Bhuail an tOmbudsman Eorpach, P. Nikiforos Diamandouros, lena mhacasamhail Fhrancach, an tUasal Jean-Paul Delevoye, in Strasbourg inniu chun comhar idir a n-institiúidí a phlé. Ba é seo a gcéad chruinniú, tar éis cheapadh an Uasail Delevoye mar Médiateur de la République i mí Aibreáin i mbliana.

D'aontaigh an bheirt Ombudsman gur chóir dóibh a ndícheall a dhéanamh:

• déileáil le gearáin na saoránach chomh tapa agus is féidir - mar an institiúid a bhfuil sé de chúram uirthi dea-riarachán a chur chun cinn, ní mór don ombudsman casaoidí na saoránach a láimhseáil go tráthúil;


• a chinntiú go bhfuil a fhios ag saoránaigh go díreach cé leis ar cheart dóibh déileáil lena ngearáin - tá sé sin ríthábhachtach ionas go seolfar gearáin go díreach chuig an gcomhlacht is fearr atá in ann déileáil leo;


• oibriú le chéile chun gearáin ó shaoránaigh a réiteach go héifeachtach - áirítear leis an gcomhar seo gearáin a aistriú, nuair is cuí, agus faisnéis a mhalartú trí líonra ombudsman náisiúnta agus réigiúnacha an Ombudsman Eorpaigh.

Agus é ag trácht ar an gcruinniú, dúirt an tUasal Diamandouros "D'oibrigh an tOmbudsman Eorpach go dlúth i gcónaí lena mhacasamhail Fhrancach. Tar éis chruinniú an lae inniu, táim cinnte go rachaidh an comhoibriú seo ó neart go neart. Ba cheart go gcuideodh ár n-iarrachtaí comhpháirteacha lena áirithiú go gcomhlíonfaidh an riarachán poiblí - ar an leibhéal Eorpach agus ar an leibhéal náisiúnta araon - na gealltanais a tugadh do na saoránaigh."