Cháin an tOmbudsman Eorpach, P. Nikiforos Diamandouros, an Coimisiún Eorpach toisc nár ghníomhaigh sé go comhsheasmhach i gconradh le bord iascaigh náisiúnta. Rinne an Coimisiún faillí i scrúdú a dhéanamh ar thuarascáil chríochnaitheach lenar modhnaíodh go substaintiúil an dréacht a d’fhormheas sé breis agus bliain roimhe sin. De réir an Ombudsman, bhí an Coimisiún ar an eolas faoi roinnt fíoras ar cheart go mbeadh sé mar thoradh orthu scrúdú cúramach a dhéanamh ar an tuarascáil chríochnaitheach.

Chuir an t-eolaí freagrach an gearán isteach maidir leis an gconradh taighde ‘An tIdirghníomhú Fisiciúil idir Rónta Liatha agus Trealamh Iascaireachta’, a síníodh idir Bord Iascaigh Mhara na hÉireann agus Ard-Stiúrthóireacht Iascaigh an Choimisiúin. Mhaígh sé go bhfuair an Bord Iascaigh treoracha óna mháthairúdarás státseirbhíse chun athruithe substaintiúla a dhéanamh ar an dréacht-tuarascáil chríochnaitheach, tar éis don Choimisiún glacadh léi (1). Nuair a foilsíodh an tuarascáil deiridh, scriosadh, diúltaíodh nó caolaíodh príomhthorthaí an dréachta, a dúirt sé.

Líomhain an gearánach go raibh an Coimisiún faillíoch toisc nár lorg sé mínithe ar na hathruithe agus d’iarr sé ar an Ombudsman imscrúdú a dhéanamh.

Léirigh imscrúdú an Ombudsman go raibh an Coimisiún ar an eolas (a) go bhféadfadh ábhar na dréacht-tuarascála deiridh a bheith conspóideach, (b) gur mhian leis an Aireacht náisiúnta ábhartha smacht eagarthóireachta a fheidhmiú ar an tuarascáil chríochnaitheach sular foilsíodh í, (c) gur tugadh an tuarascáil chríochnaitheach níos mó ná bliain tar éis don Choimisiún an dréacht-tuarascáil chríochnaitheach a fhormheas agus (d) go raibh athruithe substaintiúla sa tuarascáil chríochnaitheach sin i gcomparáid leis an dréacht-tuarascáil chríochnaitheach. I bhfianaise na n-imthosca sin, bheifí ag súil go ndéanfadh an Coimisiún scrúdú cúramach ar an tuarascáil chríochnaitheach. Mar sin féin, ní raibh aon rud le tabhairt le fios go ndearna an Coimisiún aon scrúdú den sórt sin.

Dúirt an Coimisiún, cé go bhféadfaí a áitiú nár cheart dó glacadh le conclúid eolaíoch atá bunaithe go dona agus gan údar, nach bhféadfaí é sin a ionannú le drochriarachán. Is é a thuairim gur urramaíodh téarmaí an chonartha.

Níor aontaigh an tOmbudsman leis sin agus chinn sé go raibh an Coimisiún ciontach i ndrochriarachán. Is féidir teacht ar a chinneadh ar:

(1) Ós rud é nach raibh an gearánaí toilteanach é sin a dhéanamh, mheas sé go raibh a phost éirithe do-ghlactha agus d'éirigh sé as an mBord.