A Uachtaráin, a chara,

Fuair mé gearán ón eagraíocht sochaí sibhialta ‘Faireachlann na hEorpa Corparáidí’ i gcoinne an Choimisiúin Eorpaigh.

Baineann an gearán le cinneadh an Choimisiúin conradh a dhámhachtain do shainchomhairleoireacht eacnamaíoch ar leith. Is é is cuspóir don chonradh staidéar a dhéanamh ar an ‘Measúnú ón gCoimisiún ar Iontráil, Leathnú agus Allmhairí sa Mhargadh Amach Anseo i gCinntí Cumaisc AE’ (COMP/2021/OP/0003).

Díríonn ábhair imní an ghearánaigh ar cé acu a urramaíodh nó nár urramaíodh na nósanna imeachta uile is infheidhme go cuí a mhéid a bhaineann le measúnú a dhéanamh ar aon leasanna coinbhleachta gairmiúla agus ar na bearta a cuireadh i bhfeidhm chun aon choinbhleacht den sórt sin a chosc. Go háirithe, ceistíonn an gearánach leordhóthanacht na mbeart a comhaontaíodh leis an gcomhairleacht eacnamaíoch chun coinbhleachtaí leasa a chosc, agus an bhfuil na hacmhainní is gá ag an gCoimisiún chun faireachán a dhéanamh ar éifeachtacht na mbeart sin.

Chinn mé tús a chur le fiosrúchán ar an ngearán seo agus scrúdú a dhéanamh ar an gcaoi a ndearna an Coimisiún measúnú ar an riosca a bhaineann le leasanna coinbhleachta gairmiúla a bhaineann le tairiscint na sainchomhairleoireachta, i ndáil leis na cúraimí sonracha atá le déanamh maidir leis an staidéar atá i gceist.

Chinn mé, chun críocha m’fhiosrúcháin, gur gá do m’fhoireann fiosrúcháin iniúchadh a dhéanamh ar an gcomhad ar COMP/2021/OP/0003, lena n-áirítear aon doiciméad atá ag an gCoimisiún maidir leis na nithe seo a leanas:

• an nós imeachta soláthair phoiblí as ar eascair dámhachtain an chonartha le tagairt COMP/2021/OP/0003, lena n-áirítear an tairiscint agus an t-ábhar tacaíochta arna soláthar ag an tairgeoir rathúil, agus liosta de na tairgeoirí eile;
• a mheasúnú maidir le leasanna coinbhleachta gairmiúla féideartha an tairgeora rathúil;
• a idirghníomhaíochtaí leis an tairgeoir rathúil maidir leis an measúnú ar choinbhleacht leasa agus na bearta maolaitheacha a comhaontaíodh;
• a ábhar treorach inmheánach d’fhoireann ábhartha a eagraíonn nósanna imeachta soláthair phoiblí agus a dhéanann measúnú ar leasanna coinbhleachta gairmiúla (agus léiriú ann an ndearnadh aon athrú ar aon treoirdhoiciméad ó 2021 i leith, agus má rinneadh, an méid a athraíodh).

Bheinn buíoch díot dá bhféadfadh d’fhoireann na doiciméid thuas a sholáthar, i bhformáid leictreonach más féidir, trí ríomhphost criptithe,^[1] faoin 8 Meán Fómhair 2023.

Ní nochtfar faisnéis nó doiciméid a mheasann d'institiúid a bheith rúnda don ghearánach nó d'aon duine eile gan toiliú roimh ré ón gCoimisiún. [2]

Tar éis na cigireachta, d’fhéadfadh sé go mbeadh ar m’fhoireann fiosrúcháin bualadh le hionadaithe ábhartha an Choimisiúin.

Is é Koen Roovers an t-oifigeach fiosrúcháin atá freagrach as an gcás seo.

Más rud é, le linn an fhiosrúcháin seo, go mbeidh an Coimisiún páirteach in imeachtaí cúirte a bhaineann leis an ábhar céanna leis an ngearán seo, iarraim ort é sin a chur in iúl dúinn.

Le dea-mhéin,

Emily O'Reilly An tOmbudsman
Eorpach

Strasbourg, 28/06/2023

[1] Is féidir ríomhphoist chriptithe a sheoladh chuig ár mbosca ríomhphoist tiomnaithe.

[2] Marcáil go soiléir an t-ábhar sin ‘faoi rún’. Scriosfar faisnéis agus doiciméid den chineál sin ó chomhaid an Ombudsman Eorpaigh go gairid tar éis dheireadh an fhiosrúcháin.