Chuir Emily O'Reilly, an tOmbudsman Eorpach, fáilte roimh an ardleibhéal trédhearcachta i gcoitinne, agus d'áitigh sí ar an gCoimisiún agus ar an gComhairle na caighdeáin sin a choinneáil in aon chaibidlíocht maidir le caidreamh sa todhchaí.

Tá an tUasal O’Reilly le bualadh le Príomh-Idirbheartaí an Aontais, Michel Barnier, tráthnóna inniu in Strasbourg.

I measc na gcéimeanna dearfacha ó Thascfhórsa Brexit an Choimisiúin tá os cionn 100 doiciméad caibidlíochta a fhoilsiú, féilire an Uasail Barnier a chur ar fáil go poiblí, agus gan bualadh ach le brústocairí cláraithe. D’oibrigh an Tascfhórsa trí chreat trédhearcach arna leagan síos ag an gComhairle Eorpach.

I bhfianaise na n-impleachtaí móra a bhaineann le Brexit do shaoránaigh agus do ghnólachtaí, scríobh an tOmbudsman chuig an gCoimisiún sular agraíodh Airteagal 50 chun bearta praiticiúla trédhearcachta a mholadh.

Rinne an tOmbudsman monatóireacht ar an gcaoi a raibh an pobal in ann na cainteanna aistarraingthe a leanúint, tuilleadh moltaí trédhearcachta a dhéanamh, agus roinnt cruinnithe ar an leibhéal teicniúil a reáchtáil leis an Tascfhórsa.

“Chomh maith le dea-chleachtas riaracháin, tá dhá bhuntáiste shoiléire ag idirbheartaithe an Aontais mar gheall ar an ardleibhéal trédhearcachta. Chuir sé lena ndlisteanacht i súile an phobail agus chuidigh sé leis an Aontas a choinneáil aontaithe, ós rud é gur coinníodh na Ballstáit, Parlaimint na hEorpa agus saoránaigh ar an eolas agus gur áiríodh iad ag gach céim den phróiseas,” a dúirt an tUasal O’Reilly.

“Ba cheart na buntáistí sin a choinneáil i gcuimhne le linn aon chaibidlíochta amach anseo maidir leis an gcaidreamh idir an tAontas agus an Ríocht Aontaithe nuair a thiocfaidh tosca éagsúla i bhfeidhm, nuair a bheidh níos mó páirtithe leasmhara ag iarraidh a bheith rannpháirteach, agus nuair a thiocfaidh leasanna earnálacha éagsúla chun cinn chun iarracht a dhéanamh tionchar a imirt ar na cainteanna.”

Cúlra

Scríobh an tOmbudsman chuig an gCoimisiún agus chuig Comhairle an Aontais Eorpaigh i mí an Mhárta 2017. Áiríodh ina cuid moltaí maidir le trédhearcacht foilsiú réamhghníomhach doiciméad caibidlíochta; gur cheart don Choimisiún ionchur fadréimseach ó gheallsealbhóirí a áirithiú, agus gur cheart dó breithniú a dhéanamh ar nótaí teicniúla comhpháirteacha a fhoilsiú ina sonraítear an dul chun cinn tar éis gach babhta caibidlíochta.

Dhéileáil an Tascfhórsa le 70 iarratas ar rochtain ar dhoiciméid - ar méadaíodh trí cinn díobh chuig an Ombudsman - agus thug sé freagra ar thart ar 10,000 teachtaireacht ón bpobal.

Chuir an Tascfhórsa in iúl go dtiocfadh sé ar ais chuig moltaí an Ombudsman maidir le hionchur páirtithe leasmhara a bheith chomh fadréimseach agus chomh cuimsitheach agus is féidir nuair a chuirfear tús le cainteanna ar an gcaidreamh sa todhchaí idir an tAontas agus an Ríocht Aontaithe.

Tá achoimre an Ombudsman ar an bpróiseas faireacháin sin le fáil anseo.