Tá an baol ann go mbainfidh an Coimisiún Eorpach an bonn de shláine riarachán an Aontais gan cur chuige níos láidre maidir le gluaiseacht foirne chuig an earnáil phríobháideach, agus tháinig an tOmbudsman ar an gconclúid tar éis fiosrúchán leathan ar ‘doirse imrothlacha’.

Cé go bhfuil feabhsuithe déanta ag an gCoimisiún ó rinneadh an fiosrúchán deireanach ón Ombudsman, ní mór dó tuilleadh a dhéanamh fós. Ba cheart don Choimisiún an méid seo a leanas a dhéanamh:

1. Cosc sealadach a chur ar phoist má tá rioscaí ag baint leo nach féidir a fhritháireamh le srianta nó mura féidir faireachán agus forfheidhmiú inchreidte a dhéanamh ar shrianta.

2. Ceadú poist nua a chur de choinníoll ar an mball foirne gealltanas a fháil ón bhfostóir nua aon srianta a fhoilsiú ar a shuíomh gréasáin.

3. Na cinntí maidir le poist nua na mball foirne a fhoilsiú níos tapúla.

“Tá fadhb ag baint le gluaiseacht rialtóirí isteach in earnálacha a ndearna siad rialáil orthu roimhe seo sa Bhruiséil, ach ní léirítear é sin go hiomlán sa chaoi a ndéileálann riarachán an Aontais leis an ábhar,” a dúirt an tOmbudsman Eorpach Emily O’Reilly.

“Is gnách gannmheastachán a dhéanamh ar éifeachtaí creimneacha na n-oifigeach a thugann a gcuid eolais agus líonraí chuig réimsí gaolmhara san earnáil phríobháideach.

Tá riarachán an Aontais ag pointe criticiúil sa chaoi a gcaitheann sé le ‘doirse imrothlacha’. Mura ndéantar an cleachtas a rialú anois, beifear in ann cultúr a leabú a d’fhéadfadh muinín an phobail as ionracas agus saineolas institiúidí an Aontais a chreimeadh.

Tugann poist bhuana i riarachán an AE le tuiscint go bhfuil tiomantas ann do leas an phobail san fhadtéarma. Níor cheart breathnú orthu mar chéim i dtreo poist ghaolmhara san earnáil phríobháideach,” a dúirt an tOmbudsman.

Cumhdaíodh san fhiosrúchán sampla de 100 cinneadh a rinne an Coimisiún in 2019-2021, ar fud 14 Ard-Stiúrthóireacht, chomh-aireachtaí uile an Choimisinéara, Sheirbhís Dlí an Choimisiúin, agus na hArd-Rúnaíochta. As na 100 cinneadh sin, níor chuir an Coimisiún cosc ach ar dhá ghníomhaíocht. Níor aimsigh an tOmbudsman drochriarachán, féach anseo le haghaidh thorthaí an fhiosrúcháin.

Tá an fiosrúchán mar chuid d’obair fhoriomlán an Ombudsman sa réimse seo, lena n-áirítear fiosrúcháin leanúnacha a bhaineann leis an mBanc Eorpach Infheistíochta agus leis an mBanc Ceannais Eorpach.

I bhfiosrúcháin roimhe seo a bhain leis an Údarás Baincéireachta Eorpach agus leis an nGníomhaireacht Eorpach um Chosaint, chinn an tOmbudsman gur cheart don dá cheann na poist atá i gceist a thoirmeasc go sealadach.

Tuarascáil Bhliantúil 2021

Inniu, tá a Tuarascáil Bhliantúil do 2021 á seoladh ag an Ombudsman freisin, agus baineann gearáin le trédhearcacht agus cuntasacht as an gcion is mó d’fhiosrúcháin (29%).

Déanann an Tuarascáil doiciméadú ar obair an Ombudsman maidir le rochtain phoiblí ar dhoiciméid a fheabhsú, lena n-áirítear trí threoir a fhoilsiú d’institiúidí an Aontais chun cabhrú leo a n-oibleagáidí sa réimse sin a chomhlíonadh go hiomlán. Tugtar sonraí ann maidir le raon fiosrúchán lena n-áirítear an bhféadfaí sásra gearán Frontex a dhéanamh níos inrochtana, conas a áirithíonn an Coimisiún go n-urramaíonn údaráis na Cróite cearta bunúsacha i gcomhthéacs oibríochtaí bainistithe teorainneacha, agus conas ba cheart don Bhanc Eorpach Infheistíochta trédhearcacht a fheabhsú faoi na tionscadail a mhaoiníonn sé.

In 2021, d’oscail an tOmbudsman 338 bhfiosrúchán – a raibh sé cinn díobh ar a tionscnamh féin – agus bhí an meánfhad ama le haghaidh fiosrúcháin níos lú ná ceithre mhí.

Tá lógó nua an Ombudsman Eorpaigh sa Tuarascáil Bhliantúil freisin – a seoladh go hoifigiúil inniu – a dhéanann ionadaíocht ar mhisean na hoifige: Freagracht, trédhearcacht agus muinín.