# Fáiltíonn an tOmbudsman roimh iarrachtaí an Choimisiúin trédhearcacht a fheabhsú
- Údar: Ombudsman Eorpach
- Dáta: 2006-05-03T00:00+02:00[Europe/Paris]
- [URL](https://www.ombudsman.europa.eu/ga/press-release/ga/167)
---
Chuir an tOmbudsman Eorpach, **P. Nikiforos Diamandouros**, fáilte roimh Pháipéar Uaine an Choimisiúin maidir leis an Tionscnamh Trédhearcachta Eorpach, a cuireadh i láthair inniu. "Baineann an ceathrú cuid de na fiosrúcháin a dhéanaim le heaspa trédhearcachta. Dá bhrí sin, tacaím go láidir le gach beart lena gcuirtear riarachán AE níos oscailte agus níos cuntasaí chun cinn. Tá an ceart ag an gCoimisiún nuair a deir sé go bhfuil 'pobal na hEorpa i dteideal a bheith ag súil le hinstitiúidí poiblí atá éifeachtúil, cuntasach agus dírithe ar sheirbhísí'. Tá súil agam go mbogfaidh an díospóireacht a seoladh i bPáipéar Uaine an lae inniu níos faide sa treo seo".

I measc na saincheisteanna a bhfuil spéis ar leith ag an Ombudsman iontu i bPáipéar Uaine an lae inniu tá na smaointe a cuireadh chun cinn i réimse an nochta éigeantaigh faisnéise maidir le tairbhithe chistí an AE agus íoschaighdeáin chomhairliúcháin an Choimisiúin. "Le bliain anuas, dhéileáil mé le roinnt gearán sna réimsí sin, lena n-áirítear dhá cheann maidir leis an easpa trédhearcachta i ndáil le tairbhithe chistí talmhaíochta an Aontais", a dúirt an tUasal Diamandouros. "Is ábhar misnigh dom, dá bhrí sin, iarrachtaí an Choimisiúin sonraí faoi thairbhithe chistí an Aontais a dhéanamh níos inrochtana".

"Mar a luaigh mé i gcur i láthair mo Thuarascáil Bhliantúil 2005 do Choiste Achainíocha Pharlaimint na hEorpa ar maidin," a dúirt an tUasal Diamandouros, "tá oibriú go hoscailte agus grinnscrúdú poiblí a cheadú i measc na modhanna tábhachtacha go léir chun muinín a chothú i measc na saoránach. Táim ag tnúth leis na freagairtí ar an bPáipéar Uaine seo a leanúint agus le bheith ag obair leis na hinstitiúidí agus leis na comhlachtaí chun riarachán AE den chéad scoth a dhéanamh a bheidh in ann suibscríobh go hiomlán leis an gcultúr seirbhíse a chuireann an saoránach i gcroílár na n-ábhar imní atá aige."

Tiocfaidh deireadh le comhairliúchán an Choimisiúin ar an bPáipéar Uaine seo an 31 Lúnasa 2006.