A Uachtaráin, a chara,

Fuair mé gearán i gcoinne an Bhainc Ceannais Eorpaigh ón Uasal Kenneth Haar, ag gníomhú dó thar ceann ENR. Tá cinneadh déanta agam fiosrúchán a oscailt maidir leis an ngearán seo.

Mar a fheicfidh tú ón gcóip den ghearán atá i gceangal leis an litir seo, is gearán leathan é seo a bhaineann le hUachtarán bhallraíocht BCE sa “Ghrúpa 30” (G30) (www.group30.org) chomh maith le rannpháirtíocht daoine sinsearacha BCE in obair G30. Beidh a fhios agat go ndearna an gearánach céanna (Faireachlann Chorparáideach na hEorpa) gearán den chineál céanna in 2012 a bhí ina ábhar fiosrúcháin ag mo réamhtheachtaí (Cás 1339/2012/FOR). Agus an gearán nua seo á dhéanamh, áitíonn an gearánach go bhfuil an comhthéacs ina bhfeidhmíonn BCE anois an-éagsúil leis an gcomhthéacs a bhí i réim tráth fhiosrúchán 2012 an Ombudsman. Dá réir sin, áitíonn sé gurb iomchuí na saincheisteanna go léir a bhaineann le BCE agus G30 a mheas sa chomhthéacs reatha.

Ag an gcéim luath seo i m'fhiosrúchán, admhaím gur gá machnamh a dhéanamh ar an gcomhthéacs nua seo. Mar sin féin, níor ghlac mé aon seasamh maidir le haon cheann de na hábhair seo ach amháin chun a mheas go bhfuil gá le tuilleadh fiosrúcháin.

Mar chéad chéim i m’fhiosrúchán, d’iarrfainn ar BCE iniúchadh ar na doiciméid ábhartha uile atá i seilbh BCE a éascú, rud a chuideoidh le m’Oifig tuiscint níos iomláine a fháil ar mhéid agus raon rannpháirtíocht fhoriomlán BCE le G30. Molaim freisin go n-úsáidfimid an deis a bhaineann leis an gcruinniú cigireachta chun roinnt gnéithe sonracha den ghearán a phlé le hoifigigh ábhartha BCE. Tar éis an phlé sin agus iniúchadh a dhéanamh ar na saincheisteanna, is dócha go n-iarrfaidh mé ar BCE freagra i scríbhinn a thabhairt ar an ngearán.

Bheinn buíoch díot dá rachadh d’oifigigh i dteagmháil leis an Dr Antonios Antoniadis (+32 2 2831550; antonios.antoniadis@ombudsman.europa.eu), Príomhoifigeach Dlí i m’Oifig, d’fhonn na socruithe is gá a dhéanamh don chigireacht agus don phlé.

Le dea-mhéin,

Emily O'Reilly

An tOmbudsman Eorpach