart chun Eolas a Fháil", an 28 Meán Fómhair, d'iarr an tOmbudsman Eorpach, P. Nikiforos Diamandouros, ar riarachán an AE a bheith chomh trédhearcach agus chomh fabhrach do shaoránaigh agus is féidir. Ag labhairt dó in imeacht a d’eagraigh sé i gcomhar le Transparency International sa Bhruiséil, dar teideal ‘Transparency at the EU level and in the Member States’ [Trédhearcacht ar leibhéal an Aontais agus sna Ballstáit], dúirt sé: “Má mheasann saoránaigh na hEorpa go bhfuil riarachán an Aontais trédhearcach, inrochtana agus cuntasach, agus sa chás sin amháin, forbróidh siad an mhuinín agus an toilteanas is gá chun páirt ghníomhach a ghlacadh i saol daonlathach an Aontais.”

Gearáin a bhaineann le trédhearcacht agus caighdeáin eiticiúla

Baineann níos mó ná aon trian d'fhiosrúcháin an Ombudsman le gearáin faoi easpa trédhearcachta i riarachán an AE. Baineann gearáin den sórt sin, mar shampla, le rochtain ar fhaisnéis nó ar dhoiciméid, comhdhéanamh na meithleacha, nó ceapadh beartais na n-institiúidí.

Leag an tUasal Diamandouros béim ar an méid seo a leanas: "Foráiltear le Conradh Liospóin do thrédhearcacht níos fearr i ngníomhaíochtaí riarachán an AE. Ceanglaítear leis ar an gComhairle teacht le chéile go poiblí nuair a dhéanann sí dréachtreachtaíocht a phlé agus tá ceart rochtana na saoránach ar dhoiciméid institiúidí, chomhlachtaí, oifigí agus ghníomhaireachtaí uile an Aontais ann, lena n-áirítear, den chéad uair, an Chomhairle Eorpach. Ceanglaítear leis an gConradh freisin ar riarachán an Aontais a chuid oibre a dhéanamh ar bhealach chomh hoscailte agus is féidir, chun dea-rialachas agus rannpháirtíocht na sochaí sibhialta a chur chun cinn. Táim tiomanta na saoránaigh a chur ar an eolas faoin gceart atá acu eolas a fháil ar a bhfuil á dhéanamh ag riarachán an Aontais.”

Faigheann an tOmbudsman líon méadaitheach gearán freisin a ardaíonn ábhair imní eiticiúla. I measc na gceisteanna sin tá na bronntanais is féidir le hoifigigh an AE a ghlacadh go dtí an tsaincheist maidir le "doirse imrothlacha" trína mbogann iar-Choimisinéirí nó oifigigh an AE go dtí an earnáil phríobháideach agus ar an gcaoi sin tá an baol ann go gcruthófar coinbhleachtaí leasa. D’fhonn dea-chleachtais a shainaithint maidir leis na bunphrionsabail eiticiúla ar cheart feidhm a bheith acu maidir le hoifigigh AE, sheol an tOmbudsman comhairliúchán le déanaí leis na hombudsmain náisiúnta sna Ballstáit.

Tá tuilleadh eolais faoin imeacht "Lá Idirnáisiúnta um an gCeart chun Eolas a Fháil" ar fáil ag:

http://www.ombudsman.europa.eu/activities/calendarevent.faces/en/400/html.bookmark

Amharc-aithne nua an Ombudsman

Amhail ón lá inniu, tá amharc-aithne nua ag an Ombudsman Eorpach, lena n-áirítear lógó nua. Tá an lógó ceaptha chun feabhas a chur ar iarrachtaí an Ombudsman teagmháil a dhéanamh le raon leathan lucht féachana agus éisteachta, agus aitheantas agus luachanna na hinstitiúide á gcur in iúl ag an am céanna. Tá na dathanna ceaptha a bheith ina meabhrúchán ar bhratach na hEorpa, agus is ionann an cruth ciorclach agus aontacht agus comhdhearcadh. Is ionann na saigheada agus an comhartha comhionann laistigh den lógó faoi seach agus malartú agus idirphlé, chomh maith le comhionannas agus cothroime, príomhghnéithe, is é sin, de mhodheolaíocht an Ombudsman.