Teideal an phoist	Ceann Aonaid
Grúpa feidhme agus grád	AD9 go AD12
Bunús dlí	Nós imeachta roghnúcháin inmheánach agus idirinstitiúideach faoi Airteagal 29(1)(a), pointí (i) agus (iii) agus (b) de Rialacháin Foirne Oifigigh an Aontais Eorpaigh
Áit oibre	An Bhruiséil nó Strasbourg
Spriocdháta le haghaidh iarratas	26 Meitheamh 2026 ar 12.00 (meán lae), am na Bruiséile
Dáta tosaigh	Meán Fómhair 2026

1. Cé muid féin

Is é misean an Ombudsman Eorpaigh cuidiú le gearáin a réiteach agus a chinntiú go gcuireann riarachán AE na caighdeáin is airde ionracais, trédhearcachta, cuntasachta agus freagrúlachta i bhfeidhm. Déanaimid é sin trí shaoránaigh agus a gcearta a chur i gcroílár ár ngníomhaíochtaí agus trí idirphlé cuiditheach a chothú le hinstitiúidí, comhlachtaí, oifigí agus gníomhaireachtaí an Aontais (‘IBOAnna an Aontais’), chomh maith le dul i dteagmháil le páirtithe leasmhara ábhartha eile.

Leis an ról tábhachtach sin, cuirtear modh sásaimh ar fáil do dhaoine agus d’eagraíochtaí i gcásanna ina measann siad go bhfuil a n-ábhair imní fós gan réiteach ag IBOAnna an Aontais lena mbaineann. Tugann sé cumhacht freisin don Ombudsman fiosrúcháin féintionscnaimh a dhéanamh agus dul i dteagmháil le IBOAnna an AE agus le páirtithe leasmhara eile chun réimsí le feabhsú a shainaithint go réamhghníomhach agus chun aghaidh a thabhairt ar shaincheisteanna sistéamacha. Agus é sin á dhéanamh aige, rannchuidíonn an tOmbudsman le dea-riarachán a áirithiú agus, ar an gcaoi sin, leis na caighdeáin dhaonlathacha agus na luachanna daonlathacha ar a bhfuil an tAontas Eorpach bunaithe a neartú.

Is iad prionsabail threoracha na hOifige ionracas, cothroime, neamhchlaontacht, neamhspleáchas agus cuntasacht.

Is iad an meas, an oscailteacht, an chuimsitheacht, an comhar agus an éifeachtúlacht na bunluachanna atá againn.

Is oifig bheag dhinimiciúil í an tOmbudsman Eorpach ag a bhfuil plean bunaíochta de thart ar 75 phost agus buiséad bliantúil de thart ar EUR 16 mhilliún.

Tá a oifigí lonnaithe in Strasbourg agus sa Bhruiséil.

Cuireann sé ionad oibre dinimiciúil agus measúil ar fáil lena n-áirítear cothromaíocht mhaith idir an saol gairmiúil agus an saol príobháideach agus atmaisféar taitneamhach oibre. Spreagann struchtúr eagraíochtúil na hOifige rannpháirtíocht, éascaíonn sé forbairt scileanna agus ceadaíonn ár n-uirlisí oibre nua-aimseartha éifeachtúlacht agus solúbthacht.

2. Do ról mar Cheann Aonaid

Táimid ag lorg gairmithe ardcháilithe a bhfuil taithí acu agus a bhfuil braistint láidir ionracais acu agus a bhfuil fonn orthu cur le misean an Ombudsman.

Éilíonn an post seo tuiscint den scoth ar straitéis an Ombudsman agus ar chomhthéacs dlíthiúil agus institiúideach an AE. Tá scileanna an-mhaith comhordúcháin agus cumarsáide chomh maith le braistint láidir tionscnaíochta agus freagrachta ríthábhachtach. Is mór againn comhghleacaithe dinimiciúla a ghlacann tionscnamh agus atá ar a suaimhneas ag glacadh freagrachta. Tá obair chomhoibríoch agus treoshuíomh seirbhíse ríthábhachtach. Tá sé ríthábhachtach freisin a bheith tiomanta do thimpeallacht dhearfach oibre a choinneáil agus do chumas coinbhleachtaí a réiteach.

a. Tuairisc ghinearálta

Tá an Ceann Aonaid freagrach as foireann Oifigeach Fiosrúchán a stiúradh agus a bhainistiú laistigh de Stiúrthóireacht na bhFiosrúchán Cinntíonn an sealbhóir poist go láimhseáiltear fiosrúcháin go héifeachtach i gcomhréir le sainordú an Ombudsman, agus go gcoinnítear ardchaighdeáin anailíse dlíthiúla, dréachtaithe agus cáilíochta nós imeachta. Cuireann an ról le cuspóirí straitéiseacha na hOifige agus tacaíonn sé leis an Stiúrthóir Fiosrúchán cinntí tráthúla, éifeachtacha agus dea-réasúnaithe a dhéanamh.

b. Príomhdhualgais agus príomhfhreagrachtaí

Mar Cheann Aonaid, déanfaidh tú an méid seo a leanas:

• Foireann Oifigeach Fiosrúcháin a stiúradh agus a bhainistiú, lena gcothófar timpeallacht oibre chomhoibríoch, chuimsitheach agus ardfheidhmíochta;
• Comhordú, leithdháileadh agus láimhseáil thráthúil gearán agus fiosrúchán a áirithiú, lena n-áirítear maoirseacht iomchuí agus rialú cáilíochta ar chásobair;
• Ardchaighdeán anailíse dlíthiúla agus dréachtaithe a ráthú i ngach fiosrúchán, lena n-áiritheofar comhsheasmhacht le sainordú, cásdlí agus cleachtais sheanbhunaithe an Ombudsman;
• Tacú leis an Ombudsman, leis an Ard-Rúnaí, agus leis an Stiúrthóir agus comhairle a chur orthu maidir le hábhair a bhaineann le fiosrúcháin agus saincheisteanna institiúideacha níos leithne;
• Rannchuidiú le tosaíochtaí straitéiseacha an Ombudsman a fhorbairt agus a chur chun feidhme, lena n-áirítear fiosrúcháin féintionscnaimh a shainaithint agus a mholadh;
• Comhordú a dhéanamh ar ghníomhaíochtaí an Aonaid, lena n-áirítear pleanáil, monatóireacht a dhéanamh ar fheidhmíocht, agus úsáid éifeachtúil acmhainní a chinntiú;
• Rannchuidiú le gníomhaíochtaí na Stiúrthóireachta a phleanáil agus a thuairisciú, lena n-áirítear ionchur i bpleananna agus i dtuarascálacha bliantúla bainistíochta;
• Beartais agus treoirlínte inmheánacha atá ábhartha d’obair an Ombudsman a ullmhú, a fhorbairt agus a chur chun feidhme;
• Cúrsaí pearsanra laistigh den Aonad a bhainistiú, lena n-áirítear breithmheasanna agus ardú céime ,, cuspóirí a leagan síos, aiseolas a sholáthar, tacú le forbairt agus foghlaim foirne, agus rannchuidiú le nósanna imeachta roghnúcháin;
• Tionscadail a bhainistiú agus a chomhordú ar fud réimsí éagsúla gníomhaíochta an Ombudsman Eorpaigh;
• Ionadaíocht a dhéanamh don Oifig i gcruinnithe le páirtithe leasmhara seachtracha, lena n-áirítear institiúidí, comhlachtaí, gníomhaireachtaí an Aontais, agus gníomhaithe ábhartha eile;
• Tacú le comhar agus comhordú laistigh den Stiúrthóireacht agus ar fud na hOifige.

c. Líne tuairiscithe

Tuairiscíonn an Ceann Aonaid do Stiúrthóir na bhFiosrúchán.

d. Áit fostaíochta

An Bhruiséil nó Strasbourg ag brath ar riachtanais na seirbhíse.

3. Cé atá in ann iarratas a dhéanamh?

a. Ceanglais incháilitheachta

Ní mór d’iarratasóirí, ar an dáta deiridh chun iarratais a fháil:

• A bheith ina n-oifigigh bhunaithe de chuid an Ombudsman Eorpaigh ag grád AD 8 agus sinsearacht dhá bhliain ar a laghad a bheith acu sa ghrád sin, nó
• A bheith ina n-oifigigh bhunaithe de chuid an Ombudsman Eorpaigh nó de chuid institiúide, comhlachta, oifige nó gníomhaireachta eile de chuid an Aontais Eorpaigh ag gráid AD 9 go AD 12.

Nuair atá post le líonadh trí ardú céime (Airteagal 29, mír 1a, pointe iii) de na Rialacháin Foirne), ní mór do na hoifigigh lena mbaineann a léiriú go bhfuil ar a gcumas a bheith ag obair i dtríú teanga (Airteagal 45 § 2 de na Rialacháin Foirne) roimh a gcéad ardú céime ó rinneadh iad a earcú.

b. An t-eolas agus na scileanna is gá

• Eolas críochnúil ar shainordú, ról, nósanna imeachta agus cuspóirí straitéiseacha an Ombudsman Eorpaigh, lena n-áirítear prionsabail an dea-riaracháin agus na maoirseachta laistigh de chreat institiúideach AE;
• Sáreolas ar chreat institiúideach agus dlíthiúil an Aontais Eorpaigh, go háirithe dlí riaracháin agus dlí-eolaíocht an Aontais;
• Scileanna ceannaireachta agus bainistíochta daoine, lena n-áirítear an cumas foireann ildisciplíneach a stiúradh, a spreagadh, a fhorbairt agus tacú léi i dtimpeallacht oibre chomhoibríoch chuimsitheach;
• Sárscileanna anailíseacha, réasúnaíochta dlíthiúla agus réitigh fadhbanna, lena n-áirítear an cumas measúnú a dhéanamh ar chásanna casta agus íogaire agus moltaí fónta cothroma a sholáthar;
• Breithiúnas fónta agus cumas láidir cinnteoireachta, go háirithe i gcásanna casta nó ardphróifíle;
• Cumas léirithe chun ualaí oibre casta, tosaíochtaí iomaíocha agus spriocdhátaí a bhainistiú agus ardchaighdeáin cháilíochta, chomhsheasmhachta agus éifeachtúlachta á n-áirithiú ag an am céanna;
• Scileanna láidre eagrúcháin, comhordaithe agus bainistíochta tionscadal, lena n-áirítear an cumas comhar trasfheidhmiúil a stiúradh agus tacú le hathrú eagraíochtúil agus le feabhsú leanúnach;
• Sárscileanna dréachtaithe, cumarsáide agus idirphearsanta, agus an cumas cumarsáid éifeachtach taidhleoireachta a dhéanamh le páirtithe leasmhara inmheánacha agus seachtracha ar gach leibhéal;
• Braistint láidir ionracais, neamhchlaontachta, freagrachta, agus treoshuíomh seirbhíse, mar aon le hardchaighdeáin eiticiúla agus ghairmiúla;
• An cumas rannchuidiú go straitéiseach le hobair na hOifige, lena n-áirítear saincheisteanna atá ag teacht chun cinn a shainaithint, tacú le tosaíochtaí institiúideacha, agus fiosrúcháin féintionscnaimh a bhfuil tionchar acu a chur chun cinn;
• An cumas oibriú go héifeachtach i dtimpeallacht ilteangach ilchultúrtha, lena gcothaítear comhar, cuimsiú agus meas frithpháirteach;
• Sáreolas ar an nGaeilge.

Ós rud é go bhfuil suíomh oifigiúil an Ombudsman Eorpaigh in Strasbourg agus go bhfuil oifigí ag an institiúid in Strasbourg agus sa Bhruiséil araon, beidh eolas an-mhaith ar an bhFraincis ina bhuntáiste.

4. Comhdheiseanna

Is fostóir comhdheiseanna é an tOmbudsman Eorpach agus fáiltíonn sé roimh iarratais ó dhaoine cáilithe agus féachann sé le héagsúlacht a chur chun cinn go gníomhach san ionad oibre. Cuirfear cóiríocht réasúnta ar fáil d’iarratasóirí faoi mhíchumas.

5. Neamhspleáchas agus dearbhú leasanna

Sula rachaidh siad i mbun a ndualgas, ní mór d’iarrthóirí aon choinbhleacht leasa fhéideartha nó iarbhír a d’fhéadfadh a bheith acu maidir leis an bpost atá á thairiscint a shainaithint agus a dhearbhú, ionas go mbeidh an Oifig in ann bearta maolaitheacha iomchuí a dhéanamh.

6. Cosaint sonraí

Déanfar sonraí pearsanta a chuireann iarrthóirí ar fáil chun críocha an nós imeachta roghnúcháin seo a phróiseáil i gcomhréir le Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE.^[1]

7. Nós imeachta roghnúcháin

a. An Coiste Comhairleach Roghnúcháin

Agus na hiarrthóirí a n-éireoidh leo á roghnú aige, tabharfaidh Coiste Comhairleach Roghnúcháin cúnamh don údarás ceapacháin. Foilseofar an cinneadh lena gceaptar an Coiste ar shuíomh gréasáin an Ombudsman.

b. Measúnú ar incháilitheacht

Déanfaidh an Coiste Comhairleach Roghnúcháin athbhreithniú ar na hiarratais a gheofar le cabhair óna rúnaíocht chun gach iarratas incháilithe a shainaithint

Bunóidh agus glacfaidh an Coiste Comhairleach Roghnúcháin liosta na n-iarrthóirí incháilithe.

c. Measúnú ar iarrthóirí incháilithe ag an gCoiste Comhairleach Roghnúcháin

i. Measúnú ar iarratais

Ar dtús, déanfaidh an Coiste Comhairleach Roghnúcháin cáilíochtaí, taithí agus spreagadh na n-iarratasóirí uile a mheas agus a chur i gcomparáid le chéile, ar bhonn a n-iarratas.

Beidh an measúnú bunaithe ar na critéir mheastóireachta a luaitear sa roinn ‘An t-eolas agus na scileanna is gá’ thuas agus ar an ualach coibhneasta a shannfaidh an Coiste do gach ceann acu roimh an measúnú.

Tá pasmharc mheasúnú na n-iarratas socraithe ag 75 % de na pointí iomlána sa chéad chéim mheasúnaithe seo. Ní thabharfar cuireadh chun agallaimh leis an gCoiste Comhairleach Roghnúcháin ach don naonúr iarrthóirí is airde a ghnóthaigh an tairseach 75%. [2]

ii. Agallaimh leis an gCoiste Comhairleach Roghnúcháin

Cuirfidh an Coiste na hiarrthóirí a chomhlíonann na coinníollacha thuasluaite faoi agallamh.

Roimh an agallamh, d’fhéadfadh sé go n-iarrfaí ar iarrthóirí téacs gearr a dhréachtú bunaithe ar chás staide a d’fhéadfaí a phlé freisin le linn an agallaimh.

Is i mBéarla den chuid is mó a dhéanfar na hagallaimh. Déanfar eolas ar an bhFraincis a thástáil freisin.

Bunóidh an Coiste liosta iarrthóirí a ghnóthaigh an pasmharc 80% san agallamh, in ord aibítre.

d. Agallaimh leis an Ombudsman

Tabharfar cuireadh ina dhiaidh sin do gach iarrthóir atá ar an ngearrliosta [3] dul faoi agallamh leis an Ombudsman. Freastalóidh an tArd-Rúnaí ar an agallamh freisin.

8. An próiseas iarratais

Agus do spéis á cur in iúl agat, ba cheart duit a sheiceáil go cúramach an gcomhlíonann tú na critéir incháilitheachta uile (féach an Roinn ‘Cé atá in ann iarratas a dhéanamh’).

Ní mór d’iarrthóirí a n-iarratas a chur isteach tríd an gcóras iarratais ar líne ar shuíomh gréasáin an Ombudsman (www.ombudsman.europa.eu/office/careers) faoin 26 Meitheamh 2026 (ar 12.00, meán lae, am na Bruiséile) ar a dhéanaí.

Ní ghlacfar le hiarratais dhéanacha.

Ba cheart aon chomhfhreagras a bhaineann leis an nós imeachta roghnúcháin a sheoladh chuig an seoladh ríomhphoist seo a leanas: career@ombudsman.europa.eu (ní mór an teideal seo a leanas a bheith ar an ríomhphost san ábhar: OMB/3/2026).

Chun eolas a fháil ar ábhar an phoist, is féidir leat teagmháil a dhéanamh le Tina Nilsson ag Tina.nilsson@ombudsman.europa.eu.

Chun faisnéis a fháil faoin Oifig agus faoi dhálaí oibre ginearálta, féadfaidh tú teagmháil a dhéanamh le Zina Assimakopoulou ag Zinovia.assimakopoulou@ombudsman.europa.eu.

Ba cheart dul i dteagmháil leis an Stiúrthóir Gréasáin maidir le fiosrúcháin faoi chúrsaí teicniúla .

Chun bheith bailí, ní mór na nithe seo a leanas a bheith san áireamh sna hiarratais:

(a) litir inspreagtha i mBéarla ina mínítear leas an iarratasóra sa phost seo,

(b) cóip de curriculum vitae an iarratasóra i mBéarla, agus

(c) doiciméad lena gcruthaítear stádas oifigiúil na n-iarrthóirí agus a ngrád reatha (e.g. teastas gairme SYSPER).[4]

Féadfaidh iarrthóirí an dá thuarascáil foirne dheireanacha a chur isteach más mian leo.

Gheobhaidh na hiarrthóirí uile admháil go bhfuarthas an t-iarratas agus cuirfear ar an eolas iad faoi thoradh gach céime den nós imeachta roghnúcháin.

An Bhruiséil, 26/05/2026

Teresa Anjinho

 

[1] IO L 295, 21.11.2018, lch. 39.

[2] Tabharfar cuireadh chun agallaimh d’iarrthóirí ar comhionann a bhfiúntas fiú má sháraíonn an líon iomlán an líon uasta de 9 n-iarrthóir.

[3] Iarrthóirí a bhfuil an tairseach 80% bainte amach acu.

[4] I gcás na n-iarrthóirí inmheánacha, cuirfidh an fhoireann acmhainní daonna an fhaisnéis sin ar fáil don Choiste Comhairleach Roghnúcháin.