D'oscail an tOmbudsman Eorpach fiosrúchán féintionscnaimh ar íocaíochtaí déanacha ón gCoimisiún tar éis dó líon méadaitheach gearán a fháil faoin ábhar.
I ngearáin a rinneadh leis an Ombudsman le déanaí, maíonn saineolaí gur fhan sé nó sí breis agus seacht mí go leith chun speansais a íoc agus gur dúradh leis nó léi gur "gné dhílis den chóras iad moilleanna"; maíonn ionad beartais atá lonnaithe sa Bhruiséil nár íocadh sonrasc ar feadh níos mó ná 16 mhí agus d’fhan cuideachta naoi mí le haghaidh íocaíochta sula ndeachaigh sí i dteagmháil leis an Ombudsman mar gheall ar imní go bhféadfadh gearán a chaidreamh leis an gCoimisiún amach anseo a chur i mbaol.
San fhiosrúchán féintionscnaimh, iarrann an tOmbudsman ar an gCoimisiún an méid seo a leanas a dhéanamh:

- é a chur ar an eolas faoi na bearta atá déanta aige chun cúiseanna moille maidir le híocaíochtaí a dhéanamh le conraitheoirí agus le tairbhithe deontas agus fóirdheontas a shainaithint agus chun déileáil leo;

anailís a chur i láthair ar na cúiseanna atá le fadhb na n-íocaíochtaí déanacha agus ar na bealaí ina bhféadfaí déileáil léi;

- breithniú a dhéanamh ar fheabhsuithe ar na nósanna imeachta is féidir le conraitheoirí a úsáid chun sásamh a fháil i gcás díospóide leis an gCoimisiún maidir le leordhóthanacht fheidhmíocht an chonraitheora, nó maidir leis an doiciméadacht a sholáthair an conraitheoir.

D’fhéadfadh an líon gnóthas agus saoránach a bhféadfadh fadhbanna a eascraíonn as íocaíochtaí déanacha ón gCoimisiún difear a dhéanamh dóibh a bheith an-mhór. Dá bhrí sin, seolfaidh an tOmbudsman cóip dá litir ina bhfógrófar an fiosrúchán chuig eagraíochtaí ionadaíocha agus foilseoidh sé ar a shuíomh gréasáin é (http://www.ombudsman.europa.eu). Tabharfaidh sé seo deis don phobal barúlacha a bhaineann leis an bhfiosrúchán a chur isteach.
Ní dhéileálfaidh an fiosrúchán féintionscnaimh le cásanna aonair, a d’fhéadfadh a bheith ina n-ábhar do ghearáin ar leithligh chuig an Ombudsman.
Chun tuilleadh eolais a fháil, glaoigh ar Ian Harden, Ceann na Rúnaíochta, teil. + 33 (0)3 88 17 23 84.